"ამაზე საზიზღარი გადაცემა არასოდეს წამიყვანია, ვერ ვინელებ, რასაც გეკითხებოდი" - რას წერს ნანკა კალატოზიშვილი წლების წინანდელ ეთერზე, რომელსაც კესარია აბრამიძე სტუმრობდა
ნანკა კალატოზიშვილი სასტიკად მოკლულ კესარია აბრამძეს ბოდიშს უხდის. მსახიობი სოციალურ ქსელში მიმართვას ავრცელებს, სადაც წერს, რომ რცხვენია იმ გადაცემის წაყვანის, სადაც წლების წინ კესარია ჰყავდა სტუმრად და მას არც თუ ისე სასიამოვნო კითხვებს უსვამდა.
საუბარია გადაცემა "სიმართლის დროზე", რომელიც ახლაც გადის არხზე, ოღონდ სხვა სახელწოდებით.
"წლების წინ, კესარია იყო სტუმრად "სიმართლის დროში". ამაზე სამარცხვინო და საზიზღარი გადაცემა ალბათ, არც არასოდეს წამიყვანია. იმ დღესვე ბოდიში მოვუხადე და იმ დღიდან დავიწყეთ მეგობრობა. დღესაც სახალხოდ გიხდი ბოდიშს, იმ გულისამრევი გადაცემისთვის. და თუ რამე ვისწავლე იმ დღეს, არასდროს უღალატო საკუთარ თავს, საკუთარ პრინციპებს.
იმდენად ამაზრზენი ვიყავი, ყურში ჩაძახილის გამეორებით და რასაც და როგორც გეკითხებოდი, ამდენი წლის მერეც ვერ ვინელებ ამ ყველაფერს. მიყვარხარ და, ალბათ, ვერც ვერასოდეს ვაპატიებ ჩემს თავს, მიუხედავად იმისა, რომ შენ იმ დღესვე მაპატიე" - წერს ნანკა.
- აღნიშნული გადაცემის პირველი წამყვანი ნანკა კალატოზიშვილი იყო, შემდეგ კი შალვა რამიშვილი. ამჟამად გადაცემა "სიცრუის დეტექტორი" გიორგი გასვიანს მიჰყავს.
ძველი ჩანაწერი "იუთუბზე" ოთხი წლის წინ კესარიას თავად აუტვირთავს. გადაცემაში სტუმრის მისამართით ისმის მსგავსი კითხვები...
"თქვენი მშობლები უფრო ბედნიერები იქნებოდნენ, შენ რომ არ გაჩენილიყავი?"
"შენი არაორდინალურობა რომ არა, უბრალო, პროვინციელ ბიჭად დარჩებოდი?"
"შენს დებს, საჭიროების შემთხვევაში როგორც ძმა, გვერდში დაუდგები?"
"თქვენს ქმარს უთქვამს, რომ თქვენთან უფრო კარგი სექსი აქვს, ვიდრე ყოფილ მეუღლესთან?“
"მანდილოსნის სადღეგრძელოს შემდეგ, მადლობას იხდით?"- ეს არის ბოლო კითხვა, რომელსაც კესარია გადაცემაში დადებითად პასუხობს. ეკრანი ინთება და აბრამიძე 4 ათას ლარს იგებს და თამაშს აღარ აგრძელებს.