"ფეისბუქი" ხარვეზებით მუშაობს, ეს განსაკუთრებით აპლიკაციას შეეხება

ბოლო რამდენიმე საათია, Facebook-ის მუშაობაში ხარვეზებია. როგორც სოციალური ქსელის მომხმარებლები იტყობინებიან, პლატფორმაზე ჭირს გვერდების გახსნა. ფბგვერდები ძირითადად მობილურის ვერსიაში არ იხსნება, თუმცა კომპიუტერიდან მუშაობს.

ვებ-საიტ downdetector.com-ზე გამოქვეყნებული ინფორმაციის თანახმად, "ფეისბუქის" ფუნქციონირებაში ხარვეზები დაახლოებით 4 საათის წინ დაიწყო, თუმცა ზოგიერთი მომხმარებელი გვერდების მუშაობასთან დაკავშირებით მანამდეც ჩიოდა. მაგალითად, ერთ-ერთმა მომხმარებელმა დაახლოებით 13 საათის წინ დაწერა, რომ რიგ გვერდებზე მისი მიერ დაწერილ კომენტარებს ვერავინ ნახულობდა.

"როცა ნებისმიერ გვერდზე კომენტარს ვტოვებ, სხვა ადამიანები მას ვერ ხედავენ, ჩემს კომენტარს მარტო მე ვხედავ. ჩემს დას შევამოწმებინე და მიუხედავად იმისა, რომ კომენტარები განვათავსე, ის ვერც ერთ მათგანს ვერ კითხულობს", - აღნიშნა მომხმარებელმა Reddit-ზე.

downdetector.com-ზე პროცენტული მაჩვენებლებითაა მოცემული, რა სახის პრობლემები აღინიშნა "ფეისბუქის" მუშაობასთან დაკავშირებით. ხარვეზების 72% აპლიკაციაზე მოდის, საიტის დესკტოპ ვერსია პრობლემურად მომხმარებელთა 16%-მა დაასახელა, ხოლო მთავარ გამოწვევად სერვერული კავშირი 12%-მა მონიშნა.

"ფეისბუქს" ოფიციალური განცხადება ჯერ არ გაუკეთებია.