"ვიცე მისტერ ვალენტინი" გეების შემოტევას იგერიებს

მოდელი მამაკაცი საქართველოში პოპულარულ პროფესიად ნამდვილად არ მიიჩნევა, თუმცა ბოლო დროს ამ სქესს ხშირად ვხედავთ პოდიუმზე, სხვადასხვა კონკურსზე. დღეს ერთ-ერთი მათგანი, სააგენტო "ლუქ მოდელსის" მოდელი, მახო მაჭარაშვილი მინდა გაგაცნოთ. 19 წლის მოდელმა ბოლო დროს ორ კონკურსში Best model look of Georgia და "მისტერ ვალენტინში" მიიღო მონაწილეობა და ორივეში მეორე ადგილის მფლობელი გახდა. ორივე კონკურსს ვესწრებოდი და მინდა გითხრათ, მის ყოველ გამოსვლას გოგონების აპლოდისმენტები, სტვენა და კივილი მოჰყვებოდა ხოლმე.

-  მახო, ორივე კონკურსზე მეორე ადგილი აიღე.

-  რატომღაც მეორე ადგილებში მიმართლებს. თან ორივე კონკურსი 13 რიცხვში ჩატარდა. არადა, მანამდე ეს რიცხვი ჩემთვის იღბლიანი იყო.

-  სამოდელო ბიზნესში როგორ მოხვდი?

-  სრულიად შემთხვევით. მანამდე აქტიურად მივყვებოდი სპორტს. დავდიოდი ტანვარჯიშზე, მერე ვჭიდაობდი. მოდელ ძმაკაცს გავყევი კასტინგზე. იქ მნახა ნინო ცქიტიშვილმა და თავის სააგენტოში მიმიწვია. ერთ კვირაში ჩვენებაზე გავედი, მოუმზადებელი, მაგრამ კარგად გავართვი თავი.

-  სწავლობ სადმე?

-  არა, სკოლა დავამთავრე თუ არა, ჯარში გამომიძახეს. მანამდე საატესტატო გამოცდებისთვის ვემზადებოდი, ეროვნული გამოცდები არ ჩამიბარებია. თან ის პერიოდი დაემთხვა, რომ ნინო ცქიტიშვილი საბუთებს მიკეთებდა, სააგენტოდან საზღვარგარეთ უნდა წავსულიყავი. კისერზე სვირინგი მქონდა, ვარსკვლავი. ამ სვირინგის გამო ჯარში სენაკში მიშვებდნენ. წელიწადი და სამი თვე იქ უნდა ვყოფილიყავი.

-  რატომ?

-  სადაც ახლა ვარ, ელიტური ქვედანაყოფია. მინისტრი, ატაშე მოდიან ხშირად და ჯარისკაცის კისრიდან ვარსკვლავი ძალიან ანათებდა (იცინის). მომთხოვეს, მოიშორეო. მოვიშორე, ლაზერით ამოვიწვი. ნინო ცქიტიშვილის მეუღლემ, ვატო ნაცვლიშვილმა გამიწია რეკომენდაცია და ახლა კარგ ადგილზე ვარ. საავიაციო ბრიგადაში, სამხედრო აეროპორტში.

-  საქართველოში არც ისე პოპულარული პროფესია აგირჩევია, არამხოლოდ ფინანსური თვალსაზრისით.

-  მანამდე მოდელ მამაკაცებთან მეც იგივე დამოკიდებულება მქონდა, როგორც დღეს უმრავლესობას. როცა ყველაფერში გავერკვიე, სასირცხვილო არაფერია. რა არის მოდელის პროფესია? რომელიმე ბრენდს ან დიზაინერს რეკლამას უკეთებ. თავის წარმოჩენაც არ მეთაკილება. ამ სფეროდან არაერთი შემოთავაზებაsalesland.ge - ფასდაკლებების სამყარო! მქონდა, ვიდრე მოდელი გავხდებოდი და ყოველთვის უარს ვამბობდი. მერე მივხვდი, რომ ხალხის თვალით არ უნდა ვიცხოვრო. უნდა გამოვიყენო ყველა შანსი, რასაც ღმერთი მაძლევს. ცუდს არაფერს ვაკეთებ. ვინც მიცნობს და ვინც იცის, როგორ ვცხოვრობ, ცუდად არ მაფასებენ.

