9
მაისიდღის ზოგადი ასტროლოგიური პროგნოზი
უკრაინაში მიმდინარე მოვლენებს ქართული შოუბიზნესის წარმომადგენლებიც გამოეხმაურნენ. რამდენიმე დღის წინ ინტერნეტით მომიტინგეების მხარდამჭერი ვიდეორგოლიც გავრცელდა. უკრაინელებს სოლიდარობას მომღერალი ნინი ბადურაშვილიც უცხადებს.
- როგორც მთელი საქართველო, მეც მხარს ვუჭერ უკრაინელ ხალხს. სიამოვნებით ჩავიდოდი იქ და მათ გვერდით დავდგებოდი, თუნდაც ამ სიცივეში. გაოცებული ვარ ამ ადამიანების გმირობით და ერთსულოვნებით.
- როგორც ჩანს, ჩვენს მეგობარ ქვეყანაში მიმდინარე მოვლენებს თვალს ადევნებ.
- 24 საათი ნამდვილად არ მაქვს ჩართული ტელევიზორი, მაგრამ შეძლებისდაგვარად ვეცნობი იქაურ ამბებს.
- უკრაინაში მიმდინარე პროცესებს რომ აპროტესტებ, კარგია, მაგრამ 26 მაისს თბილისში მომხდარზე რატომ არ გაგიჩნდა პროტესტი?
- ამაზე ახლა ვერა, ოდესმე კი აუცილებლად ვილაპარაკებ...
- გამოდის, რაღაც გაქვს სათქმელი...
- 26 მაისს მომხდარს ძალიან განვიცდი. ჩემდა სამწუხაროდ, წინა დღეს ადრე დავიძინე და 26 მაისის დილას ბევრი რამ არ ვიცოდი. ეს ყველაფერი მოგვიანებით გამოაშკარავდა, ვწუხვარ... იმ დღეს ჩემს გამოსვლას და საქართველოს ჰიმნის შესრულებას საზოგადოების მხრიდან აგრესია მოჰყვა, შესაძლოა, რაღაც კუთხით ეს სწორიც არის, მაგრამ ეს იყო საქართველოს დამოუკიდებლობის დღე და მე შევასრულებდი თუ ორკესტრი დაუკრავდა, ჰიმნი ხომ მაინც შესრულდებოდა?! Uუბრალოდ, მე ვერ ამიტანეს, იმიტომ, რომ იმ წამს მიშა სააკაშვილის გვერდით ვიდექი. მე ვარ აპოლიტიკური ადამიანი, აქედან გამომდინარე, თავს მოვალედ ვთვლიდი, მემღერა 26 მაისს, თანაც, მე ხომ მხოლოდ საქართველოს ჰიმნი შევასრულე! თუმცა, რომ მცოდნოდა, ღამით რაც მოხდა, შესაძლოა სხვანაირად მოვქცეულიყავი...
- შეიძლება არ გემღერა?
- რომ გამეგო, 26 მაისს ამდენი სისხლი დაიღვარა, შესაძლოა თავი შემეკავებინა. თუმცა ვფიქრობ, იქ საქართველოს ჰიმნი უნდა შესრულებულიყო. მე ხომ გართობაზე, ბუშტებზე, ახალ წელსა და სიყვარულზე არ მიმღერია?! დილის 7 საათზე ავდექი, ჩავიცვი და წავედი ჰიმნის შესასრულებლად, შინ დაბრუნებულს კი საშინელება დამხვდა... კი მაგრამ, თქვენ ხომ უკრაინაში განვითარებულ მოვლენებზე გაინტერესებდათ ჩემი აზრი, 26 მაისზე რატომღა მეკითხებით? ახალი სკანდალის აგორება გინდათ?
- უბრალოდ, ეს მოვლენები ემთხვევა ერთმანეთს, იქაც სისხლი დაიღვარა და აქაც...
- კი ბატონო, მაგრამ ხვალ რომ გამოვიდეს ვინმე და იმღეროს უკრაინის ჰიმნი, არ ჩავქოლავ, თუმცა გამიჩნდება შეკითხვა, რატომ შეასრულა?
- ხომ არ ნანობ, 26 მაისს რომ იმღერე?
- მსხვერპლიანი და ცუდი ღამე იყო. ვნანობ, რა თქმა უნდა, მაგრამ კიდევ ვიმეორებ, საქართველოს დამოუკიდებლობის დღეს საქართველოს ჰიმნის შესრულება, არა მგონია, დანაშაული იყოს, უბრალოდ, ჯოხი ჩემზე გადატყდა. 26 მაისის თემა ჩემთვის ძალიან მტკივნეულია და ამაზე კონკრეტული პასუხი დღემდე არ მაქვს. სამწუხაროდ, მაშინ არ ვიყავი მოვლენების ეპიცენტრში... მგონია, რომ ახალი სკანდალის აგორება გინდათ ჩემზე და რატომ, არ ვიცი.
- ფიქრობ, რომ სპეციალურად გხვევენ სკანდალებში ჟურნალისტები?
- როგორ შეიძლება სხვანაირად ვიფიქრო, როცა ამდენ სისულელეს ვკითხულობ ჩემზე? ამის ატანა უკვე შეუძლებელია. თუ კიდევ სკანდალის აგორებას აპირებთ, გთხოვთ, თავი შეიკავოთ და არაფერი დაწეროთ...
- როგორც ვიცი, თქვენი ყოფილი მეუღლე, ირაკლი კუტალაძე ჩამოვიდა თბილისში ბავშვის მოსანახულებლად, რაზე ისაუბრეთ თქვენ და ირაკლიმ?
- აღარ მინდა ამ თემებზე ლაპარაკი. ჩემს ქმართან რაზე ვისაუბრე, რაში გაინტერესებთ?
- დაამთავრეთ ურთიერთობა?
- არ ვიცი. გაკმაყოფილებთ პასუხი?
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
