15
მარტიდღის ზოგადი ასტროლოგიური პროგნოზი
მეგაშოუ "X ფაქტორში" "დამატებით ოთახში" ორი ახალი წამყვანი დაემატა - თათუკა ნატროშვილი და გიგო შიუკაშვილი. ამ სტატიაში ძალიან აქტიურსა და მხიარულ გიგოს გაგაცნობთ (VIDEO)
მას ორი დღის წინ 20 წელი შეუსრულდა და ეს თარიღი პირდაპირ ეთერში შესაბამისად აღინიშნა. Ambebi.ge გიგო შიუკაშვილის დედას, ინგა სარჯელაძეს ესაუბრა.
- თქვენ შვილს სერიოზული საქმე მიანდვეს - გრანდიოზულ შოუში თანაწამყვანია და თავისი საქციელით მაყურებელს უკვე ძალიან შეაყვარა თავი...
- გიგოს 20 წელი შეუსრულდა. განსხვავებული თარიღი იყო. წლიდან წლამდე გამორჩეულად ელოდება საკუთარ იუბილეს და უბედნიერესია ხოლმე იმ დღეს, როდესაც გაჩნდა. მეც სულ ვფიქრობ, რომ მისთვის საყვარელი დღე სიურპრიზებით იყოს ხოლმე სავსე. წელსაც რაღაც განსხვავებული, ახალი მინდოდა, თან, იმასაც ვფიქრობდი, რაღა უნდა გავაკეთო, თითქმის ამოვწურე იდეები-მეთქი. ვერც კი წარმოვიდგენდით, თუ ასეთი მასშტაბური და მნიშვნელოვანი აღმოჩნდებოდა ამ თარიღის აღნიშვნა. ორშაბათს, პირდაპირ ეთერში, თავის საყვარელ საქმეს აკეთებდა, მართლა დიდი ემოციებით იყო დატვირთული და ბედნიერი...
- პროექტში როგორ მოხვდა?
- "X ფატქორიდან" დამირეკეს და მითხრეს, რომ სურვილი ჰქონდათ, გიგო წამყვანად მიეწვიათ, ოღონდ, ჯერ ბოლომდე არ ჰქონდათ ეს გადაწყვეტილი. შემდეგ "დამატებითი ოთახისთვის" სინჯი ჩაიწერა. მერე კი უკვე შემეხმიანნენ, - მობრძანდით, ჩვენ ვიწყებთ მუშაობასო. ეს მის ცხოვრებაში ბედნიერი დღე იყო, მიუხედავად იმისა, რომ მთელი 20 წელიწადია, გიგოსთან სხვადასხვა პროგრამით ვმუშაობ.
- როგორც ჩანს, დიდი შრომა გაქვთ ამ ყველაფერში ჩადებული...
- ძალიან დიდი შრომა გვაქვს ჩადებული... ახლა რომ ვიხსენებ, ბავშვობიდან, ყოველთვის მიკროფონი ეჭირა ხელში, მაშინაც კი, როცა სიარული ჯერ არ იცოდა და ფორთხავდა. სულ რაღაცებს ასახიერებდა, დიდი სურვილი ჰქონდა, მსახიობი გამოსულიყო. 2 წლის წინ კი გადაწყვიტა, რომ ჯერჯერობით წამყვანობა უნდა. აქტიური ადამიანია, ყოველთვის სერიოზული გრაფიკი აქვს, - არ გვაქვს დრო, რომ რაიმეში დავკარგოთ. საკუთარ თავზე ბევრს მუშაობს, რამდენიმე საქმეში პარალელურად არის მუდმივად ჩართული.
12 წლისა სცენაზე იდგა. ყველაზე კარგად ეს საქმე გამოსდის. აქვს კარგი გარდასახვის უნარი და ძალიან უყვარს, ხომ გითხარით, მიკროფონი. ასევე კამერა, ობიექტივი. ამ ყველაფერთან მშვენივრად იხსნება. მისი ოცნებაა მსახიობობა, წამყვანობა. ყველანაირად მონდომებულია, რომ ამ გზაზე არაფერმა ხელი არ შეუშალოს. დარწმუნებული ვარ, არაფერი დააბრკოლებს.
- რა დიაგნოზით დაიბადა?
- დაუნის სინდრომი... მაგრამ ჩვენ შორის ბევრი მსგავსებაა, ვიდრე განსხვავება... ეს ყველაფერი წლების მერე მოდის... თავიდან, როცა ბავშვი ამ დიაგნოზით ჩნდება, დედას არ აქვს ამაზე ინფორმაცია. ეს პრობლემა ხომ ყველა ეტაპზე სტიგმატიზებულია და მით უფრო, ადრეულ წლებში. ნაკლებად იძლეოდნენ ამაზე ინფორმაციას.
- თქვენ შემთხვევაში როგორ მოხდა?
- არ ვიცოდი, თუმცა ეჭვი მაშინვე გაჩნდა, რაც მერე ანალიზმაც დაადასტურა, რომ დაუნის სინდრომი ჰქონდა. მძიმე იყო ამ მომენტის გადალახვა, მით უფრო, რომ სახელმწიფოსგან მხარდაჭერა არაფერი იყო.
უბრალოდ, ძალიან გაგვიმართლა, რომ გიგო მოსკოვში გაჩნდა, სადაც არსებობდა ასოციაცია, ცენტრი, რომლებმაც იმ პერიოდისთვის დიდი დახმარება გაგვიწიეს. აქ მაშინ მსგავსი არაფერი იყო. ახლა კიდევ რაღაც ცენტრები არსებობს. მოსკოვში კი სპეციალური ორგანიზაციები უმთავრესად მშობლებს ამზადებდნენ, რომ ბავშვებთან მუშაობა შეძლებოდათ. მერე გაგვიჩნდა პრეტენზია, რომ გიგო საქართველოში გაზრდილიყო და აქეთ წამოვედით. იქიდან მოყოლებული, დღემდე ჩემს შვილს მაქსიმალური მხარდაჭერა აქვს.
- როგორც ეკრანზე ვხედავთ, გიგოს ყველაფერი შესანიშნავად ესმის, ყველაფერზე ადეკვატური რეაქციები აქვს... ძირითადად, რაში მდგომარეობს მისი პრობლემა?
- ჩვენ საჯარო სკოლაში დავდივართ... საერთოდ, დიდი ბრძოლა გვიწევდა და დაგვჭირდა იმისთვის, რომ რაც გვეკუთვნოდა, ის მიგვეღო (რას ვიზამთ, ქართული საზოგადოება ნელ-ნელა ვითარდება). მოკლედ, იმას მივაღწიეთ, რომ გიგო მეექვსე კლასიდან საჯარო სკოლის მოსწავლე გახდა. მანამდე ბაღსა და დღის ცენტრში დადიოდა.
- საჯარო სკოლის მოსწავლე როდის გახდა?
- მაშინ, როცა ჩვენში უკვე ინკლუზია დაინერგა. გიგოს თავისი ინდივიდუალური პროგრამა და დავალებები აქვს, რასაც ისევე ამზადებს, როგორც თანაკლასელები, უბრალოდ მისი შესაფერისი პროგრამით.
- ე.ი. თავსუფლად ანგარიშობს, კითხულობს...
- რა თქმა უნდა. ახლა მეთერთმეტე კლასშია, გარკვეულ საგნებს არ გადის ისე და იმ დონეზე, როგორც მისი თანაკლასელები, მაგრამ საგნებში ინდივიდუალური პროგრამა აქვს. მისი სკოლაში სიარული მხოლოდ სოციალური ადაპტაცია არ არის. მინდა ხაზი გავუსვა იმას, რომ სოციალური ადაპტაციის გარდა, რაც გენიალურად გამოსდის, არაჩვეულებრივია კლასში, სკოლაში და საერთოდ ყველაგან. მისთვის განათლების მიღებაც ერთ-ერთი უმნიშვენელოვანესი მომენტია და ამ მხრივაც ჩვენი მიღწევები და შედეგები გვაქვს. გიგოს გეგმაში აქვს, რომ აიღოს ატესტატი, ჩააბაროს სასწავლებელში და გამოვიდეს მსახიობი.
- პრობლემები არ შეექმნება?
- აქაც პრობლემები გვაქვს, თუმცა ზუსტად ვიცი, რომ ამ წინააღმდეგობას დაძლევს და მაინც მიაღწევს იმას, რაც უნდა.
მიუხედავად იმისა, რომ ჩვენი განათლების სისტემა ჩვენნაირი ახალგაზრდებისთვის 12 წლის ატესტატის გაცემას არ ითვალისწინებს. გვაქვს ინდივიდუალური პროგრამები, მაგრამ არ გვაქვს ინდივიდუალური საატესტატო გამოცდები. ამაზეც მოგვიწევს მათთან ერთად მუშაობა. ალბათ დაინახავენ სიმართლეს და ამ მიმართულებით გარკვეული რეფორმები ჩატარდება.
- მეტი შვილი არ გყავთ?
- არა.
- და მთლიანად მოცული ხართ ამ ადამიანზე ზრუნვით, ხომ?
- სხვანაირად გამორიცხულია, მაგრამ უნდა გითხრათ, რომ ცხოვრების არც ერთ ეტაპზე, ისე არ ყოფილა, რომ მთელი ენერგია მხოლოდ ამ ბავშვში ჩამედო და მეტი არაფერი მეკეთებინა. იმისთვის, რომ ბავშვი იყოს ჯანსაღი და ჯანმრთელი, გვერდით ყველანაირად რეალიზებული დედა სჭირდება. წლების განმავლობაში საჯარო სტრუქტურაში ვმუშაობ, მაქვს საკმაოდ დატვირთული სამსახური. მთავარია, მონდომება და ადამიანი ყოველთვის ყველაფერს მოასწრებს. ისე კი, ამ ძალას ეს ბავშვები თავად გაძლევენ.
- როგორც ჩანს, გიგო მუსიკალურიც არის.
- ძალიან. ამ ეტაპზე ფოლკლორმა გაიტაცა. ფანდურზე დაკვრას სწავლობს, ფოლკლორის იმპროვიზაცია იზიდავს - დოლი, ტამტამი, ფანური. უნდა, რომ ეს ყველაფერი კარგად აითვისოს. მუსიკოსი ვალერიან შიუკაშვილი მისი ბიძაა და კლასიკური მუსიკა ფოლკლორთან ერთად მან შეაყვარა. მოკლედ, მასში ესეც აღმოჩენაა. ისე, ეს ბავშვები ყველანი ინდივიდუალურები არიან და არა ერთმანეთის მსგავსები. მხოლოდ გიგო არ არის მათ შორის გამორჩეული, ამ მიმართულებით მას საკმაოდ დიდი სამეგობრო წრე ჰყავს, დანარჩენებიც კარგები არიან, მერწმუნეთ...
ლალი ფაცია
AMBEBI.GE
იხილეთ ვიდეო: როგორ მიულოცეს დაბადების დღე გიგოს "X ფაქტორის" პირდაპირ ეთერში
