ვანო მერაბიშვილი სოციალურ აგენტებს ბოდიშს უხდის

ყოფილი პრემიერ-მინისტრი ვანო მერაბიშვილი სოციალურ აგენტებს ბოდიშს უხდის.

როგორც დღეს, ქუთაისში, დასავლეთ საქართველოს საოლქო პროკურატურაში ორსაათიანი დაკითხვის დასრულების შემდეგ მერაბიშვილმა აღნიშნა, სოცაგენტები 6 ათას ოჯახში იმყოფებოდნენ და ამის მოწმე მთელი საქართველოა.

"მე გავარკვიე, რომ თურმე ივანიშვილის დავალებით 2 ათასი სოციალური აგენტი დაუკითხავთ. მინდა თითოეულ სოცაგენტს, რომელიც დაკითხეს და რომელსაც დაკითხავენ, ბოდიში მოვუხადო და მადლობა გადავუხადო, რომ მათ შეადგინეს მრავალრიცხოვანი მონაცემთა ბაზა. ისინი 600 ათას ოჯახში იმყოფებოდნენ და ამის მოწმე მთელი საქართველოა", - აღნიშნა მერაბიშვილმა.

"ნაციონალური მოძრაობის" გენერალური მდივნისა და ყოფილი პრემიერ-მინისტრის თქმით, ფაქტია, რომ ეს მთავრობა დასაქმებაზე არ ფიქრობს. გარდა ამისა, მერაბიშვილმა იმედი გამოთქვა, რომ ადრე თუ გვიან საქართველოში მოვა ისეთი მთავრობა, რომელიც იზრუნებს როგორც რიგით მოქალაქეებსა და მათ დასაქმებაზე, ისე საკუთარ პოლიტიკურ ამბიციებს საქართველოს არ გადააყოლებს.

პროკურატურის შენობასთან უკვე დასრულებულია "ნაციონალური მოძრაობის" მხარდამჭერი აქციაც.

"ინტერპრესნიუსი"