"ხანდახან მინდა დავივიწყო ყველაფერი და ცხოვრება ხელახლა დავიწყო" - ნიკა მემანიშვილი ნიუ-იორკულ ამბებზე

დირიჟორი ნიკა მემანიშვილი "ფეისბუქის" საკუთარ გვერდზე მეგობრებს "ნიუ-იორკულ" ამბებს უზიარებს.

"ამ საღამოს ჩემი დიდი ხნის ნატვრა ამიხდა და მეტროპოლიტენ ოპერაში ჩემი ერთ-ერთი ყველაზე ძვირფასი დირიჟორის ჯეიმს ლევაინის სპექტაკლს დავესწარი, აღინიშნებოდა 40 წელი მისი ნიუ-იორკის მთავარ თეატრში მოღვაწეობისა და სამხატვრო ხელმძღვანელობის და რაც ყველაზე, ყველაზე მთავარია, სრულდებოდა ჩემი ყველაზე გულთან ახლოს მყოფი, სიგიჟემდე ძვირფასი ნაწარმოები: ალბან ბერგის ოპერა "ვოცეკი"... მეორე რიგში, დირიჟორის ოდნავ მარცხნივ გასასვლელთან იყო ჩემი ადგილი და ერთი წუთით არ ამიხედია სცენისკენ, თვალი ვერ მოვწყვიტე ინვალიდის სავარძლით პულტთან მხნედ მყოფ თანამედროვეობის ლეგენდას და მინდოდა მისი ცქერით გამოწვეული სიამოვნება ჩემი სათაყვანებელი კომპოზიტორის მუსიკის ფონზე არასდროს დამთავრებულიყო!

ახლა ზუბინ მეტას ვნახავ შერატონში, ისრაელ ფილარმონიკია ჩამოსული, ილია კონოვალოვიც აქაა, შუა დღეს ნიუ-იორკ ფილარმონიკის კონცერტზე მივდივარ, მერე ძალიან მნიშვნელოვანი შეხვედრები მაქვს საერთაშორისო პროდიუსერებთან და მენეჯერებთან, ხვალ კი ვენის ფილარმონიული ორკესტრის შესრულებით მალერის მე-4 სიმფონიას მოვისმენ კარნეგი-ჰოლის დიდ დარბაზში... მანამდე ანიტას სპექტაკლები იყო მეტროპოლიტენში, მერე ჩვენი კონცერტი, რომლის სტრატეგიული შედეგები საკმაოდ დიდი გამოდგა...

ყოველივე ამის ფონზე ქართული რეალობა ჩემს გარშემო და არამარტო ჩემს გარშემო ძალიან მტკენს გულს, ძალიან... იმდენად, რომ ხანდახან მინდა დავივიწყო ყველაფერი და ცხოვრება ხელახლა დავიწყო... ყველას, ვისაც გიხარიათ ჩემი ნიუ-იორკული ამბები დიდ მადლობას და სიყვარულს გითვლით!!!", - წერს მენანიშვილი.