13
მაისიდღის ზოგადი ასტროლოგიური პროგნოზი
“ევროპის უმსხვილესი სახელმწიფოები 200 მილიარდ ევროზე მეტი ღირებულების გაყინული რუსული აქტივების ჩამორთმევის მცდელობას ახორციელებენ“, - ამის შესახებ ინფორმაციას The Financial Times-ი წერს.
გამოცემის ცნობით, საფრანგეთი და გერმანია, რომლებიც დიდი ხანია ეწინააღმდეგებიან ევროკავშირში არსებული აქტივების სრულ ჩამორთმევას, დიდ ბრიტანეთთან და სხვა ქვეყნებთან ერთად, მათი გამოყენების გზებს განიხილავენ.
The Financial Times-ის სამი წყაროს ცნობით, ფრანგმა ოფიციალურმა პირებმა წარადგინეს წინადადება, რომ ევროპული ქვეყნების დედაქალაქებმა მოსკოვს აქტივები ჩამოართვან, თუ ის უკრაინაში ცეცხლის შეწყვეტის მომავალ შეთანხმებას დაარღვევს.
The Financial Times-ი წერს, რომ 2022 წელს რუსეთის უკრაინაში შეჭრის შემდეგ “დიდი შვიდეულის“ მოკავშირეებმა რუსეთის ცენტრალური ბანკის, დაახლოებით, 300 მილიარდი ევროს ღირებულების აქტივები გაყინეს, რომლის უმეტესი ნაწილი - დაახლოებით 190 მილიარდი ევრო - განთავსებულია ბელგიის ფასიანი ქაღალდების ცენტრალურ დეპოზიტარში (CSD), Euroclear-ში, მცირე ოდენობით კი საფრანგეთში, დიდი ბრიტანეთში, იაპონიაში, შვეიცარიასა და აშშ-ში. ამჟამად, ამ აქტივებით გამომუშავებული შემოსავალი - ძირითადად ნაღდი ფული და სახელმწიფო ობლიგაციები - გამოიყენება “დიდი შვიდეულის“ ქვეყნების მიერ უკრაინისთვის გამოყოფილი 50 მილიარდი აშშ დოლარის ოდენობის სესხის დასაფარად, მაგრამ ძირითადი აქტივები ხელუხლებელია.
გამოცემა წერს, რომ ქვეყნები, მათ შორის უკრაინა, პოლონეთი და ბალტიის ქვეყნები დიდი ხანია ითხოვენ ძირითადი აქტივების ჩამორთმევას, მაგრამ რამდენიმე ქვეყანა, მათ შორის გერმანია, საფრანგეთი და ბელგია, უკან იხევდნენ იმ მიზეზით, რომ სახელმწიფო ქონების ჩამორთმევა საერთაშორისო სამართლის ფარგლებში პრეცედენტს შექმნის.
ამასთან, ევროპის ცენტრალური ბანკი შიშობდა, რომ ევროს, როგორც უცხოური რეზერვების უსაფრთხო თავშესაფრის სტატუსს საფრთხე ემუქრება, რადგან აქტივების დიდი ნაწილი ევროპულ ვალუტაშია.
The Financial Times-ის წყაროს ცნობით, საფრანგეთის წინადადება კარგად მიიღეს სხვა ევროპელმა მოკავშირეებმა, მაგრამ ის ჯერ კიდევ შორსაა შეთანხმებისგან.
გამოცემა წერს, რომ დაყადაღების მხარდამჭერ ბანაკს ბიძგი მისცა დონალდ ტრამპის ადმინისტრაციის მუქარამ უკრაინისთვის სამხედრო მხარდაჭერის შეჩერების შესახებ. “უფრო და უფრო მეტი ქვეყანა მზად არის გამოიყენოს გაყინული აქტივების ჩამორთმევა როგორც ბერკეტი“, - განაცხადა წყარომ The Financial Times-თან ინტერვიუში.
