“რამდენიმე საათი დარჩა სანატრელ ცვლილებამდე - ეს იქნება საამაყო დღე ჩვენი ქვეყნის ისტორიაში“ - ოპოზიციონერი ლიდერები მიმართვას ავრცელებენ
“არავის ეშინია ძალადობის! - შესაძლოა, ერთი უბანი გააუქმონ, მაგრამ ვერ გააუქმებენ გამარჯვებას მთელი საქართველოს მასშტაბით და ქვეყნის ფარგლებს გარეთ, სადაც ასევე, აქტიურობს ემიგრაცია“, - ამის შესახებ “ერთიანობა - ნაციონალური მოძრაობის“ თავმჯდომარემ, თინა ბოკუჩავამ განაცხადა.
მისივე თქმით, ძალადობას მიმართავს ხელისუფლება, რომელსაც ეშინია ძალაუფლების დაკარგვის.
“ახლა ვართ კლინიკასთან, სადაც “ერთიანობა ნაციონალური მოძრაობის“ ადგილობრივი ორგანიზაციის თავმჯდომარე, აზატ კარიმოვი იმყოფება, რომელსაც “ქართული ოცნების“ წარმომადგენლები თავს დაესხნენ. ძალადობას მიმართავს ხელისუფლება, რომელსაც ეშინია ძალაუფლების წაგების, ჩვენ ვნახეთ, ასევე უბანი, რომელიც საერთოდაც გააუქმეს ყუთში ბიულეტენების ჩაყრის გამო, მაგრამ არავის ეშინია ძალადობის! - შესაძლოა, ერთი უბანი გააუქმონ, მაგრამ ვერ გააუქმებენ გამარჯვებას მთელი საქართველოს მასშტაბით და ქვეყნის ფარგლებს გარეთ, სადაც ასევე, აქტიურობს ემიგრაცია. დღეს იმარჯვებს საქართველო, იმარჯვებს საქართველოს ევროპული არჩევანი და ასე რომ, ყველანი არჩევნებზე! თითოეული ხმა გადამწყვეტია, ყველანი გავხდეთ იმ დიდი ეროვნული გამარჯვების თანამონაწილე, რომელსაც სულ რამდენიმე საათში აღვნიშნავთ“, - განაცხადა თინა ბოკუჩავამ.
- “კოალიცია ცვლილებისთვის“ ერთ-ერთი ლიდერის, ელენე ხოშტარიას განცხადებით, “წარმოუდგენლად დიდია [ადამიანების] მონაწილეობა - ეს იქნება საამაყო დღე ქვეყნის ისტორიაში“.
ხოშტარიას თქმით, კოალიცია მოსახლეობას გარანტიას აძლევს, რომ მათი ხმა “დაცული და ევროპული ინტეგრაციის დასაწყისისკენ იქნება მიმართული“.
“რამდენიმე საათი დარჩა იმ სანატრელ ცვლილებამდე, რომლისთვისაც ძალიან ბევრი გააკეთა ჩვენმა მოქალაქეებმა, ახალგაზრდებმა. თვეების განმავლობაში და კონკრეტულად დღეს, მართლაც გაკვირვებულები, გულანთებულები ვუყურებთ ემიგრანტებს, მათ რიგებს საარჩევნო უბნებთან, ადამიანების განწყობებს, რომ არ დათმონ ქვეყანა და მოიპოვონ ევროპული მომავალი. მინდა მივმართო ყველას, წარმოუდგენლად დიდია [ადამიანების] მონაწილეობა. ძალიან ცოტა გვაშორებს გამარჯვებამდე. უბრალოდ, ყველა მოქალაქემ უნდა მიიღოს მონაწილეობა ამ გამარჯვებაში. ეს იქნება საამაყო დღე ჩვენი ქვეყნის ისტორიაში. ვნახეთ წვიმა და სხვადასხვა ბარიერი, მაგრამ არაფერმა გააჩერა ეს ხალხი. პირიქით, ჰიმნებით, დიდი შემართებით მიდიან საარჩევნო უბნებში. ასე გავაგრძელოთ ეს დარჩენილი საათები. ჩვენ, “კოალიცია ცვლილებისთვის“, სრული პასუხისმგებლობით გარანტიას გაძლევთ, რომ თქვენი მიცემული ხმა დაცული და ევროპული ინტეგრაციის დასაწყისისთვის მიმართული იქნება“,- განაცხადა ელენე ხოშტარიამ.