26
მარტიდღის ზოგადი ასტროლოგიური პროგნოზი
ორგანიზაცია Freedom House-ის მიერ გამოქვეყნებულ რეიტინგში -"თავისუფლება ქსელში 2012" (Freedom on the Net 2012) საქართველო მე-14 ადგილს იკავებს. ანგარიშში აღნიშნულია, რომ ქვეყანაში ამ სფეროში ვითარების გამოსწორების ტენდენცია აღინიშნება. ინტერნეტზე თავისუფალი წვდომის რეიტინგში ესტონეთი, აშშ და გერმანია ლიდერობენ.
ანგარიშში ქვეყნები ინტერნეტზე თავისუფალი წვდომის მიხედვით სამ ჯგუფად არიან დაყოფილი - თავისუფლად, ნაწილობრივ თავისუფლად და არათავისუფლად. პირველ ჯგუფში 14 ქვეყანაა შესული. ყოფილი საბჭოთა ქვეყნებიდან მასში უკრაინა (12) და საქართველო (14) მოხვდნენ.
ნაწილობრივ თავისუფალთა ჯგუფში 20 ქვეყანა შევიდა. ყოფილი საბჭოთა ქვეყნებიდან მასში აზერბაიჯანი, ყაზახეთი, ყირგიზეთი და რუსეთი არიან, რომელმაც 30-ე ადგილი დაიკავა.
არათავისუფალი ქვეყნების რეიტინგში 13 სახელწიფოა.
რეიტინგის ლიდერი ესტონეთი ამჟამად ტექნოლოგიურად მსოფლიოს ყველაზე განვითარებული ქვეყანაა. მოსახლეობას ქვეყანაში ხელი ელექტრონულ სერვისზე - "ელექტრონულ მთავრობაზე" მიუწვდება. ინტერნეტქსელში სიტყვის თავისუფლება დაცულია, მაგრამ ესტონეთში კერძო ინფორმაციის დასაცავად მკაცრი კანონები მიიღეს.
აშშ რეიტინგში მეორე ადგილს იკავებს. მიუხედავად იმისა, რომ ამერიკა ინტერნეტში ჩართული მომხმარებლების რაოდენობით უწინდებურად ლიდერია, ინტერნეტის ტარიფები და სიჩქარე არასახარბიელოა. ქვეყანაში ინფორმაციის თავისუფლება არ იზღუდება და არანაირი აკრძალვა არ არსებობს. ამასთან, კანონით მკაცრად აკრძალულია საბავშვო პორნოგრაფია, არსებობს კანონები პირადი ინფორმაციის გამოქვეყნებასთან და საავტორო უფლების დაცვასთან დაკავშირებით.
ლიდერების სამეულს გერმანია ასრულებს. ქვეყანაში სატელეკომუნიკაციო ტექნოლოგიები მაღალ დონეზეა განვითარებული.
პირველ ათეულში ასევე მოხვდნენ: ავსტრალია, უნგრეთი, იტალია, ფილიპინები, დიდი ბრიტანეთი, არგენტინა და სამხრეთ აფრიკის რესპუბლიკა.
Freedom House-ის კვლევის მიხედვით, ყველაზე ცუდად საქმე უზბეკეთში, სირიაში, ჩინეთში, კუბასა და ირანშია.
მომზადებულია freedomhouse.org-ის მიხედვით.
