სამცხე-ჯავახეთის სამმართველოს უფროსს პატიმრის მეუღლესთან ჰქონდა რომანი

შინაგან საქმეთა სამინისტროს სამცხე-ჯავახეთის სამხარეო მთავარი სამმართველოს უფროსად თეიმურაზ კალანდაძე 26 ნოემბერს დაინიშნა. თუმცა მან მიმდინარე წლის 28 იანვარს შს სამინისტროს გენერალური ინსპექციისგან უღირსი საქციელისთვის სასტიკი საყვედური მიიღო. საქმე, კალანდაძის გამომძიებელად მუშაობის პერიოდში, ერთ-ერთი პატიმრის მეუღლესთან სასიყვარულო ურთიერთობას ეხება.

პატიმრის მეუღლე, რომელიც ვინაობის გამხელისგან თავს იკავებს, კალანდაძის საქმის შესახებ "სამხრეთის კარიბჭესთან" დეტალურად ჰყვება. მისი თქმით, კალანდაძე, რომელიც მისი მეუღლის საქმეს იძიებდა, ქალბატონის მიმართ ყურადღება თავიდანვე იმ მიზეზით იჩენდა, რომ ქმრის გარეშე დარჩენილი მარტოხელა დედა ეცოდებოდა. მათ შორის სასიყვარულო მიმოწერა 7 თვეს გაგრძელდა, შემდეგ კი, ქალბატონის თქმით, კალანდაძემ მობილური ტელეფონები გამორთო, სამუშაო ადგილი შეიცვალა და მასთან დაკავშირება შეუძლებელი გახდა. გარკვეული პერიოდის შემდეგ, პატიმრის მეუღლემ კალანდაძეს ახალ სამსახურში მიაკითხა, თუმცა გამომძიებელმა მასთან შეხვედრა არ ისურვა. რის გამოც ქალბატონმა გამომძიებლის წინააღმდეგ განცხადება პროკურატურაში 2012 წლის 15 ნოემბერს დაწერა. ქალბატონი ფიქრობს, რომ კალანდაძემ მასზე შური პატიმრის გამო იძია.

"ჩემი მეუღლე გამოძიებასთან არ თანამშრომლობდა, როცა გამომძიებელი მასთან შედიოდა, ეუბნებოდა, რაც გინდათ დაწერეთ და რამდენიც გინდათ მომისაჯეთ, ხმის ამომღები არ ვარო, საქმე ჩაუგდო კალანდაძეს. ეს ჰქონდა გულში და ასე მეც ამიტომ მომექცა", - აცხადებს პატიმრის მეუღლე.

თავად თეიმურაზ კალანდაძე აცხადებს, რომ მის მომჩივან პატიმრის მეუღლეს არ იცნობს.

იხილეთ ვრცლად

”სამხრეთის კარიბჭე”