გეგა და ია ერთად თავს კომფორტულად გრძნობენ

"X ფაქტორი" სტარტს 14 აპრილს იღებს. ჩაწერილი მასალა ტელემაყურებლისთვისაც ხელმისაწვდომი გახდება, მანამდე კი მხოლოდ ფილარმონიაში მისულ საზოგადოებას შეეძლო დასწრებოდა შესარჩევ ტურებს და ენახა, ჟიურის ოთხკაციანი შემადგენლობა - სტეფანე, სოფო ტოროშელიძე, გიორგი გაბუნია და თამთა გოდუაძე, რომელი მონაწილის ვოკალური მონაცემებით აღფრთოვანდებოდა და რომლით შეშფოთდებოდა.

ტელეპროექტის წამყვანებად "რუსთავი 2"-მა "ნიჭიერის" ჟიურის წევრი და არხის მარკეტინგის სამსახურის უფროსი გეგა ფალავანდიშვილი და მსახიობი ია სუხიტაშვილი შეარჩია. "რეიტინგი" კულისებში შეიჭრა და გეგასა და იას სამზადისს მათთან ერთად გადაავლო თვალი.

- ია, როგორც მახსოვს, ასეთი ტელეპროექტი არასდროს წაგიყვანია. შემოთავაზების მიღების შემდეგ დიდხანს იფიქრე?

- ვინერვიულე, დღემდე ვუმტკიცებ ყველას, რომ ტელეპროექტის წაყვანას ცალკე ნიჭი სჭირდება. წამიყვანია საღამოები, სადაც დიდი თაბახის ფურცლები გიკავია და სანერვიულოც ნაკლებად გაქვს, იქიდან კითხულობ შიგადაშიგ, რა თქვა. არავინ გთხოვს, რომ ტექსტი დაიზეპირო, თუმცა მოთხოვნის შემთხვევაში ესეც არ იქნებოდა პრობლემა. უბრალოდ, იმის თქმა მინდა, რომ "X ფაქტორშიც" არავინ მთხოვს ტექსტის დაზეპირებას, აქ კომენტარებია გასაკეთებელი, შესაბამისად, გარკვეული წილი იმპროვიზაციაზე მოდის. თუკი გინდა, ნორმალურად აკეთო ეს საქმე, ამას მარტივად არ უნდა შეხედო.

- მალევე დათანხმდი?

- მალევე, რადგან ფიქრის დრო აღარ მომცეს (იღიმის).

- გეგა, შენც პირველად მიგყავს შოუ...

- პირველად და უკანასკნელად (იცინის). სანამ დავთანხმდებოდი, მაშინაც ვიცოდი, რომ მეტჯერ არასდროს გადავდგამდი ამ ნაბიჯს. არ მინდა და არ მომწონს.

- მსხვერპლშეწირვა მოხდა?

- არა (იღიმის). არანაირი მსხვერპლშეწირვა არ მომხდარა, უბრალოდ, "რუსთავი 2"-ია, გადავწყვიტეთ და რადგან ძალიან გვჭირდება, ვაკეთებთ. საინტერესოა, ახალია და გამოწვევაც არის. შესაძლოა, ხანდახან რაღაცის გაკეთება გულზე მაინცდამაინც არ გვეხატებოდეს, მაგრამ ვაკეთებთ. გასაოცარია ალბათ, მაგრამ მე ტელევიზიით გამოჩენაც კი არ მომწონს. არ არის წამყვანობა ჩემი საქმე. თუკი გამოვა, კარგი იქნება და შოუს წაადგება. იმედია, რამეს არ გავაფუჭებ.

- როგორია ერთმანეთთან წყვილში მუშაობა?

- გადასარევია.

ია:

- თავს ძალიან კომფორტულად ვგრძნობ.

გეგა:

- ერთნაირად ვაზროვნებთ, ვფიქრობთ. ჩვენ გვიწევს კონკურსანტების დახვედრა, სცენაზე გაცილება, შემდეგ ისევ მათთან ურთიერთობა, მხარდაჭერა. ძირითადად, მე და იას ერთნაირი შეფასებები გვაქვს, კარგია, თუ არ არის კარგი. ვაფასებთ გამოსვლას, ხანდახან ჟიურის "სისულელეებსაც"...

ია:

- როცა სცენაზე პარტნიორი გყავს, ძალიან მალევე გრძნობ მის ენერგეტიკას, შენთვის მისაღებია თუ არა. არ მინდა, ვარდისფრად შევფუთო რაღაცები, მაგრამ გეგასთან წყვილში მუშაობა ძალიან კარგია.

იხილეთ სტატიის გაგრძელება