28
მარტიდღის ზოგადი ასტროლოგიური პროგნოზი
დედაქალაქის უახლოეს ისტორიაში არსებობს ტრაგიკული ამბები, რომლებსაც თბილისი ვერ ივიწყებს.1986 წლის 13 ივლისს წყნეთში მომხდარ ტრაგედიას 19 წლის ლევან თოფჩიშვილის ("თოფჩიკას") სიცოცხლე შეეწირა. სისხლიანი გარჩევა ე.წ. მინისტრთა საბჭოს აგარაკებზე მოხდა. ლევან თოფჩიშვილი, იგივე "თოფჩიკა" ღია კინოთეატრთან ახლოს ორ მეგობარ ბიჭთან ერთად იმყოფებოდა და დეიდაშვილის სანახავად მიდიოდა. დაპირისპირება ბიჭებს შორის მომხდარ სიტყვიერ შეურაცხყოფას მოჰყვა, თოფჩიკას ერთ-ერთმა ბიჭმა რაღაც უთხრა, რის გამოც ლევანმა მას მზესუმზირა შეაყარა. ბიჭებს შორის მომხდარი სიტყვიერი დაპირისპირება ფიზიკურ დაპირისპირებაში გადაიზარდა, რის შედეგადაც ლევან თოფჩიკაშვილს 6 ჭრილობა მიაყენეს.
ინციდენტში ე.წ. "ელიტური ოჯახების" შვილები მონაწილეობდნენ, უმეტესობა არასრულწლოვანი იყო. შესაბამისად, როგორც ამბობენ, მშობლებმა ყველაფერი გააკეთეს, თავიანთ შვილებს პასუხისმგებლობიდან თავი რომ აერიდებინათ, თუმცა სასამართლოს გადაწყვეტილების შედეგად რამდენიმე მათგანი ციხეში ჩაჯდა.
დაპირისპირება ამით არ დასრულებულა, ერთმანეთს ვერის და ვაკის "ჯგუფები" გადაეკიდა. მათ შორის ხშირად ხდებოდა ჩხუბი და ხმაურიანი გარჩევები. ამას დაერთო ეროვნული მოძრაობის დაწყება, ინციდენტში მონაწილე მთავარი პირებიდან რამდენიმე დღემდე ცოცხალია, მათ შორის ლერი სულაბერიძე. დაპირისპირების მონაწილე დათო ჯაყელი და ლაშა სულაბერიძე ავტოსაგზაო შემთხვევას ემსხვერპლნენ. ისინი ვაკეში, ჩაის სახლთან ცხოვრობდნენ. ბიჭები სახლში ბრუნდებოდნენ, რა დროსაც ბულგარეთის ელჩი მანქანით დაეჯახა და ორივე მათგანი ადგილზე გარდაიცვალა.
ამბობენ, რომ შემთხვევის დროს ელჩი ნასვამი იყო და მეგობარ გოგოსთან ერთად იმყოფებოდა, თბილისში მაშინ ძალიან ცოტა მანქანა დადიოდა, მაგრამ არაფხიზელ მდგომარეობაში მყოფი ელჩი საჭეს გადაჭარბებული სიჩქარით მართავდა. სკანდალის თავიდან არიდების მიზნით ელჩი ქვეყნიდან გააპარეს და ეს საქმე გამოუძიებელი დარჩა.
აღსანიშნავია, რომ ბულგარეთში იკარგება გოგა ტყავაძის და გიგი იოსელიანის კვალი. ბიჭები სკოლის დამთავრების შემდეგ "მხედრიონის" რიგებში გაწევრიანდნენ და მათ "ბულგარეთში დაკარგულ მხედრიონელებად" მიიჩნევენ. რაც შეეხება ინციდენტში მონაწილე კიდევ ერთი ბიჭის, ლევან წულაძის გარდაცვალებას, ის ძმასთან ერთად რუსეთში წავიდა საცხოვრებლად. ერთ საღამოს, მას აზერბაიჯანელმა საზამთროს გამყიდველმა დახმარება სთხოვა, უთხრა მაყაჩაღებენ, იქნებ დამეხმაროო და დახმარებაზე წულაძეს უარი არ უთქვამს. ბოროტმოქმედმა მას ცეცხლსასროლი იარაღით სასიკვდილო ჭრილობები მიაყენა...
თამარ ბოჭორიშვილი
AMBEBI.GE