-  მეგობრებს, ოჯახის წევრებს, ახლობლებს რა დამოკიდებულება აქვთ შენს პროფესიასთან?

-  ნორმალური. ვისაც ცუდი დამოკიდებულება აქვს, მათ არ ვიცნობ და არც მაინტერესებს მათი აზრი. საზღვარგარეთ მოდელ ბიჭებს ასე არ უყურებენ. მე თან ჯარისკაცი ვარ, თან მოდელი, ჩემთვის ორმაგად ძნელია იმ სტერეოტიპის დანგრევა, რომელიც მოდელების გარშემოა ჩამოყალიბებული.

-  როგორ მოხვდი კონკურსზე Best model look of Georgia?

-  ზალიკო ბერგერი შემხვდა და მკითხა, ამა და ამ კონკურსზე არ გადიხარო? კასტინგები უკვე დაწყებული ყოფილა. გაგიწევ რეკომენდაციას და მიდიო, მითხრა. მივედი. ჩემ თავზე ლაპარაკი არ მიყვარს, მირჩევნია, სხვებმა შემაფასონ, მაგრამ არ შემიძლია, არ აღვნიშნო, რა თვალებით მიყურებდნენ კონკურსანტები. არ ესიამოვნათ, კონკურენტი რომ გამოუჩნდათ. კულუარებში თავიდანვე ლაპარაკობდნენ, რომ გამარჯვების ორი რეალური კანდიდატი ვიყავით მე და ბესო ქრისტესიაშვილი, რომელმაც გაიმარჯვა კიდეც. რა ვუყოთ, ჟიურიმ ასე გადაწყვიტა. თან ბესომ კონტრაქტი გააფორმა კონკურსის ორგანიზატორთან და... ასე ხდება საქართველოში, სამწუხაროდ.

-  მაშინ უკმაყოფილება არ გამოგიხატავს.

-  არ მიღირდა. საქართველოში პრეტენზიის გამოხატვა არ ღირს. ვიცი, რა დონეც არის და გული არ მწყდება არაფერზე. არაფერს მომცემდა სკანდალები, რისთვის გავიფუჭო ადამიანებთან ურთიერთობები. აქ მოდელს, როგორც ხორცის ნაჭერს, ისე უყურებენ. ძალიან ბევრი მეგობარი მყავს, რომლებიც საზღვარგარეთ ამ ბიზნესში მუშაობენ და ისეთი კონტრაქტები და პირობები აქვთ, აქაურს რომ ვადარებ, სასაცილოდაც არ მყოფნის. "მისტერ ვალენტინზეც" რომ გავედი, ამასაც ვნანობ. არ იყო იმ დონის კონკურსი, რომ ვინმე ჩემი სააგენტოდან გასულიყო. ნინომ იცის, რა დონეა საქართველოში და აქ თავის მოდელებს არ ამუშავებს. არც ტყუილ დაპირებებს იძლევა, რომ გაპიარდები, ცნობილი სახე გახდები და ა.შ. ცქიტიშვილს ევროპულ სააგენტოებთან აქვს კავშირები და იქ უშვებს სამუშაოდ თავის მოდელებს. ჯარის დამთავრებას ველოდები და აქედან წავალ.

-  "მისტერ ვალენტინის" მონაწილეებზე, შენს კონკურენტებზე რას იტყვი?

-  საკუთარ თავს ყოველთვის მინიმალურად ვაფასებ, მაგრამ მონაწილეები თვითონ მეუბნებიან, ჩვენი კონკურენტი ხარო. ბევრი არ მომწონდა, ბავშვურები იყვნენ. სხვა მხრივ არ იყო ცუდი სიტუაცია, წინა კონკურსისგან განსხვავებით, კონკურსანტებში დაძაბულობა არ შეინიშნებოდა.

