პარტნიორები:
ავტორი:

ერთი წელი ისრაელზე "ჰამასის" ბარბაროსული თავდასხმიდან: ათასობით დაღუპული, განადგურებული ღაზის სექტორი და ახლო აღმოსავლეთი ფართომასშტაბიანი ომის ზღვარზე

ერთი წელი ისრაელზე "ჰამასის" ბარბაროსული თავდასხმიდან: ათასობით დაღუპული, განადგურებული ღაზის სექტორი და ახლო აღმოსავლეთი ფართომასშტაბიანი ომის ზღვარზე

ერთი წელი შესრულდა 2023 წლის 7 ოქტომბერს, ისრაელში დატრიალებული ხოცვა-ჟლეტიდან, როდესაც "ჰამასის" თავდასხმას 1200 ადამიანი, ძირითადად, მშვიდობიანი მოქალაქეები ემსხვერპლნენ. 250-ზე მეტი მძევლად აიყვანეს და ღაზაში გადაიყვანეს. ისრაელმა ამ თავდასხმას ღაზის სექტორში სამხედრო ოპერაციის დაწყებით უპასუხა, რომლის მიზანიც, მათი განმარტებით, “ჰამასის“ რეჟიმის დამხობა, მისი სამხედრო შესაძლებლობების მოშლა და მძევლების გათავისუფლებაა.

ისრაელის თავდაცვის ძალებმა “ჰამასსთან“ ომის დაწყებიდან ერთი წლის თავზე ღაზას სექტორში, დასავლეთ სანაპიროსა და ლიბანში ოპერაციების შესახებ ახალი მონაცემები გამოაქვეყნეს.

ამ მონაცემების თანახმად, ომის დაწყებიდან ღაზას სექტორში ლიკვიდირებულია “ჰამასის“, დაახლოებით, 17 000 მებრძოლი და ეს მაჩვენებელი არ მოიცავს “ჰამასის“ იმ 1 000 მებრძოლს, რომლის ლიკვიდაციაც 7 ოქტომბერს ისრაელში განხორციელდა. ამასთანავე, ისრაელელმა ჯარისკაცებმა ომის დაწყებიდან ღაზის სექტორში 40 300-მდე სამიზნეს დაარტყეს და 4 700 გვირაბი აღმოაჩინეს.

რაც შეეხება ლიბანს, ისრაელის თავდაცვის ძალების ცნობით, ლიბანში 800-ზე მეტი ტერორისტის, ძირითადად “ჰეზბოლას“ წევრების ლიკვიდაცია განახორციელეს და დაჯგუფების 11 000-მდე პოზიციას დაარტყეს.

ამასთანავე, 2023 წლის 7 ოქტომბრის შემდეგ, ისრაელის მიმართულებით 26 000-ზე მეტი რაკეტა ისროლეს. აქედან 13 200 - ღაზის სექტორიდან, 12 400 - ლიბანიდან, 60 - სირიიდან, 180 - იემენიდან, 400 - ირანიდან. თავდაცვის ძალების მონაცემებით, ომის დაწყების შემდეგ 728 ისრაელელი ჯარისკაცი, რეზერვისტი და უსაფრთხოების ოფიცერი დაიღუპა და 4 576 დაიჭრა. აქედან 346 ღაზას სექტორში სახმელეთო ოპერაციას ემსხვერპლა..

  • 2023 წლის 7 ოქტომბრიდან- 2024 წლის 7 ოქტომბრამდე: ომის ერთი წელი ფოტოებში

ერთი წლის წინ, ახლო აღმოსავლეთში ბოლო ნახევარი საუკუნის განმავლობაში ყველაზე დიდი შეიარაღებული კონფლიქტი დაიწყო. “ჰამასის“ მებრძოლები სამხრეთ ისრაელში, ერთ-ერთ ფესტივალზე შეკრებილებს დაესხნენ თავს და სასტიკი სისხლისღვრა მოაწყვეს.

მას შემდეგ, ორივე მხარეს მსხვერპლთა რიცხვი გაასმაგდა. ხოლო საომარი მოქმედებების ლიბანში გავრცელების შემდეგ, სიტუაცია ფართომასშტაბიანი რეგიონული ომის ზღვარზეა.

2023 წლის 7 ოქტომბერს, გამთენიისას ღაზის სექტორიდან ისრაელის სამხრეთ ქალაქებში უჩვეულოდ დიდი რაოდენობით რაკეტები გაისროლეს. “ჰამასის“ ათასობით მებრძოლმა გაანადგურა პალესტინის ტერიტორიასა და ისრაელს შორის არსებული ღობე და თავს დაესხა საზღვართან ყველაზე ახლოს დასახლებულ ტერიტორიებს.

თავდამსხმელთა გზაზე ერთ-ერთი პირველი სამიზნე გახდა მუსიკალური ფესტივალი “სუპერნოვა“, რომელიც ტარდებოდა ისრაელის არდადეგებზე საზღვრიდან რამდენიმე კილომეტრში.

შეიარაღებული პალესტინელები კიბუცაში და ისრაელის სხვა დასახლებებში შეიჭრნენ. მათ საზღვრისპირა სოფლებში დაუნდობელი ხოცვა-ჟლეტა მოაწყვეს.

