გურულების მარშის პარალელურად რესპუბლიკის მოედნიდან მსვლელობა მამებმა და კალათბურთელებმა მოაწყვეს - რუსთაველი კვლავ გადაკეტილია: “ეს ურჩევნია მამულსა, შვილნი გვჯობნიან მამებსა!”

• ვანო გორგიაშვილის ფოტოები

რესპუბლიკის მოედნიდან პარლამენტის მიმართულებით მამების მარში მოეწყო.

როგორც მარშის მონაწილეები აცხადებენ, მათი მთავარი მოთხოვნაა: აქციების დროს დაკავებულების გათავისუფლება, ხელახალი და სამართლიანი არჩევნები და ევროინტეგრაცია.

• “ეს ურჩევნია მამულსა, შვილნი გვჯობნიან მამებსა!”, - ასეთი შინაარსის ბანერები აქვთ მამებს მარშზე.

ამასთან, რესპუბლიკის მოედანზე მამების აქციას შეუერთდნენ კალათბურთის მოყვარულები და კალათბურთელებიც.

როგორც მარშის ერთ-ერთმა მონაწილემ, კალათბურთელმა ნიკა მეტრეველმა განაცხადა, “ მიუღებელია პოლიციური რეჟიმი”, რასაც მოქალაქეები არ შეეგუებიან.

“დღეს ერთ-ერთი ისტორიული მომენტია საქართველოს ისტორიაში, რადგან ასეთი პრობლემის წინაშე ვდგავართ. როგორც წინა მთავრობა ძალადობდა, იმავეს აკეთებს ეს მთავრობა. ყოვლად მიუღებელია პოლიციური რეჟიმი, ჩვენ ამას არ დავნებდებით. ასევე ვითხოვთ ყველა დაკავებულის გათავისუფლებას”, - განაცხადა ნიკა მეტრეველმა.

ამის პარალელურად მარში ევროპის მოედნიდან პარლამენტისკენ გურულებმა მოაწყვეს. ამჟამად რუსთაველის გამზირი გადაკეტილია.

მარშს ასევე მართავენ სამედიცინო სფეროს წარმომადგენლებიც.

ცნობისთვის, მასშტაბური აქციები "ქართული ოცნების“ 28 ნოემბრის გადაწყვეტილებამ გამოიწვია, რომლის თანახმად, საქართველო 2028 წლის ბოლომდე ევროკავშირთან მოლაპარაკებების გახსნის საკითხს დღის წესრიგში არ დააყენებს.

იხილეთ ასევე:

• თბილისში "გურულების მარში“ მიმდინარეობს - "ამდენი გურული თბილისში რომ ჩამოვა, კარგად არ არის საქმე" (ფოტოები)
• "გურულები ყველაზე ჩქარა მივხვდით, რომ ევროპელები ვართ" - გურულების საპროტესტო მანიფესტაციაში ლევან წულაძე მონაწილეობს