რუსები პუტინს განუდგნენ? - გამოკითხულთა 47% ომში უფრო მეტ ზიანს ხედავს, ვიდრე - სიკეთეს, 54% სამშვიდობო მოლაპარაკებების მომხრეა
რუსეთის მოქალაქეების თითქმის ნახევარი (47%) თვლის, რომ უკრაინაში რუსული ჯარების შეჭრამ უფრო მეტი ზიანი მოიტანა ქვეყანაში, ვიდრე სიკეთე.
ამის შესახებ ნათქვამია “ლევადა ცენტრის“ მიერ, სექტემბერში ჩატარებული სოციოლოგიური გამოკითხვის შედეგებში.
აღნიშნულია, რომ სრულმასშტაბიანი ომის დაწყების შემდეგ, ეს ყველაზე მაღალი მაჩვენებელია.
ამავდროულად, მათი წილი, ვინც დარწმუნებულია პუტინის მიერ დაწყებული ეგრეთ წოდებული “სპეციალური სამხედრო ოპერაციის“ სარგებელში, წლის განმავლობაში, 38-დან 28%-მდე - ათი პუნქტით დაეცა.
ასევე მცირდება რუსების რიცხვი, რომლებიც თვლიან, რომ ბრძოლა კარგად მიმდინარეობს. თებერვალში ასეთი მოქალაქეები 70%-ს შეადგენდნენ, ახლა მათი წილი ათი პუნქტით შემცირდა.
- უკვე სექტემბერში რესპონდენტთა 54% იყო სამშვიდობო მოლაპარაკებების მომხრე.
2016 წელს, იური ლევადას არასამთავრობო კვლევითი ცენტრი, ანუ “ლევადა ცენტრი“, რომელიც რეგულარულად ატარებს სოციოლოგიურ და მარკეტინგულ კვლევებს, რუსეთის ხელისუფლებამ “უცხო აგენტად“ გამოაცხადა.
ორგანიზაცია ამას არ ეთანხმება.
არაერთხელ აღინიშნა, რომ “ლევადა ცენტრის“ კვლევების შედეგები მნიშვნელოვნად განსხვავდება სახელმწიფო სოციოლოგიური სამსახურების გამოკითხვის შედეგებისგან.