"ერთ-ერთი პირველი სფერო, რასაც პოლიტიკური კრიზისი შეეხება, იქნება უძრავი ქონების ბაზარი..." - ექსპერტი სისტემის ჩამოშლის 3 კომპონენტს ასახელებს

მიუხედავად სადღესასწაულო დღეებისა, ქვეყანაში პროტესტი არ წყდება, შეიძლება ითქვას, უპრეცედენტო აქციის მოწმენი გავხდით 31 დეკემბერს, როდესაც ათასობით პროტესტანტი რუსთაველის გამზირზე შეხვდა ახალ წელს. ქვეყანაში მძიმე პოლიტიკური კრიზისია, გასული წლის მიწურულს ხელისუფლების წევრებზე სანქციების მთელი კასკადი ვნახეთ, მათ შორის შს მინისტრი "მაგნიტსკის სიაში" მოხვდა, აშშ-მა სანქციები დაუწესა ბიძინა ივანიშვილს, თუმცა ხელისუფლება ცდილობს ეს არ შეიმჩნიოს, მათი პროპაგანდა ლამის ალტერნატიულ რეალობას ქმნის... შექმნილ ვითარებაზე "კვირის პალიტრასთან" ექსპერტი გია ხუხაშვილი საუბრობს. გთავაზობთ ამონარიდს ინტერვიუდან:

- როგორ შეიძლება განვითარდეს მოვლენები, პროტესტი არ წყდება, აშშ და ევროპაც ახალ-ახალ სანქციებზე ლაპარაკობენ. ორიოდე დღის წინ გავრცელდა ინფორმაცია, რომ რესპუბლიკელმა ჯო უილსონმა და დემოკრატმა სტივ კოენმა აშშ-ის კონგრესში კვლავ წარადგინეს "მეგობარი აქტი", რომელიც "ქართული ოცნების" წინააღმდეგ სანქციებს ითვალისწინებს. თქვენი აზრით, "ქართული ოცნება", ბოლოს და ბოლოს, წავა დათმობაზე და დაინიშნება ვადამდელი არჩევნები?

- რაღა დაგიმალოთ და, საერთოდ არ ველი რაიმეს დათმობას. ხელისუფლებას არა აქვს ამის რესურსი, ის ახლა თავს გრძნობს კედელთან მიყენებულად და რაღაც პირობითი სტაბილურობის დემონსტრირებას ცდილობს.

სხვა გზაც არა აქვს, იძულებულია ასე მოიქცეს - გაათავისუფლოს განსხვავებული პოზიციის მქონე საჯარო მოხელეები, ღირსების ორდენებით დააჯილდოოს დასანქცირებული პირები და ა.შ. ეს არის ერთგვარი ისტერიკა, იმის დემონსტრირების ცდა, თუ მიერთგულებთ, არ მიგატოვებთ, წინააღმდეგ შემთხვევაში კი, დაგსჯითო...

ხელისუფლების დათმობაზე აღარც არის უკვე საქმე, საზოგადოებაზე ივანიშვილი პირადად არ ძალადობს, არსად დარბის და არც არავის ეხმალავება. ის ეყრდნობა სისტემას, მის საშუალო და ქვედა რგოლებს. აქ კი ის ხალხია, ვინც პოლიტიკურ დავალებებს ასრულებს და ახლა ამ რგოლებში, ჩემი აზრით, სერიოზული რყევებია დაწყებული. სისტემა არ არის უჭკუო, მასზე არ მოქმედებს ხელისუფლების პროპაგანდა და მის შიგნით უკვე გაჩნდა სერიოზული კითხვები.

