8
მაისიდღის ზოგადი ასტროლოგიური პროგნოზი
ჩვენი რესპონდენტი ამერიკაში მცხოვრები ქართველი პარაშუტისტი ნათია მამაიაშვილია. ნათია ერთადერთი ქართველი ქალია, რომელიც ლიცენზირებული პარაშუტისტია. ნათია პროფესიით საერთაშორისო ურთიერთობების სპეციალისტი და პიანისტია.
- ნათია, რატომ გადაწყვიტე პარაშუტისტობას დაუფლებოდი?
- 14 წლის ვიყავი, როცა თვითმფრინავით პირველად ვიმგზავრე. მაშინ მივხვდი, რომ ფრენა ჩემთვის უდიდესი სიამოვნება იყო. 2011 წელს გადავწყვიტე, თვითმფრინავიდან პროფესიონალ პარაშუტისტთან ერთად გადმოვმხტარიყავი. პატარა თვითმფრინავით, დაახლოებით, 4 კილომეტრის სიმაღლეზე ავედით და იქიდან პროფესიონალთან ერთად გადმოვხტი. ერთი წუთი თავისუფალი ვარდნით მიფრინავ, ეს ძალიან დიდი სიამოვნებაა, ამის შემდეგ პარაშუტს პროფესიონალი ხსნის, ამაზე შენ არ ღელავ. დაშვების პროცესი დაახლოებით 5-7 წუთი გრძელდება. მაშინ ვიგრძენი ყველაზე დიდი თავისუფლება და სიამოვნება. ვერ გადმოვცემ, ეს რა მაგარი შეგრძნებაა.
- არ შეგეშინდა?
- როცა თვითმფრინავის კარი გაიღო, ცოტა შემეშინდა, მაგრამ როგორც კი გადახტები, არაფერზე ფიქრობ და ეს არის ყველაზე დიდი ბედნიერება. ამის შემდეგ გადავწყვიტე, გავმხდარიყავი პროფესიონალი სპორტსმენი, გავიარე შესაბამისი კურსები, რაც პარაშუტისტის ლიცენზიისთვის არის საჭირო და პირველი ლიცენზირებული პარაშუტისტი ქალი ვარ საქართველოში. ლიცენზიის მოსაპოვებლად 25 ნახტომი გჭირდება. ამ შემთხვევაში უკვე მარტო ხტები. თავიდან გვერდით ორი ინსტრუქტორი მოგყვება, ხელს გიშვებენ და პარაშუტს თვითონ შლი. რასაც თეორიულად გასწავლიან, უკვე პრაქტიკაში იყენებ. პირველად ეს ძალიან ძნელია, ყველაფერი ამინდზეა დამოკიდებული, უნდა იცოდე, პარაშუტი როგორ დასვა, რა გააკეთო. შემდეგში უკვე მარტოს გიწევს გადმოხტომა, ინსტრუქტორების გარეშე. ერთხელ დროზე ადრე გავხსენი პარაშუტი, მაგრამ, საბედნიეროდ, გადავრჩი.
- გარდა იმისა, რომ პარაშუტი შეიძლება არ გაიხსნას, კიდევ რა მხრივაა სახიფათო თვითმფრინავიდან გადმოხტომა?
- საფრთხე ყოველთვის არსებობს, მაგრამ ამაზე არც ვფიქრობ. პირველ რიგში, საკუთარი თავის მჯერა. ახლანდელი პარაშუტები დამოუკიდებლადაც იხსნება. ბევრჯერ გადმოვმხტარვართ მეგობრები ერთად, თანაც ხელჩაკიდებულები, მაგრამ ვიცით, შემდეგ რა მანძილით უნდა დავშორდეთ ერთმანეთს ცაში. ერთობლივი გადმოხტომა ძალიან საშიშია, რადგან ამ დროს თუ ზუსტ მანძილს არ დაიცავ, შეიძლება პარაშუტები ერთმანეთზე გადაიხლართოს და ხტომა ფატალურად დასრულდეს.
- საკუთარი პარაშუტი გაქვს?
- დიახ, მაქვს. შეიძლება გაგიკვირდეთ, მაგრამ პარაშუტი მანქანაზე ძვირი ღირს, დაახლოებით, 8.000 დოლარი. მე გამიმართლა: რომ ნახეს, ასე მიყვარს პარაშუტით ხტომა, მაჩუქეს.
- რა მიღწევები გაქვს სპორტის ამ სახეობაში?
- რაც უფრო მაღლა ხარ, თავისუფალი ვარდნის უფრო მეტი დრო გაქვს და პარაშუტსაც უფრო გვიან ხსნი. გGადმოვმხტარვარ დაახლოებით 5 კილომეტრის სიმაღლიდან, ამაზე მაღლა უკვე ვეღარ სუნთქავ, ჟანგბადის ნიღბის გაკეთება დაგჭირდება. სულ ცოტა ხნის წინ დავბრუნდი დუბაიდან, სადაც შევხვდი მსოფლიოში სახელგანთქმულ პარაშუტისტ რობერტა მანჩინის, მქონდა ბედნიერება, მასთან ერთად მეფრინა.
- საქართველოში დროებით ჩამოხვედი, თუ აქ რჩები საცხოვრებლად?
- ნიუ-იორკში მაქვს დამთავრებული საერთაშორისო ურთიერთობების ფაკულტეტი. ვიფიქრე, საქართველოში ვიპოვიდი სამსახურს, მაგრამ ჯერ არავინ შემხმიანებია.
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
