სოხუმში აფხაზურმა ოპოზიციამ დე ფაქტო პრეზიდენტის ადმინისტრაციის შენობის შტურმი დაიწყო

სოხუმში ოპოზიციის წარმომადგენლებმა, რომლებიც დე ფაქტო პრეზიდენტ ალექსანდრე ანქვაბთან მოლაპარაკებების შედეგს არ დაელოდნენ, ანქვაბის ადმინისტრაციის შენობის შტურმი დაიწყეს. ამის შესახებ "ინტერფაქსი" იუწყება.

სააგენტოს კორესპონდენტი ადგილიდან იტყობინება, რომ რამდენიმე ათეული ადამიანისგან შემდგარმა ჯგუფმა დე ფაქტო პრეზიდენტის ადმინისტრაციის შენობას ქვები და ჯოხები დაუშინა, რის შედეგადაც ფანჯრებია ჩამსხვრეული. მათ შესასვლელი კარიც ჩაამტვრიეს და შიგნითაც შეაღწიეს.

ამავდროულად, ოპოზიციის ნაწილი ანქვაბთან მოსალაპარაკებლად იმყოფება. ოპოზიცია მის გადადგომას ითხოვს. ამ მოთხოვნით რამდენიმე ათასი ადამიანი ქალაქის ცენტრში შეიკრიბა, როს შემდეგაც ანქვაბის რეზიდენციისკენ გადაინაცვლეს.

"ინტერპრესნიუსი"