"მატყუარა გენერალი", რომელიც პუტინს უკრაინაში რუსული ჯარების წინსვლაზე ცრუ ინფორმაციას აწვდიდა, გაათავისუფლეს - რა დეტალები ხდება ცნობილი
რუსეთის პრეზიდენტმა ვლადიმერ პუტინმა თანამდებობიდან გაათავისუფლა უფროსი გენერალი გენადი ანაშკინი - მას უკრაინაში რუსული ჯარების წინსვლის შესახებ ყალბი ინფორმაციის გავრცელება ედება ბრალად. ცნობილი ხდება, რომ ის გენერალიტეტს ატყუებდა, რომ სივერსკის რეგიონში ყველაფერი მათ სასარგებლოდ მიდიოდა.
გათავისუფლების მთავარი მიზეზი უკრაინის სივერსკის ტერიტორიის სწრაფად აღების მცდელობა გახდა. რუსი ომის ბლოგერები აცხადებდნენ, რომ ანაშკინმა ცუდად მომზადებული რუსული ჯარები მცირე ტაქტიკური სარგებლისთვის "სასაკლაოზე" გაუშვა.
ანაშკინის გათავისუფლებაზე კომენტარი რუსეთის თავდაცვის მინისტრმა ანდრეი ბელუსოვმა გააკეთა: "შეიძლება დაუშვა შეცდომები, მაგრამ არ შეიძლება მოტყუება".
რუსეთის თავდაცვის სამინისტროს ჯერ არ გაუვრცელებია ოფიციალური განცხადება ანაშკინის თანამდებობიდან გადაყენებასთან დაკავშირებით, ზოგიერთი რუსული სახელმწიფო მედია იტყობინება, რომ ის გადააყენეს ჯარში დაგეგმილი როტაციის ფარგლებში.
უკანასკნელი ცნობების თანახმად, რუსი ჯარისკაცები კვლავ იბრძვიან სივერსკისა და ბილჰორივკას მახლობლად. დასავლური დაზვერვის შეფასებით, ომის დაწყების შემდეგ 700 000-ზე მეტი რუსი ჯარისკაცი დაიღუპა ან დაშავდა, მოსკოვი ოქტომბერში დღეში საშუალოდ 1500 ჯარისკაცს კარგავდა .