"ივიკოს ყველაზე მეტად უყვარს დედა და დედას ყველაზე მეტად უყვარს ივიკო" - რას ამბობს ნინო ნადირაძე შვილისა და მაზლის განსხვავებულ პოლიტიკურ პოზიციაზე?
გასულ შაბათს, ნოდარ მელაძის გადაცემიდან ცნობილი გახდა, რომ ექიმების გუგა კუზანოვისა და ნინო ნადირაძის ვაჟი ივა კუზანოვი ერთ-ერთი იყო იმ ახალგაზრდებიდან, რომლებიც პარლამენტის წინ საპროტესტო აქციებზე იდგა.
ამის შესახებ ივამ "ნოდარ მელაძის შაბათთან" ინტერვიუში განაცხადა. ის სამედიცინო უნივერსიტეტის სტუდენტია. ინტერვიუში აღნიშნა, რომ მისთვის მნიშვნელოვანია ამ ბრძოლაში მეგობრების გვერდით იდგეს. იქვე ამბობს, რომ არ ეთანხმება ხელისუფლების კურსს საგარეო პოლიტიკასთან დაკავშირებით.
რას ფიქრობს, ივიკოს ცნობილი დედა, ნინო ნადირაძე, რომელიც ღიად უჭერს მხარს ხელისუფლებას? - ის AMBEBI.GE-სთან ამ საკითხზე ვრცლად საუბრობს:
- ჩემი და ჩემი შვილის ერთობას ვერავინ გაყოფს, ვერც პოლიტიკა და ვერც სხვა რამ. ახალგაზრდაა, ახალგაზრდობაში ყველას აქვს თავისი წინააღმდეგობრივი აზრები. ივიკოს ყველაზე მეტად უყვარს დედა და დედას ყველაზე მეტად უყვარს ივიკო. ავუხსენი ყველაფერი რატომ ვარ "ოცნების" მხარეს. იმიტომ, რომ "ოცნებამ" შეძლო ამ ქვეყანაში სიტყვის თავისუფლების უზრუნველყოფა. ამიტომ ყველას აქვს იმის საშუალება, რომ თავისი აზრი გამოხატოს.
ჩვენი ოჯახის არცერთი წევრი ერთმანეთთან არასოდეს იქნება დაპირისპირებული. არცერთი მიზეზის გამო და მითუმეტეს პოლიტიკის. ჩემს შვილს პოლიტიკა ნაკლებად აინტერესებს, მას რა კითხვებიც ჰქონდა გავეცი პასუხი, რომ არანაირი რუსეთისკენ ქვეყანა არ მიექანება. ჩემი არგუმენტები მან საკმაოდ მყარად მიიჩნია. ერთხელ იყო მიტინგზე, რომ დახმარებოდა, რადგან სამედიცინოს სტუდენტია, ეხმარებოდა, არც დაზიანებულა. წყალიც მიესხა, რა ვქნა, რევოლუცია როცა ეწყობა, იქ ფიზიკურადაც დაზიანდები.
- იცოდით, რომ იმ დღეს, ივიკო აქციაზე იყო?
- არა, მე არ ვიცოდი.
- თქვენს მაზლზე ამბობენ, რომ ასევე ყოველდღე აქციებზე დგას.
- ჩემი მაზლი არის 48 წლის, მე უნდა ჩამაბაროს ანგარიში აქციაზე ივლის თუ არა? - ალეკოს თავისი პოზიცია აქვს, მე - ჩემი. ზუსტად ამას ვამბობ, რომ ამ ქვეყანაში არის დემოკრატია და უნდა გავუფრთხილდეთ ამას.
- ბოლო დროს მიმდინარე აქციებმა, ორ ბანაკად დაყო საზოგადოება. პოლიტიკური შეხედულებების გამო, მეგობრები, ოჯახის წევრები, მეზობლები, ერთმანეთს გადაეკიდნენ.
