“ევროპაში მომავალი სასწორზე დევს... გადამწყვეტი მომენტი ქართველებისთვის” - რას წერს BBC - ი საქართველოზე?
BBC - ი საქართველოში არსებულ პოლიტიკურ ვითარებასა და მომავალ არჩევნებს სტატიას უძღვნის. გთავაზობთ სტატიის თარგმანს:
"აირჩიეთ მშვიდობა და არა ომი" - ეს არის მთავარი გზავნილი "ქართული ოცნებისგან", პარტიისგან, რომელიც საქართველოში ბოლო 12 წლის განმავლობაში ხელისუფლებაშია.
26 ოქტომბერს ქართველების გადამწყვეტი არჩევანის წინ, რუსეთის ომი უკრაინაში მნიშვნელოვან როლს თამაშობს მმართველი პარტიის საარჩევნო კამპანიაში.
ბილბორდებზე დაბომბილი უკრაინული ეკლესიები და საცურაო აუზები, გადამწვარი ავტობუსები და სასკოლო საკლასო ოთახებია ნაჩვენები და ისინი საქართველოს მშვიდობიან ცხოვრების ამსახველ ფოტოებთან არის შედარებული.
ნაგულისხმევია, რომ ოპოზიცია საქართველოს უკრაინის მსგავს ომში ჩაითრევს, ხოლო "ქართული ოცნება" მშვიდობის გარანტიას იძლევა.
ეს მძლავრი გზავნილია 3.7 მილიონი მოსახლეობის ქვეყანაში, რომელიც რუსეთს ესაზღვრება და 2008 წელს მეზობელთან მოკლე, მაგრამ დამანგრეველი კონფლიქტი გადაიტანა.
ქვეყნის ოპოზიციის თქმით, რომელიც მომავალ არჩევნებში რამდენიმე პროდასავლური კოალიციითაა წარმოდგენილი, ნამდვილი საფრთხე ევროკავშირში გაწევრების ერთჯერად შესაძლებლობასთან ერთად, ქართული დემოკრატიის დაკარგვაა.
საქართველომ ევროკავშირის კანდიდატის სტატუსი 2023 წლის დეკემბერში მიიღო, მაგრამ ევროკავშირმა გაწევრების პროცესი "ქართული ოცნების" მიერ გაძლიერებული ანტიდასავლური რიტორიკისა და 2024 წლის ივნისში მიღებული საკამათო "უცხოური გავლენის" კანონის გამო, გაყინა.
ეს არის კანონი, რომელმაც გაზაფხულზე ათი ათასობით ახალგაზრდა ქართველი დემონსტრანტი ქუჩაში გამოიყვანა. კანონი მოითხოვს, რომ მედია და სამოქალაქო საზოგადოების ჯგუფები, რომლებიც საზღვარგარეთიდან ფინანსდებიან, დარეგისტრირდნენ, როგორც უცხო ქვეყნის ინტერესებით მოქმედნი. დემონსტრანტები კანონს ქვეყნის დემოკრატიისა და ევროპული მომავლის საფრთხედ მიიჩნევდნენ
კრიტიკოსები ამბობენ, რომ ის რუსული კანონითაა შთაგონებული, რომელიც დისიდენტობის ჩასახშობად გამოიყენება.
საქართველოს ყველაზე გავლენიანმა ადამიანმა, მილიარდერმა ბიძინა ივანიშვილმა ოპოზიციური ჯგუფების აკრძალვის დაპირება გასცა იმ შემთხვევაში, თუ "ქართული ოცნება" გაიმარჯვებს. სწორედ მან დააარსა მმართველი პარტია და ამჟამად მისი საპატიო თავმჯდომარეა.
ის ყველა ოპოზიციურ ჯგუფს საქართველოს უდიდესი ოპოზიციური პარტიის სახელწოდებით აერთიანებს, როგორც კოლექტიურ “ერთიან ნაციონალურ მოძრაობას”, ანუ ენმ-ს.
"დღეს, კოლექტიური ენმ, რომელსაც საზღვარგარეთიდან უჭერენ მხარს, ცდილობს ხელისუფლებაში მოსვლას არეულობის გზით და ქვეყნის ომსა და ქაოსში ჩათრევას", - უთხრა ივანიშვილმა მხარდამჭერებს ბათუმში 10 ოქტომბერს, - "ამას ერთხელ და სამუდამოდ უნდა მოეღოს ბოლო. ამიტომაც სჭირდება საქართველოს, რომ მმართველმა პარტიამ 26 ოქტომბრის არჩევნებში საკონსტიტუციო უმრავლესობა მოიპოვოს".
ომის საფრთხე და სხვა "საფრთხეები" მნიშვნელოვან ადგილს იკავებს პროსამთავრობო მედიაში.
მათ შორისაა იდეა, რომ ევროპას სურს ქართველი მამაკაცები გეებად აქციოს ან რომ "უცხოელი აგენტების" არმია ქვეყნის აქტიური სამოქალაქო საზოგადოებიდან და თავისუფალი მედიიდან "გლობალური ომის პარტიის" შეთქმულების ნაწილია, რათა რევოლუციის გაღვივებას შეუწყოს ხელი.
ამ, ფოტოზე დასავლეთ საქართველოს ქალაქ ქუთაისში რამდენიმე ასეული მხარდამჭერი სცენაზე გამოსულ ნიკა გვარამიას უსმენს, ოპოზიციური კოალიციიდან "ცვლილებებისთვის", რომელსაც უკანა ფონად ეკრანებზე ევროკავშირისა და საქართველოს დროშები უნათებს.
