“დიდი ამბავი ატეხილა ჩემს ბოდიშზე - ამაზე ყოველ ნახვაზე ველაპარაკებოდი, მე მგონი უკვე ვაწუხებდი კიდეც“ - რას წერს ნანკა კალატოზიშვილი კესარია აბრამიძესთან დაკავშირებით
მსახიობი ნანკა კალატოზიშვილი კესარია აბრამიძის მისამართით მოხდილი ბოდიშის შესახებ კიდევ ერთ განმარტებას აკეთებს.
მისი თქმით, საზოგადოება წლების წინ ჩაწერილ გადაცემაზე, სადაც ნანკა სტუმარს მისთვის მიუღებელ კითხვებს უსვამდა, სამართლიანად არის აღშფოთებული. თუმცა, მომხდარს თავადაც განიცდის და იმაზე მეტად ნერვიულობს, ვინც კრიტიკისთვის ახლა მოიცალა.
“დიდი ამბავი ატეხილა ჩემს ბოდიშზე. მე კი წლებია მაწუხებს ეგ გადაცემა და თქვენ ეხლა რატომ გაგახსენდათ და შეგაწუხათ, ეგ ნამდვილად საინტერესოა.
ჩემზე მეტად არ მგონია ვინმე განიცდიდეთ ამ ამბავს და არც წლების მერე სინანული იყო ჩემი პოსტი. ამაზე ყოველ ნახვაზე ველაპარაკებოდი, მე მგონი უკვე ვაწუხებდი კიდეც15 წელი ამის გახსენებით. ასე რომ, როგორც არ უნდა მწყევლოთ და მლანძღოთ, იმაზე მეტად ვერ მატკენთ, ვიდრე მე ვატკინე საკუთარ თავს.
პ.ს. მიხარია თუ დღეს რეალურად განიცდით ვინმე ჩემს ძალიან ცუდ საქციელს და გეშლებათ ამაზე ნერვები. მართლები ხართ და გისურვებთ ყოველთვის ესე იცავდეთ ადამიანებს უსამართლობისგან,“ - წერს კალატოზიშვილი.
- ცოტა ხნის წინ ნანკა კალატოზიშვილმა წლების წინ ჩაწერილი გადაცემა “სიმართლის დრო“ გაიხსენა, აბრამიძეს ბოდიში მიუხადა და განაცხადა, რომ მაშინ დასმული კითხვების გამო სცხვენია.
"წლების წინ, კესარია იყო სტუმრად "სიმართლის დროში". ამაზე სამარცხვინო და საზიზღარი გადაცემა ალბათ, არც არასოდეს წამიყვანია. იმ დღესვე ბოდიში მოვუხადე და იმ დღიდან დავიწყეთ მეგობრობა. დღესაც სახალხოდ გიხდი ბოდიშს, იმ გულისამრევი გადაცემისთვის. და თუ რამე ვისწავლე იმ დღეს, არასდროს უღალატო საკუთარ თავს, საკუთარ პრინციპებს.
იმდენად ამაზრზენი ვიყავი, ყურში ჩაძახილის გამეორებით და რასაც და როგორც გეკითხებოდი, ამდენი წლის მერეც ვერ ვინელებ ამ ყველაფერს. მიყვარხარ და, ალბათ, ვერც ვერასოდეს ვაპატიებ ჩემს თავს, მიუხედავად იმისა, რომ შენ იმ დღესვე მაპატიე" - წერს ნანკა.
აღნიშნული გადაცემის პირველი წამყვანი ნანკა კალატოზიშვილი იყო, შემდეგ კი შალვა რამიშვილი. ამჟამად გადაცემა "სიცრუის დეტექტორი" გიორგი გასვიანს მიჰყავს.
ტრანსგენდერი ქალი, კესარია აბრამიძე დიდ დიღომში, ავთანდილის ქუჩაზე მდებარე საცხოვრებელ სახლში რამდენიმე დღის წინ მოკლეს. მკვლელობის ფაქტზე სამართალდამცავებმა 26 წლის ბექა ჯაიანი დააკავეს. ბექა ჯაიანს სასამართლომ აღკვეთის ღონისძიების სახით პატიმრობა შეეფარდა. ბრალდება საქართველოს სისხლის სამართლის კოდექსის 109-ე მუხლის „თ“ და „მ“ ქვეპუნქტებით წარედგინა, რაც გენდერის ნიშნით, განსაკუთრებული სისასტიკით განზრახ მკვლელობას გულისხმობს და სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.
იხილეთ ასევე: