32.5 მილიონ ფუნტად ნაყიდი სახლი ლონდონში, რომელიც ჩრჩილის ბუდე აღმოჩნდა - ბადრი პატარკაციშვილის ქალიშვილი და სიძე ყოფილ მეპატრონეს უჩივიან: "მან ჩვენ თაღლითურად მოგვატყუა"
ქართველი მილიარდერის ქალიშვილი, ია პატარკაციშვილი ლონდონის სასამართლოში ჩივის. ქალი სარჩელში 36 მილიონ ფუნტზე მეტს ითხოვს იმ ადამიანისგან, ვისგანაც უძრავი ქონება შეიძინა. სარჩელში ნათქვამია, რომ სახლში გადასვლის შემდეგ, მწერებმა მისი და მეუღლის ძვირადღირებული ტანსაცმელი დააზიანეს.
ია პატარკაციშვილმა თავის მეუღლესთან, სტომატოლოგ დოქტორ ევგენ ჰუნიაკთან ერთად 2019 წლის მაისში ნოთინგ ჰილში, დასავლეთ ლონდონში მდებარე სახლი 32.5 მილიონი ფუნტად იყიდა.
უდიდესი სახლში არის აუზი, სპა-ცენტრი, სპორტდარბაზი, ღვინის ოთახი, ბიბლიოთეკა და კინოთეატრი, ასევე "ძილის ოთახი", რომელიც სპეციალურად მშვიდი ძილისთვისაა შექმნილი.
სახლში გადასვლის შემდეგ, რამდენიმე დღეში იამ შენიშნა, რომ ყველაფერი რიგზე არ იყო. სახლის გამყიდველი და ყოფილი მფლობელი, Team GB-ის ყოფილი ნიჩბოსანი უილიამ ვუდვორდ-ფიშერია, რომლის წინააღმდეგ, ლონდონის უმაღლეს სასამართლოში საქმე უკვე განხილვაშია.
დოქტორი ჰუნიაკი და მისი მეუღლე აცხადებენ, რომ ჩრჩილმა მათი ტანსაცმელი დააზიანეს, რამაც 50 000 ფუნტის ზარალი გამოიწვია. წყვილის ადვოკატები ამტკიცებენ, რომ სახლის სრული გაწმენდა მხოლოდ მაშინ იქნება შესაძლებელი, თუ ყველა ჩაშენებული საიზოლაციო მასალას შეცვლიან, რაც შესაძლოა 9.6 მილიონ ფუნტამდე დაჯდეს.
ვუდვორდ-ფიშერი ამბობს, რომ ეს თანხა ძალიან მაღალია და მისი მტკიცებით, პრობლემის მოგვარება 162 652 ფუნტად იქნება შესაძლებელი.
იას ქმარმა, მილიარდელმა სტომატოლოგმა სასამართლოზე განაცხადა, რომ მას მწერების ფოტოები არ აქვს: "ისინი ძალიან სწრაფები არიან. როდესაც ვხედავ, მათ დაჭერას ვცდილობ, ამიტომ ფოტოების გადაღება ვერ მოვასწარი".
მისი თქმით, მწერები წყვილისა და მათი ორი შვილის კბილის ჯაგრისებზეც კი ბინადრობენ, ასევე ჭურჭელზე. ის ამბობს, რომ ღვინის ჭიქები ნაგავში გადაყრა უწევდა მას შემდეგ, რაც მათში ჩრჩილს აღმოაჩენდა.
წყვილის ადვოკატმა, ჯონ მაკგიმ, სასამართლოს განუცხადა, რომ დოქტორი ჰუნიაკი დღეში დაახლოებით 100 ჩრჩილს ანადგურებდა პრობლემის მოსაგვარებლად. მიუხედავად სპეციალური დამუშავებისა, ის დღემდე 35-მდე ჩრჩილს კლავს ყოველდღიურად.
წყვილი ამბობს, რომ სახლში ჩრჩილის გავრცელების მიზეზი საიზოლაციოდ გამოყენებულ სპეციალურ ბამბაში არსებული პარაზიტები, რომლებიც კედლებსა და ჭერში ბუდობენ.
"უდვორდ-ფიშერმა თაღლითურად მოგვატყუა ან დაუდევრობით არ გაამხილა, რომ სახლს ასეთი პრობლემა ჰქონდა", - ამბობს წყვილი.
