27
მარტიდღის ზოგადი ასტროლოგიური პროგნოზი
როგორც ცნობილი გახდა ახალ მთავრობაში სამი მინისტრი იცვლება. პრემიერ-მინისტრ ირაკლი კობახიძის სპეციალურ ბრიფინგზე ცნობილი გახდა, რომ საგარეო საქმეთა მინისტრი მაკა ბოჭორიშვილი გახდება, ის ილია დარჩიაშვილს ჩაანაცვლებს, რომელიც პოსტს 2022 წლის 4 აპრილიდან იკავებდა. იუსტიციის მინისტრის პორტფელს ანრი ოხანაშვილი ჩაიბარებს, ის რატი ბრეგაძეს შეცვლის, სოფლის მეურნეობის მინისტრი კი დავით სონღულაშვილი გახდება. მისი წინამორბედი ოთარ შამუგია, აღნიშნულ პოსტს 2022 წლის 9 თებერვლიდან იკავებდა.
დავით სონღულაშვილი 2020-24 წლების პარლამენტში დარგობრივი ეკონომიკისა და ეკონომიკური პოლიტიკის კომიტეტის თავმჯდომარე იყო.
როგორ მოვიდა დავით სონღულაშვილი პოლიტიკაში
მომავალი მინისტრი, რომელიც საქართველოს სოფლის მეურნეობის ბედზე იზრუნებს 1983 წლის 1-ლ იანვარს თბილისში დაიბადა.
საქართველოს ტექნიკურ უნივერსიტეტში ეკონომიკური ინფორმატიკის მიმართულებით მიიღო ბაკალავრის ხარისხი, შემდეგ კი კავკასიის ბიზნესის სკოლაში მარკეტინგის სპეციალობით მაგისტრატურა დაასრულა. საქართველოში მიღებული მაგისტრს ხარისხის შემდეგ, სონღულაშვილი განათლების მიღებას საზღვრებს გარეთ აგრძელებს და ფრანგულ გრენობლის ბიზნესის უმაღლეს სკოლაში საერთაშორისო ბიზნესის მაგისტრის ხარისხს ეუფლება.
მისი კარიერული გზა საინტერესოა.
2003 წელს სონღულაშვილი ტელეკომპანია "მზის“ გაყიდვების მენეჯერად მუშაობდა. ერთ წელიწადში კი საქართველოს ეკონომიკის მინისტრის თანაშემწის პოსტი ჩაიბარა.
2004 წელს, მიხეილ სააკაშვილის მმართველობის პირობებში გახდა საქართველოს ეკონომიკური განვითარების სამინისტროს ადმინისტრაციის უფროსი. თუმცა მალე პოლიტიკა დატოვა და შემდეგი ორი წელი 2004-2006 წლებში "საქართველოს ბანკის“ შესყიდვების დეპარტამენტის დირექტორად მუშაობდა. სხვა სამსახურებთან შედარებით ხანგრძლივი აღმოჩნდა მისი პოსტი შპს "ედრესის“ მმართველი დირექტორის პოზიციაზე, სადაც 2007-2016 წლებში მუშაობდა.
დავით სონღულაშვილი ბიზნესიდან უკვე პოლიტიკაში მიდის და 2016 წელს პირველად ხდება საქართველოს პარლამენტის წევრი.
სონღულაშვილი 2020 წელსაც აგრძელებს საპარლამენტო მოღვაწეობას და 2024 წლის საპარლამენტო სიაში საპატიო 39-ე ადგილს იკავებს და შესაბამისად, დეპუტატი მესამედ ხდება. თუმცა როგორც დღეს კობახიძემ განაცხადა, ის მინისტრის პორტფელს ჩაიბარებს.
დეპუტატის ქონებრივი დეკლარაცია
როგორც 2024 წელს შევსებულ დეკლარაციაში ვკითხულობთ, დავით სონღულაშვილი დაოჯახებულია, ჰყავს მეუღლე ქეთევან მაღულარია და სამი შვილი, სესილი, ბიძინა და გაბრიელი, რომელიც 2018 წელს დაიბადა.
სონღულაშვილის ქონება შთამბეჭდავია, თუმცა მათი ნაწილი პოლიტიკოსს ბიზნესში მოღვაწეობის დროს აქვს შეძენილი.
