დავით ზურაბიშვილი - "დიპკორპუსის ინფორმირება საკმარისი იყო იმის ილუსტრირებისთვის, რომ სექსუალურ ძალადობას სისტემატური ხასიათი ჰქონდა"

განათლებისა და მეცნიერების მინისტრის მოადგილე, დავით ზურაბიშვილი მიიჩნევს, რომ ელჩებთან პრეზენტაციის შემდეგ ჟურნალისტებისთვის სკანდალური კადრების ჩვენება უკვე აღარ იყო საჭირო, - ამის შესახებ დავით ზურაბიშვილი სოციალურ ქსელ "ფეისბუქში", საკუთარ გვერდზე წერს.

"დიპლომატიური კორპუსის ინფორმირება სავსებით საკმარისი გახლდათ იმის ილუსტრირებისთვის, რომ სექსუალური ძალადობა სისტემატურად გამოიყენებოდა წინა ხელისუფლების რეპრესიული აპარატის მიერ. აი, ჟურნალისტებისთვის კინოსეანსის მოწყობას რა აზრი ჰქონდა, მე პირადად აზრზე არა ვარ. დიპკორპუსთან შეხვედრის შემდეგ ძალადობის ფაქტების უარყოფას ყველაზე ორთოდოქსი მიშისტებიც ვერ შეძლებდნენ, ის კი არ უნდა ყოფილიყო რთული მისახვედრი, რომ ჟურნალისტებისა და არასამთავრობოების მოწვევა მხოლოდ კინკლაობას და ხმაურს გამოიწვევდა და მთელი აქცენტები (ბოდიში კვესიტაძის ალუზიისთვის) სულ სხვა საკითხებზე გადანაცვლდებოდა",-წერს ზურაბიშვილი.

"ინტერპრესნიუსი"