7
მაისიდღის ზოგადი ასტროლოგიური პროგნოზი
პროექტ "ცეკვავენ ვარსკვლავების" მოცეკვავე, ჯულიანა ბარგნარი, მართალია, კულინარობით ვერ დაიკვეხნის, რადგან დროის უმეტეს ნაწილს თავის საქმიანობას უთმობს, მაგრამ პიცის კეთება კარგად გამოსდის, უყვარს ტკბილეული და მეგობრებთან ერთად ბუნებაში ყოფნა.
- ცუდი კულინარი ვარ, რადგან მთელ დღეს რეპეტიციაზე ვატარებ და სახლში მისვლისას უცებ რაიმეს თუ გავაკეთებ, ისიც პიცაა. ძირითადად, დედას მომზადებული საჭმელი მხვდება, ის შესანიშნავი კულინარია. ყველაზე მეტად ქართული სამზარეულო მიყვარს, განსაკუთრებით, ხინკალი, მწვადი, ასევე, "ოსტრი".
გვარის წარმოშობა და ტრადიციული კერძი
- ბარგნარი ასურული გვარია. ასურელების ერთ-ერთი ტრადიციული კერძი "ჰარისა" გახლავთ. იგი ქათმისა და ხორბლისგან კეთდება. ეს ყველაფერი მთელი ღამის განმავლობაში იხარშება და ერთგვაროვან მასად იქცევა და გემრიელი გამოდის. ვინაიდან დიდი ხანია თბილისში ვცხოვრობთ, აქ დავიბადე და გავიზარდე, მთლიანად აქაურ ტრადიციებს მივყვებით.
მოგზაურობა და სამზარეულო
- შარშან, აპრილში დიდ ტურნირზე ვიყავით უკრაინაში, იქ ერთი კვირა გავჩერდით, ძირითადად, ბარებში ვიკვებებოდით და ყველაზე მეტად "ბორშჩი" მომეწონა, უგემრიელესია, მისი მსგავსი არსად მიჭამია. კიევური კატლეტიც ძალიან კარგია. თურქეთში რომ ვისვენებდით, მექსიკური სამზარეულო დავაგემოვნე და ძალიან მომეწონა, რაღაცით ქართულს მივამსგავსე. ცხარე კერძები მიყვარს, სადაც სანელებლები და "სპეციები" უხვადაა. მექსიკური კი სწორედ ასეთია. ქართული სამზარეულო და კულტურა განსაკუთრებულია. სხვადასხვა ქვეყანაში მოგზაურობისას, განსაკუთრებული შთაბეჭდილება ჩემზე ბლეკფულმა მოახდინა. ინგლისმა, ლონდონმა, სადაც ერთი დღე გავჩერდით, ჩემზე დიდი შთაბეჭდილება მოახდინა, იქაურობა ულამაზესია, თავისი არქიტექტურით, ქუჩებით. იქ რესტორნებსა და კაფეებში არ ვყოფილვართ, სასტუმროში ვიკვებებოდით და ძირითადად, სოსისი, ბურგერი და სტანდარტული საჭმელები იყო. მაგალითად, დილით ჩაი, ყავა, ფაფა და ა.შ. მოჰქონდათ, სადილზე - სოსისი, კატლეტი გარნირით ან რაიმე სხვა, საღამოს კი ჩაი ნამცხვრით და ა.შ. დიდი გემოვნებით არ გამოირჩეოდა, საქართველოში ხილსაც სხვა გემო აქვს, კერძებსაც და ტკბილეულსაც.
სლოვენია და მოსკოვი
- უკრაინიდან სლოვენიაში წავედით. იქ პირველ რიგში, ყურადღება სისუფთავემ მიიქცია, გამორჩეულია დონით და მომსახურების მხრივაც, ბუნება კი შესანიშნავია, ორი დღე სასტუმროში ვცხოვრობდით. როდესაც კონკურსზე მიდიხარ, იმის დრო და საშუალება არ არის, რომ ქალაქი კარგად ნახო. ნამდვილი სპორტსმენები კონკურსზე მობილიზებულები არიან და ამის დრო არ აქვთ. მოსკოვშიც ნამყოფი ვარ, ქალაქი გავლით დავათვალიერე, ლამაზი ცენტრია და ძალიან მომეწონა. სასტუმროებში ძირითადად ისეთი საკვებია, რომ ყველასთვის მისაღები იყოს, ნეიტრალური. როცა ვნერვიულობ, ძალიან ცოტას ვჭამ, კონკურსის დროს კი, ბუნებრივია, შინაგანად ვღელავ.
კვების რეჟიმი
- კვების ცუდი რეჟიმი მაქვს. თუმცა დილით აუცილებლად კარგად უნდა ვჭამო, რადგან შიმშილი ჩემს ხასიათზე ძალიან მოქმედებს. ბანალური ფრაზა - კაცის გულისკენ გზა კუჭზე გადისო, ქალზეც ასეა (იცინის). როცა მშია, ცუდი განწყობილება მაქვს. მთელი დღე გადარბენაზე ვარ და თუ სადმე რამე მოვახერხე და შევჭამე, ხომ კარგი, მაგრამ სახლში მისვლისას, ღამის პირველი საათიც რომ იყოს, ძალიან ბევრს მივირთმევ. როცა ბევრ ენერგიას ხარჯავ, კარგად რომ არ იკვებო, გამოიფიტები. ამიტომ, დიეტა რომ დავიცვა, ჩემგან აღარაფერი დარჩება (იცინის).
ტკბილეული
- შემიძლია, მთელი დღე ტკბილეულზე ვიყო და საჭმელი არ ვჭამო. კარგი ხარისხის შოკოლადი მიყვარს, ყოველგვარი დანამატების გარეშე ან თხილით. საზღვარგარეთ ყოფნისას, დუტყ ფრეე-ში ბევრ კანფეტს ვყიდულობ ხოლმე და მერე თვითმფრინავში მივირთმევ.
სასმელი
- სასმელი არ მიზიდავს, ერთი-ორჯერ რომ დავლიე, ჩემზე უარყოფითად იმოქმედა და სურვილი აღარ გამჩენია, კიდევ დამელია. როცა სპორტსმენი ხარ, სასმლის გამო ერთი ან ორი დღის ამოვარდნა არანაირად არ გიღირს. არაყი ან რამე მაგარი არ მსიამოვნებს, უფრო, ქალური სასმელი - მარტინი, ლიქიორი და ა.შ. ამაზეც არ ვგიჟდები. გართობა მეგობრების წრეში, ალკოჰოლის გარეშე მირჩევნია. მეგობრები - ძირითადად, თანაკლასელები და ის ადამიანები, ვისთან ერთადაც გავიზარდე, ვცდილობთ, სადმე ბუნებაში გავიდეთ ხოლმე და მარტოებმა ქალაქის ხმაურისგან დავისვენოთ. დატვირთული რეჟიმის გამო, უპირატესობას წყნარ და მშვიდ დასვენებას ვანიჭებ.
თამთა დადეშელი
(გამოდის ხუთშაბათობით)
