ესპანეთში, წყალდიდობის შედეგად დაღუპულთა რაოდენობა 62-მდე გაიზარდა. ინფორმაციას ესპანეთის საგანგებო სიტუაციების სამსახური ავრცელებს.
ესპანეთის პრემიერ-მინისტრმა, პედრო სანჩესმა სატელევიზიო მიმართვა გაავრცელა, რომელშიც განაცხადა, რომ ქვეყნის მთავრობა ვალენსიის რეგიონში წყალდიდობის შედეგად დაზარალებულების დასახმარებლად ყველაფერს გააკეთებს.
"იცოდეთ, ვინც ამ წუთებში საყვარელ ადამიანებს ეძებთ, მთელი ესპანეთი თქვენთან ერთად ტირის“, - განაცხადა პედრო სანჩესმა.
შეგახსენებთ, რომ სამხრეთ-აღმოსავლეთ ესპანეთში, მოსულმა უხვმა ნალექმა, რომელსაც რიგ ადგილებში სეტყვა მოჰყვა, წყალდიდობა გამოიწვია. სტიქიამ გაანადგურა ინფრასტრუქტურა. დანგრეულია სახლები, დაზიანებულია ასობით ავტომობილი.
მაშველებმა ამ დრომდე 62 ადამიანის ცხედარი იპოვეს. სამძებრო სამუშაოები ამ წუთებშიც გრძელდება და ოფიციალური პირების ცნობით, მთელი ღამის განმავლობაში გაგრძელდება.
"ნაპოვნია ცხედრები, მაგრამ, ოჯახების პატივისცემის გამო, არ ვაპირებთ დამატებითი მონაცემების მოწოდებას", - განუცხადა ჟურნალისტებს ვალენსიას რეგიონის ლიდერმა კარლოს მაზონმა.
ინტერნეტში ვრცელდება ვიდეოკადრები, რომელშიც ჩანს, რომ წყალმა ქალაქებისა და მცირე დასახლებების ინფრასტრუქტურა გაანადგურა. წაიღო ხიდები, მანქანები და შენობები.
იხილეთ ასევე:
- ესპანეთი დამანგრეველ სტიქიას ებრძვის - წყალდიდობამ დასახლებები გაანადგურა: არიან გარდაცვლილები და უგზო-უკვლოდ დაკარგულები (ფოტოები)
- "მადლობას გიხდით მთელ საქართველოს... ჩვენ ერთად ვერცერთი სტიქია და ვერაფერი მოგვერევა" - ვალენსიის რეგიონი სტიქიას ებრძვის: რას წერს "ლევანტეს" ადმინი ქართულ ენაზე?
