9
მაისიდღის ზოგადი ასტროლოგიური პროგნოზი
თელავის მუნიციპალიტეტის, სოფელ ქვემო ხოდაშენში გლოვაა. იქ მცხოვრები მამაკაცი და მისი მოზარდი შვილები ტრაგიკულად დაიღუპნენ.
- გარდაცვლილები არიან გია ბურნაძე და მისი 11 და 13 წლის ბიჭები. არსებული ინფორმაციით, მამა-შვილებს ორი დღის განმავლობაში ეძებდნენ და გუშინ იპოვეს. გია ბურნაძე და მისი ორი ვაჟი სტუმრად იმყოფებოდნენ გარდაბნის რაიონში, სოფელ სოფელ ფოლადაანთკარში, სადაც ტბაში დაიხრჩვნენ.
ცნობილი ხდება, რომ ტრაგედია იმ დროს მოხდა, როცა ისინი სათევზაოდ იყვნენ წასულები.
- ადგილობრივები გვიყვებიან, რომ ტბა, სადაც ტრაგედია მოხდა, საშიშია და მის გაუქმებას დიდი ხანია, ითხოვენ. მათივე თქმით, ყველაზე ცუდი ის არის, რომ ტბა სკოლასთან ახლოს არის.
"ჩვენს სოფელში დატრიალდა ეს ტრაგედია. დეტალები არ ვიცი, როგორ მოხდა ეს უბედურება, ვუსამძიმრებ ოჯახს. მოსახლეობა დიდი ხანია, ვითხოვთ ამ ტბის გაუქმებას, ეს არ არის ტბა, ეს არის წყალსაცავი იმისთვის, რომ მოირწყას ჩვენი და კიდევ რამდენიმე სოფელი. არანაირი ნაპირი არ გააჩნია, სიღრმე მინიმუმ 7 მეტრი ექნება და ზედ დგას სკოლა. ახლა სკოლას გაავლეს ღობე, მანამდე სულ ღია იყო, ბავშვები უკან გადიან და ბანაობენ. შეიძლება სკოლის დროს არ გადიან და სკოლა აკონტროლებს სიტუაციას, მაგრამ გაკვეთილების დამთავრების მერე გადადიან იქ ბავშვები და ჩადიან საბანაოდ. ერთი შვილი მყავს და რომ გავიგე იქ იყო ჩასული, ეს ამბავი შოკი იყო ჩემთვის.
ამბობენ, ბავშვები ტრუსებზე და შორტებზე კოკა-კოლის ცარიელ ბოთლებს იმაგრებენ რომ არ ჩაიძირონო. ნაპირი საერთოდ არ აქვს, პირდაპირ ხტებიან წყალში და პირდაპირ შედიხარ სიღრმეში. ადრეც დატრიალდა აქ ტრაგედია. 18 წელია ამ სოფელში ვცხოვრობ. მაშინ მოხდა ასეთი ფაქტი სოფელ გამარჯვებიდან ბავშვები გამოპარულან ველოსიპედით ჩვენს სოფელში, დედას ეგონა ბავშვი ეზოში თამაშობდა. მაშინაც ის ბავშვი ტბაში რომ ჩავარდა გული გაუსკდა და იქვე დაიღუპა 9 წლის იყო. რამდენი ხანია ვითხოვთ მოაწესრიგონ აქაურობა ისე, რომ არ იყოს საფრთხის შემცველი. ჩემი შვილი ორი წელი სწავლობდა იმ სკოლაში და მაშინ დირექტორს ვკითხე, მაძლევთ იმის გარანტიას, რომ გაიპაროს უკან დასვენებაზე, იმ ტბაში არ ჩავარდება-მეთქი.
დავიბარეთ მაშინაც წარმომადგენელი. სოფელი გამარჯვების გამგეობაში შედის და წარმომადგენელსაც ვუთხარი, ეს გააუქმეთ, ან რამე გადააფარეთ ისე, რომ არ იყო საშიში მოსახლეობისთვის და არ შევიდნენ ბავშვები მეთქი. თუ არ იქნება იქაურობა დაცული, მაშინ დააშრონ საერთოდ ეს წყალსაცავი, არ გვინდა ასეთი საშიში ადგილი. ახლა წუხელ გავიგეთ ამ ტრაგედიის შესახებ. უამრავი პოლიციელი იყო მოსული და გავიგეთ, რომ მამა და მისი შვილები დაიხრჩვნენ. ახლა შეწუხდა ხალხი ისევ და ითხოვენ რომ მიხედოს ხელისუფლებამ არ პრობლემას. რუსთავიდან ხალხი ბუნებაში, სათევზაოდაც მოდიან და რომ არ აქვს ნაპირი, არის ძალიან საშიში, რომ ვინმე არ ჩავარდეს, ზოგჯერ ნასვამი ადამიანი შედის. ჯობია გაუქმდეს ეს წყალსაცავი" - ამბობს ჩვენთან საუბარში ადგილობრივი.
წაიკითხეთ ასევე:
