უკრაინის არმია რუსეთის ტერიტორიაზე, კერძოდ, კურსკის ოლქში შეტევაზე გადავიდა - რა ინფორმაცია ხდება ცნობილი?
უკრაინელი ოფიციალური პირებისა და რუსი ე.წ. სამხედრო ბლოგერების ინფორმაციით, უკრაინის შეიარაღებულმა ძალებმა რუსეთის კურსკის რეგიონში მოულოდნელი შეტევა დაიწყეს.
გავრცელებულ ვიდეოში ჩანს, უკრაინული ჯავშანტექნიკის კოლონები, რომლებიც უკრაინის მიერ კონტროლირებად ქალაქ სუჯას ჩრდილო-აღმოსავლეთით, სოფელ ბოლშოე სოლდატსკოესკენ მიემართებიან.
5 იანვრის დილით, რუსმა "სამხედრო კორესპონდენტებმა“ კურსკის რეგიონში უკრაინის არმიის "დიდი შეტევის“ შესახებ ცნობების გავრცელება დაიწყეს.
Z-ბლოგერი რომან ალეხინი წერს, რომ უკრაინის შეიარაღებულმა ძალებმა დაიწყეს მოძრაობა სუჯადან სოფელ ბოლშოე სოლდაცკოესკენ, რომელიც მდებარეობს რეგიონალური ცენტრის გზატკეცილზე, კურსკის ატომური ელექტროსადგურიდან 35 კილომეტრში.
"შეტევისას, მტერი იყენებს ნაღმების გაწმენდის ტექნიკას, ტანკებს და სხვა ჯავშანმანქანებს. დიდი ალბათობით, უკრაინელები გარღვევას სხვა მიმართულებითაც შეეცდებიან“, - წერს ის.
მოგვიანებით მან დაამატა, რომ ბრძოლა უკვე დაიწყო ბოლშოი სოლდატსკოეს მახლობლად სოფელ ბერდინისთვის. ზოგიერთი რუსი ბლოგერის თქმით, უკრაინის არმიამ ეს დასახლება აიღო და წინ მიიწევს. სხვები ამას უარყოფენ.
უკრაინის პრეზიდენტის, ვოლოდიმირ ზელენსკის ოფისის ხელმძღვანელმა, ანდრეი ერმაკმა მიანიშნა, რომ თავდასხმა წარმატებულია.
"კურსკის რეგიონში კარგი ამბებია, რუსეთი იღებს იმას, რასაც იმსახურებს", - დაწერა მან კვირას.
უკრაინული ძალები კურსკის რეგიონში გასული წლის აგვისტოში შევიდნენ და ტერიტორიის ნაწილი დაიკავეს.
უკრაინის ტერიტორიაზე, 2022 წლის სრულმასშტაბიანი შეჭრის შემდეგ, რუსეთი ამ ეტაპზე წინ ყველაზე სწრაფი ტემპით მიიწევს. რუსული ჯარები ცდილობენ, დონეცკის ოლქში უკრაინულ ქალაქს, პოკროვსკის მიუახლოვდნენ. ბოლო ორ დღეში მათ რამდენიმე მიმდებარე სოფელი აიღეს.
რუსეთ-უკრაინის ომის კონტექსტში 20 იანვარს დონალდ ტრამპის თეთრ სახლში დაბრუნებასა და წლის განმავლობაში შესაძლო "სამშვიდობო" მოლაპარაკებებს ელიან. ზელენსკიმ მიანიშნა, რომ კურსკის გარშემო უკრაინის კონტროლქვეშ არსებულმა ტერიტორიებმა შეიძლება, ნებისმიერ გარიგებაში გარკვეული როლი ითამაშოს.