"ჩემი გუნდისგან უფრო მეტ აგრესიას ველი" - რა თქვა სანიომა მატჩის წინა პრესკონფერენციაზე და რომელი ფეხბურთელი გამოტოვებს დღევანდელ შეხვედრას დისკვალიფიკაციის გამო

დღეს საქართველოს ეროვნული ნაკრები ერთა ლიგის მეხუთე შეხვედრას უკრაინის ნაკრების წინააღმდეგ გამართავს.

• საქართველო - უკრაინის შეხვედრა "აჭარაბეთ არენაზე“ 21:00 საათზე დაიწყება.

დისკვალიფიკაციის გამო შეხვედრას ლაშა დვალი გამოტოვებს.

მატჩისწინა ვარჯიში ჩვენმა გუნდმა მატჩის მასპინძელ აჭარაბეთ არენაზე, ბათუმში გამართა. საწვრთნელი პროცესის დაწყებამდე ჩატარდა ტრადიციული პრესკონფერენცია. მედიის კითხვებს ეროვნული ნაკრების მთავარმა მწვრთნელმა, ვილი სანიოლმა უპასუხა:

"უკრაინის ნაკრები ძალიან ძლიერი გუნდია, რაც ერთი თვის წინ, ჩვენი პირველი თამაშის დროს დაამტკიცეს. ოქტომბრის მატჩისგან განსხვავებით, ჩემი გუნდისგან უფრო მეტ აგრესიას ველი, რადგან სწორედ ეს გვაკლდა პირველ შეხვედრაში.

მხოლოდ იმის თქმა შემიძლია, რომ მომდევნო ორი მატჩის მოგების შემთხვევაში ჯგუფს პირველ ადგილზე დავასრულებთ. თუმცა, არ ვამბობ, რომ მხოლოდ ჯგუფის მოგებას ვისახავთ მიზნად. ჩვენი მიზანია, ყოველთვის ვაჩვენოთ ჩვენი მაქსიმუმი. თუ კარგად თამაშობ, როგორც წესი, ბოლოს იღებ იმას, რასაც იმსახურებ. ფეხბურთელებმა ეს იციან. არ ვართ მხოლოდ შედეგზე ფოკუსირებული, ჩემთვის უფრო მნიშვნელოვანია თამაშის ხარისხი, როგორც ინდივიდუალური, ისე გუნდური თვალსაზრისით.

ბოლო 2-3 წლის განმავლობაში ბევრი რამ შეიცვალა. ჩვენი გუნდი ახალგაზრდა და გამოცდილი ფეხბურთელების ნაზავს წარმოადგენს. მომდევნო 3-4 წლის განმავლობაში რამდენიმე მოთამაშე კარიერას დაასრულებს. ასე რომ, სამომავლოდ ჩემი მთავარი საზრუნავი ახალი თაობა იქნება. ახალგაზრდა მოთამაშეებს სჭირდებათ თამაშის შესაძლებლობა, თუმცა ევროპული სანაკრებო ფეხბურთის კალენდარი ამ კუთხით ძალიან რთულია. ძალიან ცოტა ამხანაგური მატჩი გვაქვს, რაც დიდი პრობლემაა. ძალიან მალე დაიწყება მსოფლიო თასის საკვალიფიკაციო ეტაპი. ზოგჯერ, უბრალოდ არ გაქვს მომავალზე ფიქრის დრო, რადგან უბრალოდ გადიხარ თამაშზე და უკეთესის იმედი გაქვს" - თქვა სანიოლმა.

• საქართველოს ნაკრები ერთა ლიგის B1 ჯგუფში მეორე ადგილზეა და პირველ ადგილზე მყოფ ჩეხეთს ერთი ქულით ჩამორჩება. რაც შეეხება მეტოქეს - უკრაინა 4 ქულით ბოლო ადგილზეა.

როგორც ცნობილია, ამ დროისთვის უეფას „ერთა ლიგის“ B1 ჯგუფში 7 ქულა აქვს ჩეხეთის ნაკრებს. 6-6 ქულა აქვს ალბანეთს და საქართველოს. ხოლო 4 ქულა უკრაინას.

ცნობისთვის, ქართველი გულშემატკივრებისთვის 16 ნოემბერს, პირველი რესპუბლიკის მოედანზე, თბილისის მერიისა და საქართველოს ფეხბურთის ფედერაციის ორგანიზებით, დიდი ეკრანი დამონტაჟდება, სადაც საქართველო-უკრაინის საფეხბურთო მატჩის საჯარო ჩვენება გაიმართება.