9
მაისიდღის ზოგადი ასტროლოგიური პროგნოზი
ერთწლიანი პაუზის შემდეგ რუსეთის თავდაცვის უწყებამ საბრძოლო ლაზერების შექმნის პროცესები განაახლა. ლაზერებმა მოწინააღმდეგის ბალისტიკური რაკეტებისა და თვითმფრინავების განადგურება უნდა შეძლონ. არსებული ცნობით, პროექტს კონცერნი "ალმაზ-ანტეი" (ის საზენიტო სისტემებს ქმნის) და წარმოშობით ქართველი კონსტრუქტორ ბერიევის სახელობის სამეცნიერო ტექნიკური საავიაციო ცენტრი შეასრულებენ.
სავარაუდოდ, საუბარი საჰაერო ბაზირების ლაზერზეა, რომელზეც მუშაობა ჯერ კიდევ სსრკ-ში დაიწყეს. სატრანსპორტო თვითმფრინავის ბაზაზე ორი ერთეული ექსპერიმენტული А-60 შექმნეს. გამოცდების პროცესში თვითმფრინავებზე რეალური საბრძოლო ლაზერებიც დამონტაჟდა. ერთ-ერთი თვითმფრინავი აეროდრომზე დაიწვა. მწირი დაფინანსების პირობებში მეორეს გამოცდა გარკვეული ინტერვალებით 2011 წლამდე გაგრძელდა. შემდეგ უფულობის გამო პროექტი საერთოდ დაიხურა.
განახლებული პროგრამის ფარგლებში А-60, რომელსაც 2 წელი არ უფრენია, სრულ მოდერნიზაციას გაივლის. რის შემდეგაც მასზე ახალი ლაზერული სისტემის მონტაჟის პროცედურა დაიწყება.
საჰაერო ბაზირების ლაზერის შექმნა, რომელიც მოძრავი ობიექტების განადგურებას შეძლებს, ბევრი პრობლემის გადაჭრას მოითხოვს. უპირველეს ყოვლისა, ლაზერისთვის ენერგიის მძლავრი წყაროს შექმნაა საჭირო. გარდა ამისა, დასამუშავებელია ლაზერის სხივის დამიზნებისა და ატმოსფერული მოვლენებისგან მისი დაცვის მეთოდები. ამიტომაც, "მფრინავი ლაზერის" ეფექტურობა ათეულობით ფაქტორზეა დამოკიდებული.
მსგავსი ლაზერების შექმნას აშშ-ც ცდილობდა. წლების განმავლობაში შტატებში სატვირთო Boeing 747-ის ბაზაზე შექმნილი "მფრინავი ლაზერი" იცდებოდა. 2010 წელს მორიგი გამოცდებისას ლაზერით მან ორი ბალისტიკური რაკეტა გაანადგურა. თუმცა შემდგომი ორი გამოცდა წარუმატებლად დასრულდა. საბოლოო ჯამში, პროექტზე ათეულობით მილიონი დოლარის დახარჯვის შემდეგ, აშშ-ის თავდაცვის უწყებამ პროექტი არაპერსპექტიულად მიიჩნია და 2011 წელს მისი დაფინანსება შეწყვიტა.
მოამზადა ნუკრი მგელაძემ