-  გამარჯვებული მოგეწონა?

-  ბერდია თოფურია არ არის ცუდი ბიჭი, მაგრამ უკმაყოფილო იცი, რით ვარ, მე რომ არაფერი ვთქვა, ხალხმა ნახა, იქ რაც მოხდა.

-  მე იქ ვიყავი და ვერ ვნახე. იქნებ, დააკონკრეტო, რას გულისხმობ?

-  არ მინდა ამ თემაზე ლაპარაკი. სკანდალები არ მიყვარს. უკმაყოფილო ვარ და ამით დავამთავროთ. ამბობდნენ, კონკურსი ჩაწყობილია, მახო მაჭარაშვილი იგებსო. ხომ ნახეთ, ასე არ იყო. ჩაწყობა მართლა არ ვიცი, როგორ ხდება. ფული უნდა გადამეხადა?

-  ჩაწყობა მაგას ნიშნავს.

-  მეორე ვარიანტიც არის, კონტრაქტზე იმ სააგენტოს უნდა მოუწერო ხელი, რომელიც კონკურსს ატარებს. მე არც ერთი არ გამიკეთებია. ასეთი ტიტულის დედაც ვატირე!

-  რისი თქმა გინდა, ბერდია თოფურია კონკურსის ორგანიზატორის, კახი ხაბეიშვილის სააგენტოს მოდელია?

-  არა, ბერდია თავისუფალი მოდელია.

-  აბა, ფული გადაიხადა?

-  არა მგონია. ბერდია მართლაც ძლიერი კონკურენტი იყო. კარგი ბიჭია, სიმპათიური. უბრალოდ, სამოდელო სფეროში გამოცდილება არ ჰქონდა. ბიჭები დავეხმარეთ. ჩვენ ვახლობლობთ, ჩემთანაც იყო სახლში სტუმრად. ნამდვილად კარგი ადამიანია.

-  ამ ორი კონკურსის შემდეგ ალბათ შენი თაყვანისმცემლების, "ფეისბუქზე" მეგობრობის მსურველთა რიცხვმა იმატა.

-  "მისტერ ვალენტინის" მეორე დღეს ჯარში ვიყავი, მესამე დღეს "ფეისბუქზე" რომ შევედი, გადაწითლებული დამხვდა იქაურობა. წერილებს მწერდნენ. გეების რიცხვმაც იმატა. გოგოს ფოტოებით მიმატებდნენ და ბოლოს მიტყდებოდნენ, რომ ბიჭები იყვნენ და ამ კონკურსზე მნახეს. დიდი ძალისხმევა დამჭირდა, რომ მათი შემოტევა მომეგერიებინა (იცინის), მაგრამ ჩემი "ფეისბუქი" "დავალაგე".

-  შენს თაყვანისმცემელ გოგონებს, ალბათ დააინტერესებთ, თავისუფალია თუ არა მახო მაჭარაშვილის გული.

-  შეყვარებული არ მყავს. საცოლე მყავდა, მაგრამ... ბოლო დროს ერთმანეთს ვერ ვუგებდით. ხშირად ვჩხუბობდით. დავშორდებოდით, მერე ისევ შევრიგდებოდით. ჩემი პროფესია არ მოსწონდა, ის, რომ ბევრ გოგონასთან ვტრიალებდი, რომ ვიღაც თბილად მკოცნიდა მისალმების დროს. ეჭვიანი მეც ვარ, თუ საბაბი მექნება. მოსაბეზრებლად ეჭვიანი არ ვარ, ურთიერთობაში მთავარი ნდობაა.

-  რას მეტყვი გეგმებზე?

-  ოთხ თვეში ჯარს ვამთავრებ. ახლა პორტფოლიოს ვაკეთებ. სექტემბერ-ოქტომბერში აქ აღარ ვიქნები. სამოდელო ბიზნესს უნდა გავყვე, ოღონდ არა საქართველოში.

ნინო მჭედლიშვილი

ჟურნალი "რეიტინგი"

(გამოდის ორშაბათობით)