როგორ მოვხიბლოთ კირჩხიბი მამაკაცი
22 ივლისამდე მზე კირჩხიბის ნიშანში იქნება და დროა, გავიგოთ ამ ნიშნის შესახებ უფრო მეტი. გთავაზობთ სტატიების ციკლს კირჩხიბის ნიშნით დაბადებულებზე. თავდაპირველად გავარკვიოთ როგორია კირჩხიბი მამაკაცი დაქორწინებამდე და როგორ შეიძლება მისი მოხიბვლა, როგორი მამაა. და ნუ დაგვავიწყდება კირჩხიბი ქალბატონიც, რომელიც საუკეთესო დიასახლისადაა აღიარებული.
კირჩხიბს მთვარე მართავს, ამიტომ რაც არ უნდა ვაჟკაცური გარეგნობის იყოს ამ ნიშნით დაბადებული მამაკაცი იცოდეთ, რომ გულის სიღრმეში იგი ძალიან ემოციური, სენსიტიური, ბუტია და განცდიანი ადამიანია.
მამაკაცი კირჩხიბები ნაკლებად განეკუთვნებიან აქტიური და თავზეხელაღებულთა რიცხვს. ამიტომ თუკი ამ ზოდიაქოს ნიშნით დაბადებული მამრის გულის მოგება გსურთ, თავად მოგიწევთ აქტიურობა. თუმცა ძალიანაც ნუ მოინდომებთ, ზედმეტი აგრესიულობითა და სითამამით გამორიცხული არაა კირჩხიბი საერთოდ დააფრთხოთ და შესაძლოა, თქვენგან თავის შორს დაჭერაც გადაწყვიტოს. ამ მამაკაცის გულს ზრუნვით, სითბოთი და ყურადღებით მოიგებთ. ხშირად მოუსმინეთ, ჰკითხეთ თავს როგორ გრძნობს. აგრძნობინეთ, რომ თქვენი სახით კარგი მესაიდუმლე, დარდის გამზიარებელი და მზრუნველი მეგობარი ჰყავს. კირჩხიბებს ე.წ. დედის ტიპის ქალბატონები იზიდავთ, ამიტომ ასაკში სხვაობა ამ მამაკაცის შემთხვევაში ნუ გაგიჩენთ კომპლექსს, მას პირიქით მოეწონება უფრო გამოცდილ და ჭკვიან ქალთან რომანის გაბმა, რომელიც ცოლის ფუნქციებთან ერთად ოსტატურად შეითავსებს დედის მოვალეობებს.
კირჩხიბი მამაკაცები ხანგრძლივი დროის მანძილზე აკვირდებიან და სწავლობენ ინტერესის ობიექტ ქალბატონს. მათთვის წარუმატებლობა და იმედის გაცრუება სიყვარულში, ერთობ მტკივნეულად გადასატანი მოვლენაა. ამიტომ ნუ გაგიკვირდებათ, თუ თქვენი ნაცნობი კიბო, ურთიერთობის საწყის ეტაპზე პასიურ პოზიციას ამჯობინებს და აშკარა ქათინაურებისგან თავს იკავებს თქვენი მისამართით. მოთმინება და მაქსიმალური ყურადღება საუკეთესო გზაა კირჩხიბი მამრის "გასახსნელად" ურთიერთობაში. სამაგიეროდ, თუკი მან გულის კარი ერთხელ გაგიღოთ და თავისიანად დაგიგულათ, სამომავლოდ ძალიანაც რომ მოინდომოთ, მისგან თავს ვერაფრის დიდებით ვეღარ დაიხსნით.