"შსს-ს გავრცელებული კადრები, სადაც ე.წ. მოლოტოვის კოქტეილები ჩანს, დადგმული სცენაა, რომელსაც საზოგადოების შესაშინებლად იყენებენ" - ჯაფარიძე

მადლობა ყველას ვინც ეს დღეებია რუსთაველზე დგას და საკუთარ თავისუფლებას იცავს. ეს ტალღა საქართველოს ყველა ქალაქშია. ამ რაოდენობის ადამიანი, რომლებიც აქციებზე გამოდიან, მე არ მახსოვს ამ ქვეყანაში გამოსულიყოს. დღემდე, ამ არჩევნების შედეგებს არ აღიარებს არავინ, გარდა რუსეთისა და რუსეთის სატელიტი სახელმწიფოებისა - გუშინ რეჟიმი თვისობრივად ახალ ეტაპზე გადავიდა, შეიჭრა რამდენიმე პოლიტიკური პარტიისა და მოძრაობების ოფისებში და პრაქტიკულად დაარბია ოფისები. ამოღებულია სხვადასხვა ნივთები, არცერთი ამ ნივთებიდან კანონსაწინააღმდეგო არ არის,- ამის შესახებ „კოალიცია ცვლილებისთვის“ ერთ-ერთმა ლიდერმა ზურაბ ჯაფარიძემ, ოპოზიციური პარტიების ერთობლივ ბრიფინგზე განაცხადა

• მისივე შეფასებით, შსს-ს მიერ გავრცელებული კადრები, სადაც ე.წ. მოლოტოვის კოქტეილები ჩანს, დადგმული სცენაა, რომელსაც მმართველი პარტია და შინაგან საქმეთა სამინისტრო საზოგადოების შესაშინებლად იყენებს.

"მადლობა ყველას ვინც ეს დღეებია რუსთაველზე დგას და საკუთარ თავისუფლებას იცავს. მინდა ყველას შევახსენო, რომ უწყვეტი პროტესტის მე-7 დღეა რუსთაველის გამზირზე, ეს პროტესტი მას შემდეგ დაიწყო, რაც მოპარული არჩევნების გამო, ევროკავშირმა რუსულ ხელისუფლებასთან ყველანაირი კომუნიკაცია გაწყვიტა და „ქართულმა ოცნებამ“ გადაწყვიტა და საჯაროდ გამოაცხადა, რომ ისინი წყვეტენ საქართველოს ევროინტეგრაციის პროცესს, რასაც პროტესტის ტალღა მოჰყვა. ეს ტალღა საქართველოს ყველა ქალაქშია. ამ რაოდენობის ადამიანი, რომლებიც აქციებზე გამოდიან, მე არ მახსოვს ამ ქვეყანაში გამოსულიყოს. დღემდე, ამ არჩევნების შედეგებს არ აღიარებს არავინ, გარდა რუსეთისა და რუსეთის სატელიტი სახელმწიფოებისა.

ზუსტი ინფორმაცია სამწუხაროდ არ გვაქვს, მაგრამ ვიცით, რომ ასობით დაკავებულია, აქედან აბსოლუტურ უმრავლესობას ფიზიკური დაზიანებები აღენიშნება და ეს დაზიანებები უშუალოდ დაკავების მომენტში კი არ აქვთ მიღებული, არამედ დაკავების შემდეგ ამ ადამიანებს ფაქტობრივად წამების პროცესი აქვთ გავლილი, ნაწილ მათგანს ქუჩაში, ნაწილს მინივენებში, ნაწილს კი პოლიციის განყოფილებებში გაუსწორდნენ.

