შვედეთი, საფრანგეთი, ლატვია, ჩეხეთი და პოლონეთი - რას აცხადებენ ოფიციალური პირები საქართველოს არჩევნებთან დაკავშირებით: შეშფოთება, რეკომენდაციები და მხარდაჭერა ხალხს

26 ოქტომბერს, საქართველოში გამართულ საპარლამენტო არჩევნებსა და შედეგებს, რომელიც ჯერ საბოლოოდ არ გაფორმებულა, სხვადასხვა ქვეყნის ოფიციალური წარმომადგენლები ეხმაურებიან.

მათი თქმით, ეუთო/ოდირის დასკვნამ ცხადყო, რომ პროცესის დროს უამრავი დარღვევა დაფიქსირდა. ამასთან, დასაზუსტებელია და გასასწორებელია ნიუანსები, როგორიცაა - სამოქალაქო საზოგადოების პოზიციადა ფუნდამენტური უფლებების შემზღუდველი კანონები.

• შვედეთი

შვედეთის საგარეო საქმეთა მინისტრის განცხადებით, “სერიოზულად შეშფოთებული ვართ დარღვევებით საქართველოს არჩევნებში, რომლებიც ეუთო/ოდირმა და სხვა დამკვირვებლებმა დააფიქსირეს“.

როგორც ქვეყნის საგარეო საქმეთა მინისტრი მარია სტენეგარდი სოციალურ ქსელში წერს, ის “ნდობის აღსადგენად“, საქართველოს ოფიციალურ პირებს მოუწოდებს, სანდოდ მოეკიდონ წუხილებს ინკლუზიურ პოლიტიკურ პროცესში.

“მზად ვართ ვიმუშაოთ საქართველოს ევროპულ ინტეგრაციაზე ყველა ძალასთან პარლამენტში, ვინც ნამდვილად ერთგულია ევროპული ღირებულებებისა და პრინციპების. სამოქალაქო საზოგადოებისა და ფუნდამენტური უფლებების შემზღუდველი კანონები ძირს უთხრის საქართველოს ევროკავშირის მისწრაფებებს და ზრდის პოლარიზაციას. ისინი უნდა გაიწვიოს”, - წერს მარია სტენეგარდი.

• საფრანგეთი

“ეუთო/ოდირის დასკვნები ადასტურებს საფრანგეთის შეშფოთებას საქართველოში მიმდინარე მოვლენებზე - მოველით, რომ ოფიციალური პირები დარღვევების შესახებ ცნობებს გამოიძიებენ“, - ამის შესახებ საფრანგეთის საგარეო საქმეთა მინისტრი, ჟან-ნოელ ბარო სოციალურ ქსელში წერს.

მისი თქმით, თუ საქართველოს ევროკავშირის გზაზე დაბრუნება სურს, პატივი უნდა სცეს ფუნდამენტურ უფლებებსა და პოლიტიკურ პლურალიზმს.

“ეუთო/ოდირის დასკვნები ადასტურებს საფრანგეთის შეშფოთებას საქართველოში მიმდინარე მოვლენებზე, სადაც ცოტა ხნის წინ საპარლამენტო არჩევნები ჩატარდა. მოველით, რომ ოფიციალური პირები დარღვევების შესახებ ცნობებს გამოიძიებენ. ფუნდამენტურ უფლებებსა და პოლიტიკურ პლურალიზმს პატივი უნდა სცენ თუ საქართველოს ევროკავშირისკენ გზაზე დაბრუნება სურს”, - წერს საფრანგეთის საგარეო საქმეთა მინისტრი, ჟან-ნოელ ბარო.

• ლატვია

ლატვიის პრეზიდენტი ედგარს რინკევიჩსი “ტვიტერის” პირად გვერდზე განცხადებას ავრცელებს და წერს, რომ “ქართველ ხალხს ევროპული ოცნება აქვს, არავის აქვს დაშინებისა და მანიპულაციის მეშვეობით ამ ოცნების მოპარვის უფლება“.

“სრული სოლიდარობა ქართველ ხალხისა და პრეზიდენტ სალომე ზურაბიშვილის მიმართ”, - წერს რინკევიჩსი.

• ჩეხეთი

“ჩეხეთი შეშფოთებულია საქართველოში საპარლამენტო არჩევნების დროს დაფიქსირებული დარღვევების გამო, ყურადღებით ვაკვირდებით ქვეყანაში არსებულ ვითარებას და მოვუწოდებთ ყველა მხარეს, თავი შეიკავონ ძალადობისგან“, - ასე ეხმაურება ჩეხეთის საგარეო საქმეთა სამინისტრო საქართველოში გამართულ საპარლამენტო არჩევნებს.

უწყება აცხადებს, რომ საქართველოს ხელისუფლებამ პატივი უნდა სცეს დემოკრატიულ ღირებულებებს.

“საქართველოს ხელისუფლებამ პატივი უნდა სცეს დემოკრატიულ ღირებულებებს და შეცვალოს ის ქმედებები, რომლებიც საფრთხეს უქმნის საქართველოს ევროპულ მიმართულებას“, - აღნიშნულია განცხადებაში.

• პოლონეთი

პოლონეთის საგარეო საქმეთა მინისტრი, რადოსლავ სიკორსკი საქართველოს პრეზიდენტის, სალომე ზურაბიშვილის განცხადებას ეხმაურება და აცხადებს, რომ ევროპა ქართველ ხალხის გვერდით უნდა დაუდგეს.

“საქართველოს პრეზიდენტმა განაცხადა, რომ საპარლამენტო არჩევნები გაყალბდა. ევროპა ახლა ქართველ ხალხს გვერდით უნდა დაუდგეს“, - წერს სიკორსკი სოციალურ პლატოფრმა X-ზე.

ცნობისთვის, საქართველოს პრეზიდენტი სალომე ზურაბიშვილი აცხადებს, რომ საქართველოში 26 ოქტომბრის საპარლამენტო არჩევნებზე იყო "ტოტალური გაყალბება", შესაბამისად, პრეზიდენტი არ აღიარებს არჩევნებს. მისი აზრით, ამ არჩევნების აღიარება "არის რუსეთის შემოსვლის აღიარება". ამასთან, პრეზიდენტი აღნიშნავს, რომ საპარლამენტო არჩევნებზე ტექნოლოგია იქნა გამოყენებულ იმისთვის, რათა "გაეთეთრებინა გაყალბება". პრეზიდენტ ზურაბიშვილის თქმით, "ვიყავით მოწმე და მსხვერპლი რუსული სპეცოპერაციის, ჰიბრიდული ომის ერთ-ერთი ახალი ფორმის, რომელიც ხალხზე განხორციელდა". პრეზიდენტი და ოპოზიციური პარტიები საზოგადოებას 28 ოქტომბერს, რუსთაველის გამზირზე მისვლისკენ მოუწოდებენ, ამასთან, პრეზიდენტი მიმართავს პარტნიორებს, დაუდგნენ საქართველოს მოსახლეობას გვერდით.

იხილეთ ასევე:

• ცნობილია ეუთო/ოდირის შეფასება - რა განცხადებები გაკეთდა პრესკონფერენციაზე
• “სურათი ნათელია - გუშინდელი არჩევნები, თბილისში პუტინის მარიონეტულმა მთავრობამ მოიპარა“ - როგორ ეხმაურებიან არჩევნების შედეგებს საერთაშორისო დონეზე