26
მარტიდღის ზოგადი ასტროლოგიური პროგნოზი
ლატვია ჩრდილო-ატლანტიკურ ალიანსში საქართველოს ინტეგრაციის მხარდამჭერად რჩება, - ამის შესახებ თბილისში ვიზიტად მყოფმა ლატვიის სეიმის დელეგაციის ხელმძღვანელმა ოიარს ერიკს კარნინსმა განაცხადა, რომელიც კოლეგებთან ერთად ცოტა ხნის წინ სასტუმრო "ქორთიარდ მარიოტში" საქართველოს საგარეო ურთიერთობათა კომიტეტის წარმომადგენლებს შეხვდა.
მან კიდევ ერთხელ დააფიქსირა საქართველოს ევროატლანტიკურ სივრცეში ინტეგრაციის გზაზე საკუთარი ქვეყნის მხარდაჭერა და აღნიშნა, რომ დაგეგმილია კონფერენცია, რომელიც ბალტიისპირეთის ქვეყნებისა და სუამ-ის ეგიდით დაიგეგმება, სადაც საუბრის ერთ-ერთი თემა აღნიშნული საკითხი იქნება.
ამასთან, ლატვიის სეიმის დეპუტაციამ ქართველი კოლეგები საგარეო ურთიერთობათა კომიტეტიდან საპასუხო ვიზიტად ლატვიაში მიიწვია.
რაც შეეხება შეხვედრის მთავარ თემას, განხილვის საგანს წარმოადგენს ორმხრივი საპარლამენტო თანამშრომლობის ფორმატში დაგეგმილი საკითხები, ასევე სამეზობლო თემატიკა.
"ჩვენ ვისაუბრეთ კარგ მეზობლებზე, ცუდ მეზობლებზე, საინტერესო მეზობლებზე. ასევე განვიხილეთ ნატო-სა და ევროკავშირში ინტეგრაციის პერსპექტივებთან დაკავშირებული საკითხები და კონკრეტულად ის, თუ როგორ შეიძლება აღმოჩნდეს ლატვია ამ თვალსაზრისით საქართველოს მხარდამჭერი, - განუცხადა ჟურნალისტებს საგარეო ურთიერთობათა კომიტეტის ხელმძღვანელმა თედო ჯაფარიძემ.
მისივე თქმით, ზოგადად, ბალტიისპირეთის რეგიონი და მათ შორის ლატვია არის ძალიან მნიშვნელოვანი პარტნიორი და მნიშვნელოვანია მისი მხრიდან საქართველოს თანადგომა საერთაშორისო ორგანიზაციებში.