გუშინ რეჟიმი თვისობრივად ახალ ეტაპზე გადავიდა, შეიჭრა რამდენიმე პოლიტიკური პარტიისა და მოძრაობების ოფისებში და პრაქტიკულად დაარბია ოფისები. ამოღებულია სხვადასხვა ნივთები, არცერთი ამ ნივთებიდან კანონსაწინააღმდეგო არ არის. ერთ-ერთის ოფისში შინაგან საქმეთა სამინისტრო ავრცელებს კადრებს, რომ ამოიღეს „მოლოტოვის კოქტეილები“, კადრები რაც გაავრცელეს ნათლად ჩანს, რომ ეს დადგმული სცენა იყო, ბოთლები, სადაც ჩვრები იყო ჩატენილი, „მოლოტოვები“ ასე არ კეთდება, ბოთლებში ჯერ ბენზინი ისხმება და შემდეგ იდება ჩვარი და არა პირიქით. სჭირდებათ, რომ მოსახლეობა დააშინონ, რომ ვიღაცები „მოლოტოვის კოქტეილებს“ ამზადებდნენ სადღაც ოფისებში. ყველა ის ნივთი - კარავი, პარალონი, აირწინაღი თუ სხვა რამ, ყველა ოფიციალურად იყიდება და ყველას შეუძლია იყიდოს მაღაზიებში, უფრო სწორად შეეძლოთ, ახლა აუკრძალეს მაღაზიებს ამ ნივთების გაყიდვა“,- განაცხადა ზურა ჯაფარიძემ.

ზურა ჯაფარიძე ასევე გუშინ საღამოს „ქორთიარდ მარიოტთან“ მომხდარ ინციდენტებსაც გამოეხმაურა, სადაც ოპოზიციური პატიების რამდენიმე პირი დააკავეს. მისი თქმით, ხელისუფლებამ მათ ე.წ. ტიტუშკები მიუგზავნა, რომელთა მიზანი პროვოკაციების მოწყობა იყო.

მისივე შეფასებით, მსგავსი რაღაცები რეგულარულად მოხდება, რისთვისაც მზად უნდა იყვნენ.

"გუშინ „ქორთიარდ მარიოტში“, სადაც ოპოზიციური ჯგუფების შეხვედრა იყო „ქართულმა ოცნებამ“ პროვოკაცია მოაწყო. პოლიციელები, რომლებიც ერთ დღეს პოლიციელები არიან მეორე დღეს სადისტები, რომლებიც მოქალაქეებს აწამებენ, მესამე დღეს მეხანძრეები, რომლებიც „შლანგებით“ დარბიან რუსთაველზე, გუშინ გადაცმულები იყვნენ, "ტიტუშკები", რომელთა შორის ორი მათგანი ვიცით ვინც არის, პირველი - გიორგი პირველაშვილი, რომელიც არის ძველი თბილისის პოლიციის თანამშრომელი და მეორე - მირიან ქავთარაძე, გლდანი - ნაძალადევის პოლიციის უფროსი. პოლიციელები გახადეს „ტიტუშკები“, რომლებიც დაგხვდნენ „ქორთიარდ მარიოტი“ ცენტრალურ შესასვლელთან. როდესაც გამოვიდოდით დაიწყეს გინება და ხელების ქნევა, მიიღეს შესაბამისი პასუხი და ცხადია მოცვივდნენ სპეციალური დანიშნულების რაზმები, ისინი გაწიეს, არცერთ მათგანს არავინ არ შეხებია, მიუხედავად იმისა, რომ მათი წამოწყებული იყო და დააკავეს, რამდენიმე ჩვენიანი, მათ შორის პოლიტიკური ლიდერებიც.

გასაგებია, რომ რეჟიმი სხვა ეტაპზეა გადასული და მსგავს რაღაცებს რეგულარულად უნდა ველოდოთ, არაფერი უკეთესობისკენ ჯერ არ წავა, მანამ სანამ სიტუაცია კიდევ უფრო არ გაუარესდება და ამის მზაობა ყველას უნდა გვქონდეს.

გუშინ გაიფიცა უამრავი ადამიანი, ხელოვნების წრიდან იყვნენ ბევრნი და თანამდებობა არაერთმა საჯარო მოხელემ დატოვა“,- განაცხადა ზურა ჯაფარიძემ.