"რუსულმა პროპაგანდამ დაიწყო სიცრუის გავრცელება, რომ თითქოს, საქართველოში ჩასვლას ვგეგმავთ" - უკრაინაში მებრძოლი "ქართული ლეგიონის" განცხადება: როგორ ეხმიანება მას პრეზიდენტის

"რუსულმა პროპაგანდამ ცოტა ხნის წინ დაიწყო ცრუ განცხადებების გავრცელება იმის შესახებ, რომ "ქართული ლეგიონი" გეგმავს საქართველოში დაბრუნებას", - ამის შესახებ უკრაინაში მებრძოლი "ქართული ლეგიონი", რომელსაც მამუკა მამულაშვილი ხელმძღვანელობს, განცხადებას ავრცელებს.

"რუსულმა პროპაგანდამ ცოტა ხნის წინ დაიწყო ცრუ განცხადებების გავრცელება იმის შესახებ, რომ "ქართული ლეგიონი" გეგმავს საქართველოში ჩასვლას და საპროტესტო აქციებში მონაწილეობას.

ჩვენ კატეგორიულად უარვყოფთ ამ უსაფუძვლო ბრალდებებს.

• მიუხედავად იმისა, რომ ჩვენ სრულად ვუჭერთ მხარს ქართველი ხალხის სამართლიან აღშფოთებას საქართველოს მთავრობის გადაწყვეტილებასთან დაკავშირებით, შეაჩეროს პროგრესი ევროკავშირში გაწევრებისკენ, ჩვენი ბრძოლა რჩება აქ, უკრაინაში, სადაც ჩვენი საერთო მტერია.

ჩვენი თავდადება უკრაინის გამარჯვებისთვის ურყევია და ჩვენ ვიქნებით ფრონტზე, სანამ ეს მიზანი არ მიიღწევა", - ნათქვამია "ქართული ლეგიონის" განცხადება, რომელიც X-ზე გამოქვეყნდა.

• აღსანიშნავია, რომ ეს განცხადება სოციალურ ქსელში პრეზიდენტმა სალომე ზურაბიშვილმა გააზიარა და დაწერა:

"ძალიან მნიშვნელოვანი განცხადება, რომელიც ოფიციალურად უარყოფს ყალბ ცნობებს იმის შესახებ, რომ უკრაინაში ქართველი ჯარისკაცები გეგმავდნენ, პროტესტს შეერთებოდნენ. ცარიელი პროპაგანდა. ერთადერთი ომი არის ის, რაც "ქართულმა ოცნებამ“ დაიწყო ქართველი ხალხის წინააღმდეგ“, - წერს პრეზიდენტი.

ცნობისთვის, რამდენიმე დღეა საქართველოს მასშტაბით საპროტესტო აქციები მიმდინარეობს. ყველაფერი 28 ნოემბერს დაიწყო, როცა პრემიერმა გამოაცხადა, რომ საქართველო 2028 წლის ბოლომდე დღის წესრიგში არ დააყენებს ევროკავშირთან მოლაპარაკების გახსნის საკითხს.