11
მაისიდღის ზოგადი ასტროლოგიური პროგნოზი
თბილისის საქალაქო სასამართლომ შინაგან საქმეთა მინისტრის ყოფილ პირველ მოადგილე გელა ხვედელიძეს აღმკვეთი ღონისძიების სახით გირაო შეუფარდა. საქალაქო სასამართლოს მოსამართლის გადაწყვეტილებით, ხვედელიძე 5 ათასი ლარის გირაოს გადახდის შემდეგ გათავისუფლდება.
თბილისის საქალაქო სასამართლოში შს მინისტრის ყოფილი მოადგილის, გელა ხვედელიძისთვის აღმკვეთი ღონისძიების შეფარდების საკითხი ხვედელიძის გარეშე განიხილეს. პროცესზე ბრალდებული არ მიუყვანიათ.
აღსანიშნავია, რომ პროკურატურა ხვედელიძისთვის აღმკვეთი ღონისძიების სახით პატიმრობის შეფარდებას მოითხოვდა.
შსს-ს მინისტრის ყოფილ პირველ მოადგილე გელა ხვედელიძეს ბრალი სისხლის სამართლის კოდექსის 157-ე მუხლის მე-3 ნაწილის "დ" პუნქტით წაუყენეს, რომელიც სამსახურებრივი მოვალეობის გამოყენებით პირად ცხოვრებაში უხეშ ჩარევას გულისხმობს და ისჯება ჯარიმით ან თავისუფლების შეზღუდვით ვადით სამ წლამდე, ანდა თავისუფლების აღკვეთით ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.
მინისტრის პირველი მოადგილე გელა ხვედელიძე შინაგან საქმეთა სამინისტრომ 12 მაისს პირადი საიდუმლოების ხელყოფის ბრალდებით დააკავა.
გელა ხვედელიძეს ბრალად ედება ჟურნალისტ გიორგი ფარესიშვილის პირადი ცხოვრების ამსახველი ვიდეომასალის გავრცელება, რომელიც სოციალურ ქსელში რამდენიმე დღის წინ გამოქვეყნდა.
