სკანდალი 53-ე სკოლაში: განათლების მინისტრი პროცესესს არანორმალურს უწოდებს

ყველანაირ სამართლებრივ ბერკეტს გამოვიყენებთ იმისათვის, რომ თბილისის 53-ე სკოლაში გაკვეთილების ჩატარებას საფრთხე არ შეექმნას , - ამის შესახებ მთავრობის დღევანდელი სხდომის დაწყებამდე ჟურნალისტებს განათლებისა და მეცნიერების მინისტრმა თამარ სანიკიძემ განუცხადა.

მინისტრის განმარტებით, მშობლებისგან აქვს ინფორმაცია, რომ ყოფილი დირექტორი და პედაგოგთა ნაწილი სთხოვენ, ქუჩაში გამოვიდნენ აქციების ჩასატარებლად, რაც დაუშვებელია.

''სკოლაში ახალი დირექტორი უკვე შესულია. შესაბამისად, სწავლა 9 საათზე დაიწყებოდა, თუმცა საერთოდ, პროცესები არ მიმდინარეობს ნორმალურად და ამას ხელს უწყობენ სკოლის ყოფილი დირექტორი და სამწუხაროდ, პედაგოგთა ნაწილი. მე მგონი, ეს ხალხი საერთოდ ვერ გრძნობს იმ პასუხისმგებლობას, რომელიც აკისრიათ მოსწავლეებთან მიმართებაში. გუშინ მთელი საღამო შემოდიოდა ზარები შეწუხებული მშობლებისგან, რომ მათ სთხოვენ, გამოვიდნენ და აქციები მოაწყონ ქუჩაში. ეს დაუშვებელია. შესაბამისად, ყველანაირ სამართლებრივ ბერკეტს გამოვიყენებთ იმისთვის, რომ მასწავლებელი შევიყვანოთ გაკვეთილზე, ბავშვი არ დაზარალდეს და სკოლაში საგაკვეთილო პროცესს საფრთხე არ შეექმნას", - განაცხადა თამარ სანიკიძემ.

53-ე სკოლის მოსწავლეებმა და მასწავლებლებმა დღეს დილიდან სკოლის შესასვლელების ბლოკირება მოახდინეს.

მასწავლებლები და მოსწავლეები სკოლის ახლად დანიშნულ დირექტორს ეკა გახარიას სკოლაში შესვლის საშუალებას არ აძლევენ. ეკა გახარიას გამოჩენამ სკოლის მოსწავლეების და მასწავლებლების პროტესტი გამოიწვია. მოსწავლეები თავდაპირველად სკოლის ეზოში დასხდნენ და სკანდირებდნენ - "წადი". შემდგომ კი, გადაინაცვლეს სკოლის შესასვლელთან და მისი ბლოკირება მოახდინეს.