"პრივატული კონცერტი იყო, რომელსაც პრეზიდენტი სააკაშვილი, ტრამპი, რამდენიმე სამთავრობო პირი და ხელოვანები ესწრებოდნენ..." - რას იხსენებს ქართველი მომღერალი ტრამპის საქართველოში ვიზიტზე

"საქართველო პატარა სასწაულია. ის დღეს ერთ-ერთი საოცარი ადგილია მსოფლიოში" - ეს სიტყვები აშშ-ს არჩეულმა პრეზიდენტმა დონალდ ტრამპმა 2012 წელს, საქართველოში სტუმრობის დროს წარმოთქვა...

საქართველოში დონალ ტრამპთან შეხვედრა სამთავრობო პირებთან ერთად ხელოვანებსაც მოუხდათ, მათ შორის არის იტალიაში მცხოვრები, მსოფლიო სცენებზე წარმატებულად მოღვაწე ქართველი საოპერო მომღერალი თეონა დვალი... მას სასაუბროდ იტალიაში დავუკავშირდით, რომ გაეხსენებინა ისტორიული შეხვედრისა და დონალდ ტრამპთან სამახსოვრო ფოტოს შესახებ...

- 2012 წელს კახეთში ვიმყოფებოდი, როდესაც დამირეკეს და მითხრეს, ბათუმში დონალდ ტრამპი ჩამოდის და მის პატივსაცემად გამართულ კონცერტზე უნდა იმღეროო... იქ გავიცანი ტრამპი, რომელიც საქართველოში საქართველოს იმჟამინდელი პრეზიდენტის მიხეილ სააკაშვილის მოწვევით ჩამოვიდა და ბათუმში "ტრამპთაუერის" პროექტის პრეზენტაციაში მიიღო მონაწილეობა. ტრამპი საქმიანი ვიზიტით იყო ჩამოსული, ბევრი შეხვედრა ჰქონდა დაგეგმილი და განტვირთვის საუკეთესო საშუალება იყო

• მისთვის ის მინიკონცერტი, რომელიც მოეწყო. ფაქტობრივად პრივატული კონცერტი იყო, რადგან მხოლოდ მიხეილ სააკაშვილი, დონალდ ტრამპი, რამდენიმე სამთავრობო პირი და ხელოვანები ესწრებოდნენ... მე არია შევასრულე, შემდეგ მაგიდასთან მიგვიწვიეს, სადაც დონალდ ტრამპი თავად გამომესაუბრა და აღნიშნა რომ ძალიან მოეწონა ჩემი ნამღერი. მან საჯაროდ მითხრა, ამერიკაში თუ ჩამოხვალ, ცნობილი ვარსკვლავი გახდებიო...

თქვენ წარმოიდგინეთ შემდეგ კლუბში გადავინაცვლეთ, რამაც ძალიან გამაკვირვა. როგორც ჩანს წინა დღეს სულ რესტორნებში ჰყავდათ და ალბათ კლუბში წასვლა თვითონ მოინდომა. იქ უცნაური სიტუაცია იყო, ცოტა არარეალური. ვხედავდი, ტრამპი როგორ იჯდა მაგიდასთან და ცეკვავდა... არ ვიცი უცებ როგორ მოვიფიქრე, ვის მივაჩეჩე ტელეფონი, ფოტო რომ გადამეღო. თვითონაც მითხრა, მოდი ფოტო გადავიღოთო, შენ ამომავალი ვარსკვლავი ხარ და მე შენთან ერთად ფოტო მინდაო..ასე შემრჩა ისტორიული ფოტო! სულით და გულით ვულოცავ დონალ ტრამპს გამარჯვებას, წარმატებებს ვუსურვებ!

წაიკითხეთ ასევე:

• "... ტრამპისგან შეიძლება უფრო მძიმე პასუხიც მივიღოთ" - როგორ შეიძლება აისახოს ტრამპის პრეზიდენტობა საქართველოზე, ასევე უკრაინასა და ახლო აღმოსავლეთში მიმდინარე ომებზე?