"2007 წლის შემდეგ არ ვყოფილვარ ევროპაში, დედა იტალიის და მამა ფინეთის მოქალაქეა... ატყობთ ახლა როგორ მეცხელება მე ამათი სანქციები?" - დიმიტრი სამხარაძე

2007 წლის შემდეგ არ ვყოფილვარ ევროპაში. თავიდანვე გადაწყვეტილი მქონდა ჩემი შვილები საქართველოში გაზრდილიყვნენ, აქ ესწავლათ! ატყობთ ახლა როგორ მეცხელება მე ამათი სანქციები? - ასე გამოეხმაურა „ქართული ოცნების“ რეგიონული მდივანი ლიეტუვის მიერ მისთვის სანქციების დაწესებას.

როგორც სამხარაძე აღნიშნავს, ევროპაში მაშინ ცხოვრობდა, როცა აქციის მონაწილეთა 40% დაბადებულიც არ იყო.

"2007 წლის შემდეგ არ ვყოფილვარ ევროპაში, დედა იტალიის და მამა ფინეთის მოქალაქეა! ოჯახს ფინეთში 1996 წელს შეძენილი სახლი და აგარაკი გვაქვს და მაინც არ ჩავდივარ! თავიდანვე გადაწყვეტილი მქონდა ჩემი შვილები საქართველოში გაზრდილიყვნენ, აქ ესწავლათ! ორი ვაჟიშვილი სტუდენტი მყავს! ევროპაში მაშინ ვცხოვრობდი, როცა აქციის მონაწილეთა 40% დაბადებულიც არ იყო, ისინი, რომლებმაც არ იციან რას აპროტესტებენ. ლეგალურად ჩავედი და თავიდანვე საბუთი მივიღე, რადგან მამა ფინეთში ცნობილი მუსიკოსი იყო! მოქალაქეობაც შეგნებულად არ ავიღე, შემეძლო ორმაგი, მაგრამ არა! ატყობთ ახლა როგორ მეცხელება მე ამათი სანქციები? P.S. ლიეტუვის საელჩო საქართველოში პასპორტით დიმიტრი სამხარაძე ვარ და არა დიტო! ჩაასწორეთ, რამე გაუგებრობა რომ არ იყოს", - წერს დიმიტრი სამხარაძე.

ცნობისთვის, ესტონეთის და ლიეტუვის მთავრობებმა საქართველოს მოქალაქეების მიმართ სანქციები გააფართოვეს და სხვა თანამდებობის პირებთან ერთად პრემიერ-მინისტრი, ირაკლი კობახიძეც დაასანქცირეს.

ესტონეთის საგარეო საქმეთა მინისტრის მარგუს ცაჰკნას ინფორმაციით, ესტონეთმა სანქციები დაუწესა კიდევ 14 ქართველ თანამდებობის პირს, ლიეტუვის საგარეო საქმეთა მინისტრის, კიასტუსის ბუდრისის თქმით კი, ლიეტუვას მთავრობამ კიდევ 17 პირი დაასანქცირა.