7
მაისიდღის ზოგადი ასტროლოგიური პროგნოზი
ჩემი ფიქრები მილიონობით კათოლიკესთანაა, რომლებიც აღდგომის ორშაბათს პაპ ფრანცისკეს გარდაცვალებას გლოვობენ, - ამის შესახებ საქართველოს მეხუთე პრეზიდენტი, სალომე ზურაბიშვილი სოციალურ ქსელში წერს.
"მქონდა პატივი, საქართველოს პრეზიდენტის რანგში ოფიციალური ვიზიტით ვატიკანს ვწვეოდი და ჩვენს სახელმწიფოებსა და კულტურებს შორის კავშირების გასაძლიერებლად მნიშვნელოვან ნაბიჯებზე შევთანხმებულიყავი“, - წერს ზურაბიშვილი.
- საქართველოს პრემიერ-მინისტრი ირაკლი კობახიძე რომის პაპის გარდაცვალების გამო მწუხარებას გამოთქვამს.
მთავრობის მეთაური სოციალურ ქსელ X-ში ქართველი ხალხის სახელით მთელი მსოფლიოს კათოლიკურ საზოგადოებას უსამძიმრებს.
"ღრმა მწუხარებას გამოვთქვამ პაპი ფრანცისკეს გარდაცვალების გამო. მისი მშვიდობის, თანაგრძნობისა და ერთიანობის მემკვიდრეობა გაგრძელდება. ქართველი ხალხის სახელით გულწრფელ სამძიმარს ვუცხადებ მთელი მსოფლიოს კათოლიკურ საზოგადოებას",- აღნიშნავს ირაკლი კობახიძე.
რომის პაპის გარდაცვალების გამო მწუხარებას გამოთქვამს. მიხეილ ყაველაშვილიც:
„ქართველი ხალხის სახელით, გულწრფელ სამძიმარს ვუცხადებ წმინდა საყდარს, კათოლიკურ ეკლესიას და მილიონობით მორწმუნეს მთელ მსოფლიოში. პაპი ფრანცისკე დაამახსოვრდებათ, როგორც სულიერი ლიდერი, რომელსაც ღრმა თავმდაბლობა, თანაგრძნობა და გამბედაობა ახასიათებდა - მშვიდობის, ადამიანური ღირსებისა და ერებსა და სარწმუნოებებს შორის ერთიანობის ურყევი დამცველი. მისი მორალური სიცხადე და ურყევი ერთგულება უფრო სამართლიანი და თანამგრძნობი სამყაროს შექმნისადმი თაობებს შთააგონებს“, - წერს მიხეილ ყაველაშვილი X-ზე.
ცნობისთვის, კათოლიკური ეკლესიის ლიდერი, პაპი ფრანცისკე, 88 წლის ასაკში გარდაიცვალა. ის კათოლიკურ ეკლესიას ათ წელზე მეტი ხნის განმავლობაში ხელმძღვანელობდა. ბოლო წლებში პაპს ჯანმრთელობის არაერთი პრობლემა ჰქონდა, რის გამოც მისი ჯანმრთელობა სულ უფრო და უფრო უარესდებოდა. მან ცოტა ხნის წინ ორმხრივი პნევმონიის მძიმე შეტევა გადაიტანა.