"ჩვენი მომავალი ევროპაშია", - ყვირის ის.
მისი კოალიცია მიზნად ისახავს, მიიზიდოს საქართველოს Z თაობის ამომრჩევლები - სწორედ ის ადამიანები, რომელთა დიდი ნაწილიც "უცხოური გავლენის" კანონის წინააღმდეგ გამართულ საპროტესტო აქციებზე გამოვიდა.
სცენიდან ჩამოსვლისას მან BBC-ს უთხრა, რომ საპარლამენტო არჩევნები არსებითად, რეფერენდუმია საქართველოს ევროპულ მომავალზე.
"არ არსებობს რაიმე საფრთხე მშვიდობისთვის საქართველოში," - თქვა გვარამიამ, - "ეს რუსული პროპაგანდაა. ჩვენი დღის წესრიგის მთავარი საკითხია, როგორ გადავრჩეთ. როგორ გადავარჩინოთ ჩვენი სამშობლო. ეს არის საკითხი - რუსეთი თუ ევროპა."
ოპოზიცია იმედოვნებს, რომ მომავალი კვირის კენჭისყრა საქართველოში პირველ კოალიციურ მთავრობას მოიყვანს და დაასრულებს იმას, რასაც ისინი "ქართული ოცნების" "ერთპარტიულ მმართველობას" უწოდებენ.
თუმცა, "ქართული ოცნება", ბიძინა ივანიშვილის ხელმძღვანელობით, დარწმუნებულია, რომ გადამწყვეტ გამარჯვებას მოიპოვებს.
"ჩვენ მივაღწიეთ ისტორიულ მაქსიმუმს მხარდაჭერის რეიტინგში, ძირითადად ორი ფაქტორის გამო. პირველი არის ის, რომ გამოწვევების მიუხედავად, ჩვენს ქვეყანაში მშვიდობა უზრუნველყოფილია. მეორე არის სწრაფი ეკონომიკური ზრდა ბოლო 3-4 წლის განმავლობაში", - განაცხადა პრემიერ-მინისტრმა ირაკლი კობახიძემ 7 ოქტომბერს, პარტიის საარჩევნო პროგრამის წარდგენისას.
კრიტიკოსები კი იმ ქართველების რაოდენობაზე მიუთითებენ, რომლებიც სამუშაოდ საზღვარგარეთ მიდიან. ოფიციალური სტატისტიკის თანახმად, 2023 წელს 243 000 ადამიანი ემიგრაციაში წავიდა.
"თუ ეკონომიკა ასე საოცრად კარგად მუშაობს, რატომ ტოვებენ ქართველები ქვეყანას?" - კითხულობს ზვიად აძინბაია, ტაფტსის უნივერსიტეტის ფლეტჩერის სამართლისა და დიპლომატიის სკოლის უფროსი მკვლევარი.
ოპოზიცია ჩივის, რომ ხელისუფლებამ არ მოაწყო საკმარისი რაოდენობის საარჩევნო უბნები საქართველოს ფარგლებს გარეთ.
ცენტრალურმა საარჩევნო კომისიამ გასულ თვეს განაცხადა, რომ 42 ქვეყანაში 60 საარჩევნო უბანს გახსნიდა.
ევროკავშირმა, აშშ-მ და გაერთიანებულმა სამეფომ თავიანთი აზრი გამოთქვეს იმ მიმართულების შესახებ, სადაც "ქართული ოცნება" მიაქანებს ქვეყანას - საუბარია დემოკრატიის უკუსვლასა და ნარატივებზე, რომლებიც მხოლოდ რუსეთს ემსახურება.
სამშაბათს გაერთიანებულმა სამეფომ ყოველწლიური უსაფრთხოების დიალოგი გაყინა საქართველოსთან, საქართველოში ბრიტანელმა ელჩმა შეშფოთება გამოთქმა დემოკრატიის დაქვეითებისა და ქართული მთავრობის მხრიდან ანტიდასავლური რიტორიკის გამო (ნახსენებია "ინტერპრესნიუსის" ინტერვიუ გაერთიანებული სამეფოს ელჩ გარეტ უორდთან - რედ).
კრემლი ამტკიცებს, რომ არ ერევა საქართველოს საშინაო საქმეებში და ამბობს, რომ დასავლეთი მთავრობაზე ზეწოლის მოსახდენად "უტიფარ მცდელობებს" მიმართავს.
თუმცა, დიდი ქალაქების მიღმა, ბევრ ქართველს მაინცდამაინც გეოპოლიტიკა არ აწუხებს.
თვეების განმავლობაში, 66 წლის თამაზ ნეფარიძე და სხვები შუქრუთიდან პარლამენტის წინ საპროტესტო აქციებზე გამოდიოდნენ და ამბობდნენ, რომ მათი სოფელი ჭიათურის ზემოთ გორაკზე უზარმაზარი მიწისქვეშა მაღაროების ქსელის გამო ინგრეოდა.
ისინი თავიანთ გაჭირვებაში სამთო კომპანიასა და მთავრობას ადანაშაულებდნენ.
"ყველანაირი მოლოდინი დავკარგე. არ მგონია, რომ ამ არჩევნებში მივიღებ მონაწილეობას, ამ ყველაფრის არ მჯერა", - ამბობს ის".