გაირკვა, რომ მოკლული იყო ასობით მშვიდობიანი მოქალაქე. თავდამსხმელებმა მძევლად აიყვანეს 253 ადამიანი და გადაიყვანეს ღაზის სექტორში. მსხვერპლთა დათვლა რამდენიმე კვირა გაგრძელდა, გარდაცვლილთა იდენტიფიცირებას კი რამდენიმე თვე დასჭირდა.

  • უკვე 7 ოქტომბერს ისრაელის პრემიერ-მინისტრმა ბენიამინ ნეთანიაჰუმ სიტყვა “ომი“ ახსენა, ხოლო ღაზაზე პირველი ძლიერი საარტილერიო და საჰაერო დარტყმები განხორციელდა.

ნეთანიაჰუმ გამოაცხადა მზადება ღაზას სექტორში სახმელეთო ოპერაციისთვის. მისი მიზანი იყო “ჰამასის“ სამხედრო სტრუქტურის განადგურება და მძევლების გათავისუფლება.

ისრაელის პირველივე დარტყმებმა ღაზაზე გამოიწვია მრავალი ნგრევა და მსხვერპლი მშვიდობიან მოსახლეობაში. ისრაელის არმიამ ღაზის მოსახლეობას ტერიტორიების დატოვებისკენ მოუწოდა.

27 ოქტომბერს ისრაელმა ღაზაში სრულმასშტაბიანი სახმელეთო ოპერაცია დაიწყო. ეს გახდა ყველაზე დიდი სამხედრო კონფლიქტი ახლო აღმოსავლეთში ბოლო 50 წლის განმავლობაში და გამოიწვია ყველაზე დიდი მსხვერპლი პალესტინელებს შორის.

თუმცა, “ჰამასის“ თავდასხმიდან გასული წლის განმავლობაში, მძევლების ნაწილის ბედი კვლავ გაურკვეველია.

ევაკუაციის პროცესში, ისრაელს არაერთხელ დასდეს ბრალი ღაზის სექტორისთვის ჰუმანიტარული მიწოდების მიზანმიმართულ შეზღუდვაში. თუმცა, ისრაელის ხელისუფლებამ ყველა ბრალდებაზე განაცხადა, რომ ღაზაში საკვებისა და წყლის მიწოდების პროცესი გაერომ ცუდად დააორგანიზა.

21 ნოემბერს, ღაზაში სახმელეთო ოპერაციის დაწყებიდან თვენახევრის შემდეგ, ისრაელმა და ჰამასმა ზავი გამოაცხადეს. მისი მთავარი შედეგი იყო 7 ოქტომბერს აყვანილი ისრაელელი მძევლების დაახლოებით ნახევრის გაცვლა 250 პალესტინელ პატიმარზე - ქალებსა და არასრულწლოვანებზე ისრაელის ციხეებში. ღაზაში დარჩენილებმა განაგრძეს სახლების დატოვება.

1 დეკემბერს ზავი დასრულდა, ისრაელმა საომარი მოქმედებები განაგრძო. 2024 წლის სექტემბრის ბოლოს, გაერომ, თანამგზავრულ მონაცემებზე დაყრდნობით განაცხადა, რომ ღაზას სექტორში ყველა შენობის 66% დაზიანდა.

იანვრის დასაწყისში ისრაელის არმიამ განაცხადა, რომ მან დაასრულა “ჰამასის“ სარდლობის სტრუქტურის დემონტაჟი ღაზას სექტორის ჩრდილოეთ ნაწილში. მას შემდეგ სამხედროებმა განაცხადეს ათობით პალესტინელი მეთაურის და ათასობით მებრძოლის დაღუპვის შესახებ.

ცეცხლის შეწყვეტაზე ახალი შეთანხმება ვერ მოხერხდა. წარუმატებელი აღმოჩნდა გაეროს მცდელობა დაერწმუნებინა ისრაელი ცეცხლის შეწყვეტისა და ზავის გამოცხადებაზე.

სექტემბრისთვის დაძაბულობამ ლიბანთან გადაინაცვლა. 17 სექტემბერს კი “პეიჯერების“ უპრეცედენტო სპეცოპერაცია განხორციელდა, რასაც “ჰეზბოლას“ არაერთი საკვანძო ლიდერის ლიკვიდაცია მოჰყვა.

“პეიჯერების სპეცოპერაციიდან“ სამი დღის შემდეგ, ბეირუთში შენობაზე სარაკეტო დარტყმამ ისლამური მოძრაობის ორი უფროსი მეთაური იმსხვერპლა. ხოლო 30 სექტემბერს ცნობილი გახდა რომ დაიღუპა “ჰეზბოლას“ ლიდერი ჰასან ნასრალა, რომელიც ამ ორგანიზაციას 1992 წლიდან ხელმძღვანელობდა.

5 ოქტომბერს ჩრდილოეთ ლიბანზე სარაკეტო იერიშის შედეგად დაიღუპა “ჰამასის“ ორი მაღალი სამხედრო მეთაური.

სრულმასშტაბიანი და ხანგრძლივი ომის საფრთხე ახლო აღმოსავლეთში ისევ არსებობს...

წყარო

იხილეთ ასევე:

ტეგები თემაზე: