"ნინი რამდენიმე წელი ცოტა ჩაკეტილი იყო... რაც შეეხება ვანო მერაბიშვილის მეუღლესთან ნათესაობას, თაკო ჩემი შვილის ნათლიაა" - რას პასუხობს ხათუნა ჟორდანია კრიტიკოსებს
ინტერვიუზე ხათუნა ჟორდანიას მისი ბოლო სტატუსის გამო დავურეკეთ. ხათუნა წერდა ფენომენზე, რომელიც მის ოჯახს ეხებოდა - როგორ უწერენ შეურაცხმყოფელ კომენტარებს ადამიანები, რომლებიც საკუთარ პროფილებზე ეკლესიასთან და ოჯახის წევრებთან გადაღებულ ფოტოებს აქვეყნებენ. ხათუნას ეს სტატუსი საზოგადოების ნაწილმა მისი შვილის, ნინი ქარსელაძის, პირად ცხოვრებას დაუკავშირა, რომელმაც ცოტა ხნის წინ "ინსტაგრამზე" დაწერა, რომ ქმარს დაშორდა
ხათუნა ჟორდანია:
- ზოგადად დავწერე, ჩემს ოჯახზე ისეთი ბულინგი მოდის უბრალო ფოტოს გამოც კი. დღეს დილიდან მოცლილი ვიყავი და შევდიოდი ყველა უარყოფითი კომენტარის ავტორებთან და ვნახულობდი, რომ პროფილი სავსე აქვთ ეკლესიასთან, შვილებთან, შვილიშვილებთან ერთად გადაღებული ფოტოებით. ცოტა გაკვირვებული დავრჩი, ასეთ ადამიანებს რატომ აქვთ ასეთი აგრესიული და შეურაცხმყოფელი ლექსიკა. რაც ვიფიქრე, ის დავწერე, ახალი არაფერი.
- პოლიტიკურმა სიტუაციამაც ხომ არ დაამძიმა გარემო? ნინის გამოჩენას სოციალურ ქსელში ბევრი დადებითი გამოხმაურება მოჰყვა.
- არ ვიცი, თავს შევიკავებ იმაზე საუბრისგან, რომ ეს შეიძლება პოლიტიკასთან ასოცირდებოდეს. ზურას რომ ცოლად გავყევი, მაშინაც უამრავი იყო ასეთი კომენტარი. საბედნიეროდ, ბევრი ადამიანი არ არის ასეთი აგრესიული და უფრო მეტია დადებითი ადამიანების კომენტარები, ამისთვის მადლობა ღმერთს და ამ ადამიანებს.
- სოციალურ ქსელში ყველას გაუკვირდა ნინის გულახდილობა, ფაქტია, რომ ის ბოლო წლებში მედიასთან ნაკლებად კონტაქტობდა. განსაკუთრებით მაშინ, როცა ეს პირად ცხოვრებას ეხებოდა...
- ეს ნინის უნდა ჰკითხოთ. ცოტა ჩაკეტილად იყო რამდენიმე წელი და ვფიქრობ, ეს მისი შეგრძნებები იყო, რაც ინსტაგრამზე დაწერა.
- ერთ-ერთი კომენტარში უწერდნენ, მას შემდეგ დაგაფასეთ, როდესაც ვნახეთ, დედას როგორ უვლიდიო...
- ნამდვილად დასაფასებელია. ყველა შვილს უყვარს დედა, მაგრამ ნინი მგონია, რომ განსაკუთრებული შემთხვევაა დღევანდელ საქართველოში. რომ არ ყოფილიყო ნინი, მე დღეს ცოცხალი არ ვიქნებოდი. ამას ყველგან ვამბობ და ყოველთვის ვიტყვი. არ დამეზარება იმის გამეორება რომ, ნინი ჩემთვის მფარველი ანგელოზია.
- ზურას რომ აკრიტიკებენ როგორ რეაგირებთ? მახსოვს, ადრე ნინი თქვენზე ამბობდა, ავუკრძალე სოციალურ ქსელებში შემოხედვაო...
- კომენტარებზე არ ვნერვიულობ, კარგად ვიცი, იმსახურებენ თუ არა ჩემი ოჯახის წევრები ამ კომენტარებს. ყველას პასუხს რომ არ ვაძლევ, იმას არ ნიშნავს, რომ ჩემი დამოკიდებულება არ მაქვს. გავბრაზდებოდი, ვიდარდებდი, ეს კომენტარები რომ სიმართლესთან ახლოს იყო, მაგრამ როდესაც ვიცი, რომ ისინი ამას არ იმსახურებენ, დიდად არ მენაღვლება.
წლები გადის და პერიოდულად მომაწვება ხოლმე და გაკვირვებას ვერ ვმალავ. როგორ შეიძლება ქალები, რომლებსაც შვილები და შვილიშვილები ჰყავთ, შემოვარდნენ და ასეთი სიტყვებით გალანძღონ ჩემი შვილები და ოჯახის წევრები.
- ადრე ზურამაც ისაუბრა ამ თემაზე, როდესაც პოლიტიკურად გაკრიტიკებენ, გახსენებენ ხოლმე ვანო მერაბიშვილის მეუღლესთან ნათესაობას და მეგობრობას. დღეს რა ურთიერთობა გაქვთ თაკო სალაყაიასთან, მიუხედავად იმისა, რომ არ ჩანს ვანო მერაბიშვილი პოლიტიკაში...
- გიდასტურებთ, რომ თაკო ჩემი შვილის ნათლიაა. მაშინ ვანო მერაბიშვილი არ ვანო მერაბიშვილობდა და ზურა და თაკო ბავშვობის მეგობრები იყვნენ, ჯერ კიდევ ბორჯომიდან. ვინმეს თუ უნდა, რომ რაღაც ჩემს გასაკრიტიკებლად გამოიყენოს, ყველა დამშვიდდეს, არასოდეს მინანია ეს გადაწყვეტილება. ახლა არ მაქვს არანაირი ურთიერთობა, მაგრამ შორიდან ისევ ისე მიყვარს როგორც წლების წინ მიყვარდა.
წაიკითხეთ ასევე: