28
მარტიდღის ზოგადი ასტროლოგიური პროგნოზი
თბილისში, მიხეილ ჯავახიშვილის ქუჩაზე (ყოფილი ელბაქიძის დაღმართი) მომხდარმა შემთხვევამ, სადაც მანქანის სავალი ნაწილი ჩამოინგრა, მოსახლეობაში შეშფოთება გამოიწვია. ელბაქიძის აღმართი მანქანებით საკმაოდ დატვირთული მონაკვეთია და სრულიად შესაძლებელი იყო, რომ გზის სავალი ნაწილის ჩამონგრევას მსხვერპლის გარეშე არ ჩაევლო.
კიდევ არის თუ არა სხვა ადგილები თბილისში, რომლებიც პოტენციურად იგივე საფრთხეს ატარებენ, ამ თემაზე გეომორფოლოგი მერაბ გონგაძე გვესაუბრა.
"იმის გამო, რომ თბილისი რელიეფური ქალაქია, ქვაბულია, ყოველთვის მიდის ფერდობებთან მუშაობა, რაც იწვევს სხვადასხვა გართულებებს, ანუ გრავიტაციული პროცესების განვითარებას. კიდევ ერთი ფაქტორი ის კომუნიკაციებია, რომლებიც ქალაქის ქვეშ გადის. განსაკუთრებით წყალგაყვანილობა, რომელიც თავისებურ დარღვევებს იწვევს.
წყალგაყვანილობები და კანალიზაციები, სადაც არის გაჟონვები, იწვევენ სწორედ გრუნტების გამორეცხვას. ამას ემატება ძალიან აგრესიული გრუნტის წყლები, რომლებიც თბილისის რეგიონებში ძალიან აქტიურად არის განვითარებული. ელბაქიძის აღმართიც, სადაც ნაყარი მიწა იყო, ჩამოიშალა. იქ წყალი ჟონავდა და მოხდა ნიადაგის გამორეცხვა, ეს არის მთავარი მიზეზი. სადაც ბადეებია გაკეთებული, ეს არის დროებითი შეჩერება, ამოივსება მასით და ახალი ბადის გაკეთება იქნება საჭირო. ასეთი მოწყვლადი ადგილები მუდმივად მოითხოვს ყურადღებასა და დაკვირვებას, ის მუდმივი მონიტორინგის ქვეშ უნდა იყოს.
ძალიან რთული სიტუაციაა სოლოლაკის ხევსა და წყნეთისკენ მიმავალ მეწყრულ საფეხურზე, მთაწმინდის პანთეონიდან ქვემოთ. 1974-ში მოწყდა ვეებერთელა მასა, იმის გამო, რომ მიდიოდა წყალგაყვანილობის თხრილის გაჭრა, ამან გამოიწვია დარღვევა გრავიტაციული წონასწორობისა, მოწყდა უზარმაზარი მასა და დაიღუპნენ ის მუშები, რომლებიც აქ მუშაობდნენ. 2003 წელს, იმავე ქუჩაზე, ბენზინგასამართ სადგურს სადაც აშენებდნენ, იქაც მოწყდა მიწა და კიდევ ოთხი ადამიანი გარდაიცვალა. ამ ჩამოჭრებმა გამოიწვიეს ამოძრავება.
ეს ყველაფერი რომ თავიდან ავიცილოთ, საჭიროა მცენარეული საფარი გავაშენოთ მოჭრილ ფერდობებთან, რომ შეაკავოს ეს პროცესები. ეს არის ყველაზე ნაყოფიერი გამოსავალი.
დღეს, დაახლოებით ისეთივე საფრთხე არის ვერის ხეობაში; მთაწმინდაზე; თამარ მეფის გამზირზე, ცირკის მოპირდაპირე მხარეს; ვარკეთილის მესამე მასივში, როგორიც აქამდე იყო ელბაქიძის აღმართზე და იქაც ყველაფერი კაპიტალურ სამუშაოებს საჭიროებს.
ჩემი რეკომენდაცია იქნება, რომ ცოტა გამკაცრდეს საკითხი ქედის მოჭრასთან დაკავშირებით, ასე უთავბოლოდ მოვჭრათ ქედი, არ შეიძლება", - განაცხადა მერაბ გონგაძემ.
შეგახსენებთ, რომ თბილისში, მიხეილ ჯავახიშვილის ქუჩაზე (ყოფილი ელბაქიძის დაღმართი) მიმდინარე აღდგენითი სამუშაოების გამო საზოგადოებრივი ტრანსპორტის მარშრუტი დროებით შეიცვალა.
გიორგი ხარშილაძე
AMBEBI.GE