მოთხოვნილ კომპენსაციაში წერია, რომ ვუდვორდ-ფიშერმა უნდა უკან გამოისყიდოს ქონება და წყვილს აუნაზღაუროს ყველა ხარჯი და დისკომფორტი, რომელიც ამ პრობლემის გამო მიადგათ, რაც ჯამში 36 მილიონ ფუნტზე მეტს შეადგენს. თუმცა, ბინის ყოფილი მფლობელი ყველა ბრალდებას უარყოფს და ამტკიცებს, რომ მისი ბინიდან გასვლის დროის ჩრჩილების პრობლემა მოგვარებული იყო.
მისი ადვოკატი, ჯონათან სეიტლერი, ამბობს, რომ წინასწარი დოკუმენტაციის შევსებისას მისმა კლიენტმა პატიოსნად აღნიშნა, რომ პრობლემები ჰქონდათ ჩრჩილთან დაკავშირებით.
ვუდვორდ-ფიშერმა, რომელიც ადრე ბრიტანეთის სახელით ნიჩბოსნობდა, ქონება 2011 წელს შეიძინა და მისმა მეუღლემ, ინტერიერის დიზაინერმა კერი ვუდვორდ-ფიშერმა, სახლს რეკონსტრუქცია ჩაუტარა, ვიდრე მას ჰუნიაკსა და პატარკაციშვილს მიჰყიდდნენ. ჰუნიაკი პედიატრიული სტომატოლოგია, რომელიც ჩელსიში მუშაობს, ხოლო მისი მეუღლე ბადრი პატარკაციშვილის შვილია, რომელიც 2000 წელს ინგლისში დასახლდა და 2008 წელს გულის უკმარისობით გარდაიცვალა.
ბინის ყოფილი მფლობელი აცხადებს, რომ შეძენამდე მომავალმა პატრონმა სახლი მინიმუმ 11-ჯერ მოინახულა. მიუხედავად ამისა, წყვილი აცხადებს, რომ მათთვის შოკისმომგვრელი იყო, როდესაც დაქირავებულმა მწერების სპეციალისტმა უთხრათ, რომ სახლში "ექსტრემალური რაოდენობის ჩრჩილი ცხოვრობდა, დაახლოებით ერთი მილიონი".
ჩრჩილები დაფრინავდნენ ღამით, როდესაც ვინმე ეკრანს იყენებდა, ბინადრობდნენ ტანსაცმელში, ხალიჩებზე. დააზიანეს ავეჯი. ჩრჩილი ხვდებოდათ ღვინოში, საკვებსა და ჭურჭელზე.
ვუდვორდ-ფიშერმა 2012-13 წლებში სახლი სრულად გადააკეთა და სამუშაოს დროს მან და მისმა მეუღლემ კედლებში ბამბის იზოლაცია დააყენეს, რაც ჩრჩილის ბუდედ იქცა.
დაზარალებულების ადვოკატი აცხადებს, რომ მწერების მასობრივმა გავრცელებამ თავის დროზე ვუდვორდ-ფიშერის ოჯახშიც სერიოზული დისკომფორტი გამოიწვია - ერთხელ ოჯახი იძულებული გახდა, სასტუმროში გადასულიყო, ხოლო მათი ძაღლი სხვაგან გაეყვანათ, რომ სახლი მასობრივად დაემუშავებინათ ინსექტიციდებით.
2018 წლის მაისისთვის კი გადაწყვიტეს, ქონება გაეყიდათ. ახლა ჰუნიაკი და მისი მეუღლე მოითხოვენ, რომ სასამართლომ სახლის გაყიდვა ბათილად ცნოს "თაღლითური შეცდომაში შეყვანის“ საფუძველზე და მათ 32.5 მილიონი ფუნტი უკან დაუბრუნდეს.
წყვილის ადვოკატები აღიარებენ, რომ 2020 წელს ჩატარებული ჩრჩილების საწინააღმდეგო სამუშაოებმა მდგომარეობა გააუმჯობესა, თუმცა ამტკიცებენ, რომ დოქტორ ჰუნიაკს დღემდე უწევს ამ პრობლემის წინააღმდეგ ბრძოლა.
სასამართლო პროცესი ამჟამად ისევ გრძელდება, თუმცა როდის გამოაცხადებს მოსამართლე გადაწყვეტილებას ამ დროისთვის უცნობია.
წაიკითხეთ ასევე: