დავით უსუფაშვილი - ქართულ სახელმწიფოსა და ეკლესიას აკლიათ ერთი რამ, ერთმანეთთან ცივილური ურთიერთობის გამოცდილება

სტერეოტიპი, თითქოს დასავლეთი მართლმადიდებლობის მტერია, ხოლო იმპერიალიზმი და კომუნიზმი მართლმადიდებლების გადამრჩენი, გადასახედი და დასანგრევია , - ამის შესახებ საქართველოს პარლამენტის თავმჯდომარემ, დავით უსუფაშვილმა სასტუმრო "ქორთიარდ მერიოტში" მიმდინარე ღონისძიებაზე სიტყვით გამოსვლისას განაცხადა.

როგორც პარლამენტის თავმჯდომარემ აღნიშნა, მიუხედავად იმისა, რომ ქართულ სახელმწიფოსა და მართლმადიდებლურ ეკლესიას არსებობის უდიდესი ისტორიული გამოცდილება აქვთ, ორივეს აკლია ერთი რამ: ერთმანეთთან ცივილური ურთიერთობის გამოცდილება, რადგან გამოცდილება 200 წლის განმავლობაში არ ჰქონიათ გარე ფაქტორების გამო.

"ამიტომ დამკვიდრდა უცნაური ვითარება საქართველოში, როდესაც ფორმით დასავლურ ინსტიტუტებზე დაფუძნებულ სახელმწიფოს ვაშენებდით, ხოლო შინაარსით - საბჭოთა ფასეულობები და კომუნისტური მენტალიტეტი სჭარბობდა ჩვენს მოქმედებებში. აქედან მოდის სხვა სტერეოტიპები, როგორიცაა, მაგალითად თითქოს დასავლეთი მართლმადიდებლობის მტერია; იმპერიალიზმი და კომუნიზმი - მართლმადიდებლების გადამრჩენი და შემფარებელი. ეს სტერეოტიპები გადასახედი და დასანგრევია, რადგან ქრისტიანობისგან დამოუკიდებლად ვერ შეიქმნება თავისუფლებას დამოკიდებული ღირებულებითი სისტემა, ხოლო თავისუფლებაზე დაფუძნებული ღირებულებითი სისტემის გარეშე ვერ შეიქმნება ისეთი პოლიტიკური სისტემა, რომელიც აღიარებს რელიგიის, რწმენის თავისუფლებას და აღიარებს იმ მთავარ ღირებულებას, რაც მართლმადიდებელი ეკლესიისთვის და ქრისტიანული რელიგიისთვის არის მთავარი ღირებულება – ადამიანი", - აღნიშნა დავით უსუფაშვილმა.

მისივე თქმით, ლიბერალური დემოკრატია არის ზრუნვა თითოეულზე იმისთვის, რომ ყველა ბედნიერი იყოს. მაშასადამე, ეს არის სწორედ სახელმწიფოებრივი ინსტიტუციური მობრუნება ქრისტიანობისკენ, როცა თითოეული ადამიანის საზრუნავია და არა კოლექტივი, მასა, კლასი და ასეთი კატეგორიები.

სრულიად საქართველოს კათოლიკოს-პატრიარქის, ილია II ლოცვა-კურთხევით, 12-19 მაისს საქართველოში ღვთისმშობლის თაყვანისცემის კვირეული აღინიშნება.

ამასთან დაკავშირებით, სასტუმრო "ქორთიარდ მარიოტში" მეხუთე საერთაშორისო სიმპოზიუმი საზეიმოდ გაიხსნა. მასში მონაწილეობისთვის საქართველოს ღვთისმსახურნი და მეცნიერები მსოფლიოს 14 ქვეყნიდან ეწვივნენ.

"ინტერპრესნიუსი"