ბიძინა რას აკეთებს? ის ეუბნება სისტემას, მაცალეთ 2 კვირა და დავალაგებ ყველაფერსო. გრძელვადიანად უკვე ვეღარავის ვერაფერს ჰპირდება და ცდილობს მოკლე ვადით როგორმე შეაკავოს სისტემაში დაწყებული პროცესები, რადგან მშვენივრად იცის, რომ თუ სისტემა ჩამოეშალა, მისი საქმე დასრულებულია. ამიტომაც ახლა ცდილობს ტყუილებით, მოკლევადიანი დაპირებებით ამ პროცესს შეუშალოს ხელი. არადა, მშვენივრად იცის, რომ მის თავზე კიდია ერთი მისთვის ძალიან მძიმე კითხვა - სხვისი პრობლემები როგორ უნდა გადაწყვიტოს, როდესაც საკუთარი ვერ მოუგვარებია?! ბიძინას უძლეველობის, მისი სიბრძნის მითის ნგრევა მიდის. ეს არ არის დასრულებული, რყევები გაგრძელდება და ჩემი აზრით, სისტემა 2-3 თვეში ჩამოიშლება. ბიძინამ ამას როგორ უნდა შეუშალოს ხელი, არ ვიცი, მით უფრო, რომ ეს სისტემა უმრავლესობით მაინც პროდასავლურია. რა თქმა უნდა, იქ არიან პრორუსები, მაგრამ უმცირესობაში, რაც მშვენივრად იციან "ოცნების" ლიდერებმა და ამიტომაც ცდილობენ ისევ ამოეფარონ ევროკავშირის დროშას, დასანქცირებული პირები გაიძახიან, ევროპისკენ მივდივართო, ამაზე დიდი უტიფრობა და ტყუილი არ გაგონილა! რაღაც გამოგონილ იმედებს ქმნიან, მაგალითად, ტრამპის ინაუგურაციაზე გაუთავებელი ლაპარაკი გავიხსენოთ, თუმცა ამ ბოლო დროს აშკარად მოუკლეს, რიხი აღარ უვარგათ. ამ ილუზიების შეიძლება ვიღაცას სჯერა, მაგრამ სისტემა ჭკვიანი, თუმცა კონფორმისტია და საბოლოო, კონსოლიდირებულ საბოტაჟს დაიწყებს მაშინ, როდესაც საბოლოოდ მიიჩნევს, რომ ამათი საქმე დამთავრებულია. ამას დიდი კი არაფერი სჭირდება, საჭიროა სისტემამ დაიწყოს პოლიტიკური დავალებების საბოტირება, ანუ კანონის თანახმად იმოქმედოს და პოლიტიკური დავალებების შესრულებაზე უარი თქვას. როგორც უკვე ვთქვი, 2-3 თვე სჭირდება ამ ყველაფერს.

ამ პროცესს აქვს 3 კომპონენტი:

1. პოლიტიკური კომპონენტი, რასაც განსაზღვრავს ხალხის ნება;

2. ეკონომიკური კომპონენტი, რაც გადაიზრდება სოციალურ პრობლემებში, ეს კი 15 იანვრის შემდეგ უკვე შესამჩნევი გახდება. როგორც კი საიმპორტო აქტივობა გაიზრდება, სერიოზული დეფიციტი იქნება სავალუტო ბირჟაზე - სამწუხაროდ, უკვე აღარ ჩანს ვალუტაზე მოთხოვნის დაბალანსების წყაროები. ერთ-ერთი პირველი სფერო, რასაც ეს კრიზისი შეეხება, იქნება უძრავი ქონების ბაზარი, რომელიც ისედაც ძალიან გაბერილია, ლამის ფინანსურ პირამიდად არის ქცეული. უპირველესად, სწორედ ამ სფეროში იქნება პრობლემები...

აქვე პატარა გადახვევას გავაკეთებ - ერთპიროვნული მმართველობითი რეჟიმები, რაც ასე ეოცნებება ბიძინას, არსებობს სამყაროში, მაგრამ ასეთი რეჟიმის გამოკვებას სჭირდება დიდი რესურსები, მაგალითად, ნავთობი, წიაღისეული და ა.შ. გარდა ამისა, ასეთ რეჟიმებს სჭირდებათ იდეოლოგია, იდეა, რომლისთვისაც საზოგადოება მზად იქნება იშიმშილოს. აბა, "ქართულ ოცნებას" რა იდეა აქვს? ის მედროვეების დაჯგუფებაა! მაგალითად რუსეთი ავიღოთ, სადაც არის რესურსებიც, რითაც იკვებება ერთპიროვნული რეჟიმი, მაგრამ ამასთანავე აქვთ რუსული "ველიკოდერჟავული" იმპერიული იდეა, ძალიან ბოროტი და მძიმე, მაგრამ ამისთვის რუსები მზად არიან უკიდურეს გაჭირვებაში იცხოვრონ.

ისევ სისტემის ჩამოშლის პროცესს რომ დავუბრუნდეთ, მე-3 კომპონენტი გახლავთ ქვეყნის გრძელვადიანი ევროატლანტიკური განვითარებისკენ სწრაფვა, რაც საქართველოს არჩევანია, და რომელსაც სულ უფრო და უფრო შორდება "ოცნების" ხელისუფლება, არადა, ქვეყნის დასავლური ვექტორი კონსტიტუციით არის განსაზღვრული.

მოკლედ, დღეს საქართველოში უფრო რეჟიმის პაროდიაა. რასაც ვამბობ, მტკივნეულია და სასაცილო ნამდვილად არ არის, რადგან მძევლები ჰყავთ აყვანილი და როგორც ტერორისტები, ბავშვებით ვაჭრობენ.

ამ ყველაფრის გათვალისწინებით, არ ვიცი, როგორ აპირებენ ძალაუფლების შენარჩუნებას. ერთადერთი გზა რჩებათ - პირდაპირ ორჯონიკიძის მანტია მოირგონ, დაუძახონ რუსულ ტანკებს და დაგვიყენონ რუსთაველზე. წაიკითხეთ სრულად