ფაგების გამოყენება აკნეს, როზაცეასა და კანის სხვა დაავადებების დროს
ფაგოთერაპია ბოლო პერიოდში სულ უფრო პოპულარული ხდება მთელი მსოფლიოს მასშტაბით. ის ანტიბაქტერიული მკურნალობის ერთ-ერთი საინტერესო, უსაფრთხო მეთოდია. ამასთან, წარმოადგენს უალტერნატივო გზას ანტიბაქტერიული რეზისტენტობის პირობებში.
ამ ფონზე, ელიავას ფაგოთერაპიის საერთაშორისო ცენტრი ერთ-ერთი წამყვანი კლინიკაა მსოფლიოში. მის გამოცდილებას იზიარებს ისეთი ქვეყნების სამედიცინო საზოგადოებები, როგორიც არის აშშ, ჰოლანდია, გერმანია, ავსტრია, საფრანგეთი, შვედეთი და ა. შ.
ფაგები აქტიურად გამოიყენება სხვადასხვა ტიპის, მათ შორის, კანის დაავადებების დროს. ამ საკითხზე დეტალურად სასაუბროდ ელიავას ფაგოთერაპიული კლინიკის ექიმი დერმატოლოგი ნანა ყანჩელი და მისი ასისტენტი, უმცროსი ექიმი, დერმატოლოგიის რეზიდენტი ლიკა ჯინჭარაძე გვესაუბრებიან.
როგორც ნანა ყანჩელი განმარტავს, ფაგური პრეპარატებით დერმატოლოგიური პაციენტების მკურნალობა ძირითადად კანისა და კანქვეშა ქსოვილის ბაქტერიული დაავადებების დროს ხორციელდება. ესენი გახლავთ: კანის აბსცესი, ფურუნკული, კარბუნკული, აკნე, როზაცეა, ჩირქოვანი ჰიდრადენიტი, ფოლიკულიტები და სხვა. ფაგები ასევე გამოიყენება კანის სხვადასხვა არაინფექციური გენეზის დაზიანებისას.
„მკურნალობის პროცესში ვიყენებთ ფაგო პრეპარატების ადმინისტრირების სხვადასხვა გზას. კერძოდ, ისინი პაციენტებს ენიშნებათ როგორც დასალევად, ასევე ლოკალურად, დაზიანებული უბნების დასამუშავებლად. კანზე აპლიკაციებისთვის ვიყენებთ როგორც ფაგის სითხეს, ასევე მალამოებს. განსაკუთრებული წარმატებით გამოიყენება ფაგური პრეპარატების შეყვანა ლოკალურად, მეზოთერაპიის ტექნიკით. მეზოთერაპიის ტექნიკა გულისხმობს ფაგების მიზანმიმართულ ინექციებს კანის ღრმა ფენაში (დერმაში). ეს პროცედურა საშუალებას გვაძლევს პრეპარატის მინიმალური დოზით მაქსიმალურ შედეგს მივაღწიოთ,“ - განმარტავს ნანა ყანჩელი.
მკურნალობის დაწყებისას ბაქტერიოფაგის შერჩევა ხდება ინდივიდუალურად, წინასწარ ჩატარებული ბაქტერიოლოგიური გამოკვლევის შემდეგ, რაც საშუალებას იძლევა ბაქტერიის სახეობის გარდა, ფაგური პრეპარატების მიმართ მგრძნობელობაც განისაზღვროს. ამ დროს, მკურნალობის კურსის ხანგრძლივობას და ჯერადობას ადგენს მკურნალი ექიმი ინდივიდუალურად, პაციენტის ზოგადი მდგომარეობის, დიაგნოზის და ჩატარებული გამოკვლევების საფუძველზე.
„მნიშვნელოვანია, რომ ფაგებით მეზოთერაპიის დროს გვერდითი მოვლენები ძალზე იშვიათია. გარდა მეზოთერაპიისა, ჩვენს კლინიკაში გაჩნდა ისეთი ინექციური მეთოდის მოთხოვნილება, როგორიცაა პლაზმოთერაპია (პლაზმოლიფტინგი). პლაზმოთერაპია რეკომენდებულია: სებორეას, აკნეს და პოსტაკნეს, ნაწიბურის, აკნეს შემდგომი ლაქების დროს. განსაკუთრებით ეფექტურია პლაზმოთერაპია თმის ცვენის, ალოპეციის სხვადასხვა ფორმის დროს. უნდა აღინიშნოს, რომ ჩვენს კლინიკაში პლაზმოთერაპიას წარმატებით ვიყენებთ მეზოთერაპიასთან კომბინაციაში, რაც კარგ შედეგს გვაძლევს აკნე-პოსტაკნეს დროს. ეს კომბინაცია ძალიან ეფექტურია სხვადასხვა მიზეზით წარმოშობილი თმის ცვენის დროს. კლინიკაში ხშირია პაციენტების მომართვიანობა კანზე სხვადასხვა ახალწარმონაქმნების გამო. ასეთ პაციენტებს დერმატოსკოპიული და ლაბორატორიული დიაგნოსტიკის შემდგომ, მკურნალობის სხვადასხვა მეთოდებს ვთავაზობთ, მათ შორის არის კრიოთერაპია, რომელიც წარმოადგენს არასასურველი ახალწარმონაქმნების მოშორების ყველაზე ოპტიმალურ მეთოდს. მისი გამოყენებით შესაძლებელია ისეთი წარმონაქმნების მოცილება, როგორიცაა: ვირუსული მეჭეჭები, კანის პაპილომები, სებორეული კერატოზი, აქტინიური კერატოზი და კანის სხვა კეთილთვისებიანი წარმონაქმნები“ - განმარტავს ნანა ყანჩელი.
როგორც უმცროსი ექიმი ლიკა ჯინჭარაძე ჩვენთან საუბარში აღნიშნავს, კლინიკაში მიმართვიანობა წლიდან წლამდე იზრდება და ეს პროცესი მსოფლიო მასშტაბით, დერმატოლოგიაში ფაგოთერაპიისადმი ინტერესის ზრდას მიჰყვება.
„დერმატოლოგიაში ფაგოთერაპიისადმი ინტერესი ძალიან იზრდება და ახალგაზრდა თაობა ამ პროცესში აქტიურად ვართ ჩართულები. ელიავას ფაგოთერაპიის საერთაშორისო ცენტრს ფაგების კვლევასა და გამოყენებას საუკუნოვანი ისტორია აქვს, რაც დღემდე აქტიურად გრძელდება. ჩემთვის ძალიან სასიხარულო და საამაყოა, რომ ამ პროცესის ნაწილი ვარ,“ - აღნიშნავს ლიკა ჯინჭარაძე.
R