სინოპტიკოსები გვაფრთხილებენ: საქართველოში ამინდი უარესდება - წვიმა ელჭექით, ზოგან სეტყვა, მეწყრულ-ღვარცოფული პროცესების საფრთხე და ა.შ.

1 - ლი ოქტომბერს, დღის მეორე ნახევრიდან 3 ოქტომბრამდე საქართველოში ამინდი გაუარესდება. ამის თაობაზე გარემოს ეროვნული სააგენტო გაფრთხილებას ავრცელებს.

"1 - ლი ოქტომბერს დღის მეორე ნახევრიდან 3 ოქტომბრამდე საქართველოში მოსალოდნელია დროგამოშვებით წვიმა ელჭექით, ზოგან ძლიერი, შესაძლებელია სეტყვა, ქარის გაძლიერება, ზღვაზე 3-4 ბალიანი შტორმული ღელვა. მოსალოდნელმა ნალექებმა საქართველოს პატარა მდინარეებზე შესაძლებელია წყლის დონის მნიშვნელოვანი მატება, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს. (საფრთხის დონე საშუალო)", - ვკითხულობთ განცხადებაში.