“მიწოდებს ყველაფერს, რაც მახინჯ გონებაში მოსდის“ - ხმაურიანი დაპირისპირება ოპონენტებს შორის: კამალა ჰარისმა დონალდ ტრამპს “ფაშისტი“ უწოდა

აშშ-ის პრეზიდენტობის კანდიდატმა “დემოკრატიული“ პარტიიდან, კამალა ჰარისმა დონალდ ტრამპს “ფაშისტი“ უწოდა.

“მიმაჩნია, რომ დონალდ ტრამპი არის არასტაბილური, სულ უფრო არასტაბილური და თანამდებობისთვის შეუფერებელი“, - აღნიშნა ჰარისმა მედიასთან შეხვედრისას.

• CNN-ის მოდერატორის კითხვაზე : “ფიქრობთ, რომ დონალდ ტრამპი ფაშისტია?“ - ჰარისმა უპასუხა: “დიახ, ასე ვფიქრობ“.

“ადამიანები, რომლებიც მუშაობდნენ მასთან თეთრ სახლში, ყველა “რესპუბლიკელი“, სხვათა შორის, რომლებიც მსახურობდნენ მის ადმინისტრაციაში, მისი ყოფილი შტაბის უფროსი, მრჩეველი ეროვნული უსაფრთხოების საკითხებში, თავდაცვის ყოფილი მინისტრები და მისი ვიცე-პრეზიდენტი, ყველა საშიშს და შეუფერებელს უწოდებს მას. მათ ცალსახად განაცხადეს, რომ ის აბუჩად იგდებს შეერთებული შტატების კონსტიტუციას. მათ თქვეს, რომ ის აღარასოდეს უნდა იყოს შეერთებული შტატების პრეზიდენტი“, - აღნიშნა ჰარისმა.

მანამდე, ჯონ კელიმ, რომელიც ტრამპის ადმინისტრაციაში თეთრი სახლის აპარატის უფროსი იყო, The Atlantic-თან ინტერვიუში განაცხადა, რომ ტრამპმა შეაქო ადოლფ ჰიტლერის გენერლები ერთგულებისთვის. ინტერვიუს დონალდ ტრამპის საარჩევნო შტაბი გამოეხმაურა და განაცხადა, რომ “ეს აბსოლუტურად მცდარია და პრეზიდენტ ტრამპს არასოდეს უთქვამს ეს“.

• ოპონენტის გაცხადებას გამოეხმაურა დონალდ ტრამპიც.

“ამხანაგი კამალა ჰარისი ხედავს, რომ აგებს და ძალიან აგებს, განსაკუთრებით მას შემდეგ, რაც ჯო ბაიდენს არჩევნები მოპარა, ასე რომ, ახლა ის სულ უფრო ამაღლებს თავის რიტორიკას და მიდის იქამდე, რომ მიწოდებს ადოლფ ჰიტლერს და სხვა ყველაფერს, რაც მახინჯ გონებაში მოსდის, - აღნიშნა აშშ-ის პრეზიდენტობის კანდიდატმა “რესპუბლიკური პარტიიდან“.

მისი მტკიცებით, კამალა ჰარისი აფრთხეს უქმნის დემოკრატიას და არ არის შესაფერისი შეერთებული შტატების პრეზიდენტის პოსტისთვის.

იხილეთ ასევე:

• დონალდ ტრამპმა "მაკდონალდსში" იმუშავა, ფრი მოამზადა და მოქალაქეებს მოემსახურა - "მეტხანს ვიმუშავე, ვიდრე კამალამ“
• "ვლადიმერ პუტინს ორმხრივად, უკრაინის მონაწილეობის გარეშე არ შევხვდები" - კამალა ჰარისი