- არ მჯერა იმის, რომ განსხვავებული პოლიტიკური შეხედულების გამო ადამიანს უნდა დაუპირისპირდე. რანაირი პოლიტიკური შეხედულებაც არ უნდა ჰქონდეს, მე რა აზრიც გამაჩნდა ადრე იმ ადამიანზე, ზუსტად იმ აზრზე ვრჩები. ჩემთვის ვიღაცის მიმართ სიმპათია და ანტიპათია პოლიტიკაზე არ გადის. ვფიქრობ, ეს იყო ერთგვარი ლუსტრაცია, ვისაც ვინმე არ მოსწონდა, პოლიტიკა საბაბად გამოიყენეს, რომ დაჰპირისპირებოდნენ ერთმანეთს. ვერ წარმომიდგენია პოლიტიკური შეხედულების გამო, ვინმე ამოვიძულო, ვინმეს ამის გამო თუ ვეზიზღები, ალბათ ადრეც ვეზიზღებოდი და ეს იყო ტრიგერი, რომ ჩემზე აზრი დაეფიქსირებინა.
- თქვენი მეუღლე, გუგა კუზანოვი, რა პოზიციაზეა, მხარს გიჭერთ?
- კი ბატონო, ჩვენ ოჯახის წევრები, ივიკოს ჩათვლით ერთმანეთს ყველაფერში მხარს ვუჭერთ. ივამ თავისი თვალით ნახა, როგორ იყენებდა ძალიან ბევრი არაკეთილსინდისიერი საკუთარი დედის წინააღმდეგ. გაოცებული იყო, რატომ ფიქრობს ეს ხალხი, რომ დედაზე უარს ვიტყვიო. შეიძლება შეხედულებაზე ვთქვა უარი, მაგრამ დედაზე უარს არ ვიტყვიო. ჩვენი ოჯახი არის ერთ მუშტად შეკრული და ნორმალურ, საღად მოაზროვნე ადამიანებში შეუძლებელია პოლიტიკა გახდეს ზიზღისა და ერთმანეთის დაპირისპირების მიზეზი. შეუძლებელია ერთ დღეს გათენდეს და საყვარელი ადამიანი, მისი პოლიტიკური შეხედულების გამო შეიზიზღო.
იმედი მაქვს რაღაც პერიოდის შემდეგ ყველა გაანალიზებს ამას. მე მაინც ჩემს ქვეყანას მშვიდობას და კეთილგონიერებას ვუსურვებ. ევროპულობა განსხვავებული აზრის მიმღებლობაა. სხვა შემთხვევაში განსხვავებული აზრის მიუღებლობა, არ არის ევროპული. სანამ ამას არ ვისწავლით, ჩვენ ვიქნებით პირველყოფილი საზოგადოება და ასე ვერ გავფრინდებით. ჩემთვის ყველას განსხვავებული აზრი მისაღებია და თუ ჩემი აზრი ვინმესთვის ისეთი მიუღებელია, რომ სიკვდილს მისურვებს, ეს მისი პრობლემაა.
არაფერი არ არსებობს ჩემთვის ოჯახზე მაღლა, სამშობლო იწყება ჩემი ოჯახიდან, ჩემი შვილებიდან. არ არსებობს რამე, რაც მე ამაზე უარს მათქმევინებს და მიხარია, რომ ჩემი შვილები და ოჯახი ამ აზრზე არიან. ყველას ვუსურვებ კარგ ახალგაზრდობას. ახალგაზრდობა არის ის, როდესაც შეგიძლია დაუფიქრებლად რაღაც აკეთო. მე 21 წლის ასაკში და 51 წლის ასაკში ვარ, ორი დიამეტრულად განსხვავებული ადამიანი. იქ სადაც 21 წლის ასაკში უკანმოუხედავად მორევში გადავეშვებოდი, არც ვიფიქრებდი შედეგებზე. 51 წლის ასაკში ბევრს ვწონი, ვიდრე რაღაცას ვაკეთებ. ახალგაზრდული შემართება ძალიან კარგია, მაგრამ გამოცდილება არის მთავარი, რაც შემდგომში გაძლევს საშუალებას გადარჩე.
ამიტომ ყოველთვის უნდობლად ვეპყრობი იმ ადამიანებს, ვისაც სურვილი აქვს გამოიყენოს ახალგაზრდული ენერგია, სულისკვეთება, ალალი ფიქრები, გული, თავისი ბნელი და შავი ზრახვების განსახორციელებლად.