"არანაირი ნატო, არანაირი სამხედრო ბაზები, სამხედრო წვრთნები უკრაინის მიწაზე და..." - სერგეი ლავროვი ასახელებს უკრაინასთან ომის დასრულების პირობებს

"რუსეთში ბევრს სურს, რომ სანქციების გაუქმება უკრაინასთან სამშვიდობო შეთანხმების ერთ-ერთი პირობა გახდეს, მაგრამ რუსეთის ფედერაციაში გავაცნობიერეთ, რომ სჯობს, საკუთარ თავს დავეყრდნოთ და განვავითაროთ თანამშრომლობის მექანიზმები ნორმალურ ქვეყნებთან, რომლებიც ეკონომიკურ ინტერესებსა და პოლიტიკას ერთმანეთში არ ურევენ", - ამის შესახებ რუსეთის საგარეო საქმეთა მინისტრმა, სერგეი ლავროვმა ამერიკელ ჟურნალისტ ტაკერ კარლსონთან ინტერვიუში განაცხადა.

"რუსეთში ბევრს სურს ეს პირობა დაიდოს. მაგრამ მიმაჩნია, რომ რაც უფრო მეტს ვცხოვრობთ ამ სანქციების ქვეშ, მით უფრო მეტად ვაცნობიერებთ, რომ სჯობს საკუთარ თავს დავეყრდნოთ და განვავითაროთ მექანიზმები, პლატფორმები თანამშრომლობისთვის "ნორმალურ“ ქვეყნებთან, რომლებიც ჩვენთვის მეგობრულნი არიან და ეკონომიკურ ინტერესებსა და ურთიერთობებს, განსაკუთრებით პოლიტიკას, ერთმანეთში არ ურევენ“, - განაცხადა ლავროვმა.

• ამასთან, მისი თქმით, რომ რუსეთი დათანხმდება უკრაინაში კონფლიქტის დასრულებას იმ პირობებით, რაც რუსეთის პრეზიდენტმა ვლადიმერ პუტინმა გააჟღერა.

"არანაირი ნატო, არანაირი სამხედრო ბაზები, სამხედრო წვრთნები უკრაინის მიწაზე უცხოური ჯარების მონაწილეობით. საჭიროა რეალობის გათვალისწინება "ადგილზე“ და ეს არა მხოლოდ კონტაქტის ხაზია, არამედ ცვლილებები რუსეთის ფედერაციის კონსტიტუციაში დონეცკისა და ლუგანსკის რესპუბლიკებში, ხერსონისა და ზაპოროჟიეს რეგიონებში რეფერენდუმის შემდეგ. ახლა ისინი უკვე რუსეთის შემადგენლობაში არიან ჩვენი კონსტიტუციით - ეს არის რეალობა“, - დასძინა ლავროვმა.

• "ჩვენ არ ვფიქრობთ ომზე შეერთებულ შტატებთან, რომელიც შეიძლება ბირთვული ხასიათის იყოს. ჩვენი სამხედრო დოქტრინა ამბობს, რომ ყველაზე მნიშვნელოვანია ბირთვული ომის თავიდან აცილება“, - აღნიშნა ლავროვმა.

მისი თქმით, 2022 წლის იანვარში რუსეთის ფედერაციამ გაერო-ს უშიშროების საბჭოს ხუთი მუდმივი წევრის (რუსეთი, ჩინეთი, აშშ, საფრანგეთი, ბრიტანეთი) ლიდერების ერთობლივი განცხადების ინიცირება განახორციელა, რომელშიც ნათქვამია, რომ ეს ქვეყნები ყველაფერს გააკეთებენ, რათა თავიდან აიცილონ დაპირისპირება, აღიარებენ და პატივს სცემენ ერთმანეთის ინტერესებს და უსაფრთხოებას.

”მაგრამ რუსეთის უსაფრთხოების ინტერესები სრულიად უგულებელყვეს, როდესაც მათ უარყვეს (დაახლოებით ამავე დროს) ჩვენი ქვეყნის წინადადება უსაფრთხოების გარანტიების შესახებ ხელშეკრულების დადების შესახებ. რაც შეეხება შეერთებულ შტატებს, ჩვენ არავისთან ომი არ გვინდა“, - დასძინა ლავროვმა.