სონღულაშვილმა 2007 წელს სოფელ ტაბახმელაში 5 ათას ლარად მიწის ნაკვეთი შეიძინა. 2016 წელს კი უძრავი ქონების ორი შესყიდვა განახორციელა - თბილისში, ყაზბეგის გამზირზე მდებარე 336,3 კვ.მ ბინაში 400 000 ლარი გადაიხადა, დაბა კოჯორში მდებარე 600 კვ.მ მიწის ნაკვეთში კი, სადაც მითითებულია, რომ საცხოვრებელი სახლი და გარაჟია განთავსებული, 120 000 ლარი.
დეკლარაციის შევსებისას სონღულაშვილს საბარათე ანგარიშებზე ჰქონდა, 3275,45 ლარი, შუათანა შვილს ბიძინა სონღულაშვილს ანაბარზე ჰქონდა 55 657,39 ლარი და დავითს - 6695,58 დოლარი. მომავალ მინისტრს საკრედიტო ბარათზე 10975,43 ლარი ერიცხებოდა. ქეთევან მაღულარიას კი - 585,02 ლარი.
დავით სონღულაშვილს დანაზოგის სახით ჰქონდა 70 000 დოლარი და 15 000 ლარი.
დავით სონღულაშვილი და მისი მეუღლე არაერთი შპს-ს მფლობელები და მეწილეები არიან, თუმცა არცერთი მათგანიდან შემოსავალი არ უფიქსირდებათ.
სონღულაშვილმა 2023 წელს პარლამენტში თანამდებობრივი სარგო 52559,09 ლარი მიიღო. დეკლარაციაში მითითებული არ არის ქეთევან მაღულარიას ახლანდელი სამსახური, ის დამოუკიდებელი ფოტოგრაფია.
თუმცა, 2016 წელს დავით სონღულაშვილის პარლამენტში მოსვლის შემდეგ, მისი მეუღლე, ქეთევან მაღულარია 2017 წლიდან სსიპ საქართველოს სახელმწიფო ელექტროსისტემის საფინანსო სამსახურის უფროსი სპეციალისტი გახლდათ, როგორც ჩანს, ამ ეტაპზე, ის საჯარო უწყებაში აღარ მუშაობს, რადგან მაღულარია მეუღლის დეკლარაციაში მსგავს თანამდებობაზე ბოლოს 2018 წელს არის მოხსენიებული;
როგორც გიყვებოდით, ქეთევან მაღულარია დამოუკიდებელი ფოტოგრაფია და თანამშრომლობს ცნობილ კომპანიებთან.
2014 წელს მაღულარიამ საკუთარი კომპანია Baby Zoom დააარსა, რომელიც ახალშობილებისა და ზოგადად ბავშვების ფოტოგადაღებას მოიცავდა. როგორც "ფეისბუქის" გვერდზე ვნახეთ, კომპანიას ბოლო აქტივობა 2018 წელს ჰქონდა.
მაღულარია მედიასთან ჰყვებოდა, რომ ბიზნესის შექმნის იდეა საფრანგეთში ყოფნისას გაუჩნდა:
"საფრანგეთის ქ. გრენობლში შემეძინა პირველი ბავშვი - სესილი. სამშობიარო სახლში შემომთავაზეს სამახსოვრო ფოტოების გადაღება ბავშვთან ერთად. თავდაპირველად შევყოყმანდი, რადგან ვერ წარმომედგინა ჩემი თავი და რამდენიმე დღის ახალშობილის ლამაზი ფოტოები, როდესაც ჩემი ყოყმანი შენიშნეს შემომთავაზეს დამეთვალიერებინა ახალშობილების ალბომი. ფოტოების დათვალიერებისთანავე დავთანხმდი იმდენად შთამბეჭდავი და ხარისხიანი იყო პროფესიონალის მიერ გადაღებული სურათები. ბევრი ფოტოები მაქვს, რომელიც გადაღებულია ჩემი და ჩემი ახლობლების მიერ, მაგრამ იქ გაკეთებული პირველი ალბომი მაინც ყველასგან გამორჩეულია, სწორედ მაშინ დაიბადა ეს იდეა".
სოციალურ ქსელში მომავალი მინისტრის მეუღლე ბოლო დროს ნაკლებად აქტიურობს. მათ "ფეისბუქგვერდებზე" ოჯახურ ფოტოებსაც ნაკლებად ნახავთ.
