"რეგიონი უახლოვდება ყოვლისმომცველ ომს" - დაღუპული ისრაელელი სამხედრო, დაძაბულობა ლიბანში და ირანი ისრაელის შურისძიების მოლოდინში: ბოლო ცნობები ცხელი წერტილიდან
ისრაელსა და ჰეზბოლას შორის სამხედრო დაპირისპირება გრძელდება - გავრცელებული ინფორმაციით, შეტაკებების შედეგად 1 ისრაელელი ჯარისკაცი დაიღუპა. თავდასხმა მაშინ მოხდა, როცა ისრაელის კომანდოსთა ქვედანაყოფი სოფელ ადაისესთან ახლოს, გვირაბთან იყო ჩასაფრებული. დაღუპული ჯარისკაცი 22 წლის ეიტან იცხაკ ოსტერია.
"ჰეზბოლას" მტკიცებით, ისინი მხოლოდ ისრაელის თავდაცვის ძალების წინააღმდეგ ბრძოლის "პირველ რაუნდში" იმყოფებიან:
"ჩვენი ძალები სრულ მზადყოფნაში არიან მტერთან დასაპირისპირებლად. ის, რაც დღეს მისგავ ამში, მარუნ ალ-რასსა და ადაისეში მოხდა, მხოლოდ დასაწყისია".
პარალელურად ისრაელი აგრძელებს ჰეზბოლას პოზიციების დაბომბვას ლიბანის მასშტაბით - მინიმუმ ხუთი ძლიერი აფეთქება მოხდა სამხრეთ ბეირუთში ამ დილით. ასიათასობით ლიბანელი მშვიდობიანი მოქალაქე ჩრდილოეთით გარბის, ხოლო სხვა ქვეყნის მოქალაქეები ტერიტორიის დატოვებას ცდილობენ.
ლიბანელმა პოლიტიკოსმა მიშელ ჰელუმ BBC-ს განუცხადა, რომ ქვეყნის დედაქალაქში "დაძაბული" ვითარებაა.
რეგიონი უახლოვდება ყოვლისმომცველ ომს, რომელიც უკვე იზიდავს მოკავშირეებს ორივე მხრიდან - ბრიტანული თვითმფრინავები გამოიყენება ირანის დარტყმების მოსაგერიებლად. ამავდროულად, ექსპერტები ვარაუდობენ, რომ ისრაელმა შემდგომი იერიში შესაძლოა ირანის ნავთობის ობიექტებზე მიიტანოს.
"ჩვენ უნდა ვიმოქმედოთ, რათა გავანადგუროთ ირანის ბირთვული პროგრამა, მისი ცენტრალური ენერგეტიკული ობიექტები და სასიკვდილოდ დავაკოჭლოთ ეს ტერორისტული რეჟიმი", - დაწერა ისრაელის ყოფილმა პრემიერ-მინისტრმა ნაფტალი ბენეტმა.
დღეს დილით IDF-მა განაცხადა, რომ "დამატებითი ძალები" უერთდებიან „შეზღუდულ, ლოკალიზებულ, მიზანმიმართულ იერიშებს ჰეზბოლას სამიზნეებზე“ სამხრეთ ლიბანში. ისრაელმა გააფრთხილა სამხრეთ ლიბანში მცხოვრები ხალხი, დაეტოვებინათ თავიანთი სახლები და წასულიყვნენ მდინარე ავალის ჩრდილოეთით, საზღვრიდან დაახლოებით 36 მილის დაშორებით.
ჯანდაცვის სამინისტროს ცნობით, ბოლო ორი კვირის განმავლობაში, ისრაელის თავდასხმების შედეგად ლიბანში 1000-ზე მეტი ადამიანი დაიღუპა, მათგან თითქმის მეოთხედი ქალები და ბავშვები იყვნენ.
ისრაელის მთავრობის თქმით, ის ჰეზბოლასთან ბრძოლას მანამ გააგრძელებს, სანამ ლიბანის საზღვრის მახლობლად მცხოვრები მისი ათიათასობით მოქალაქე სახლში არ დაბრუნდება. ჰეზბოლამ კი პირობა დადო, რომ ღაზაში ცეცხლის შეწყვეტამდე უკან არ დაიხევს.
წაიკითხეთ ასევე:
- ნეთანიაჰუ სამაგიეროს მიზღვით იმუქრება, ირანი კი აცხადებს, რომ ასეთ შემთხვევაში, მათი მორიგი სამიზნე ისრაელის მთელი ინფრასტრუქტურა იქნება - უახლესი ცნობები მსოფლიოს ერთ-ერთი ყველაზე ცხელი წერტილიდან
- "ყურსასმენი მეკეთა, თავიდან ხმა ვერ გავიგე... ტერაქტს შევესწარი, ამ პერიოდში სამჯერ ჩაირთო განგაშის ზარი, ჩემს თავზე რაკეტები დაფრინავდნენ" - რას გვიყვება ისრაელში მცხოვრები ქართველი?